🍃🌼علاش تحير فيا...🌼🍃

🌠الحلقة 21...🌠

🍃🌼🍃

#رحيل_تحكي
سمعت دقات الباب تنطرت من مكاني نجري.. عرفتها مريم.. دوب لا فتحت الباب ترميت عليها عنقتها بقوة  ما حسيتش بدمعتي كيفاش هبطت.. انا الي دموعي مش ساهلة هالسخطة بكاتني.. خفففففت عليها برشاااا.. تمنيت راني لبارح طرت للسبيطار وقعدت معاها ليلة كاملة اما ضطريت نخبي علي عمي وخبرتو انها بايتة مع هيبة.. وبقيت يدي علي قلبي نخمم فيها... وهي توة قداااامي اما فما شي غريب.. فما حاجة بيناتنا.. واقفة وسطنا ومبعدتنا علي بعضنا.. يديها الي تعودو يتغرسو وسط ضهري من تعنيقتها الدافية لمرة هذي بقاو معلقين في الهواء...
انا:  مريوووومتي قلي لاباس.. اوووه سااامحني بقيت لبرة ادخل يا روووووحي 
دخلت ودارت بعينيها علي الدار
مريم:  بابا وين ( قالتها وهي تبعد في عينيها عليا) 
انا:  عمي خرج من الصبحية ماك تعرفو...
هزت براسها باهي وعطاتني بضهرها وانا ستغربت.. جبدتها بيدي دورتها نحكي..
انا:  مريومتي قلي لاباس؟  شبيك ملي دخلت وانت ساكتة!  فما شي يوجع فيك؟ 
مريم:  لا انا بخير...
نرا فيها كابسة قبضة يدها.. صدرها يتهز ويتحط.. تغزرلي وضايعة فيا.. كينها تقرا فيا وتفركس علي اجابة وسطي... حبيت نبدل الجو علينا وجبدتها من يدها نجر  فيها لطاولة الفطور ونحكي
انا:  يا سيدي فقت عااصباح وحضرتلك ابن فطوووور تنجم تاااكلو.. اقعد اقعد...
قعدت وانا دخلت نجري للكوجينة.. برسمي اول مرة نعمل فازة كيف هكا.. ملي حليت عيني وانا قالبة لكوجينة.. وعاونتني ريهان ورجعت رقدت.. خرجو والصينية في يدي.. حطيتها قدامها وقعدت بحذاها.. 
حطيت يدي علي خدي نثبت في مريم.. تغزر للقهوة وسارحة... حطيت يدي علي يدها وتبسمتلها نحكي
انا:  مريم شصار؟  مكش عاجبتني؟ 
تبسمت ودمعتها وحلت في حافة عينيها.. يديها ترعش علي الطاولة وشفايفها ترڨل.. لأول مرة غزرة مريم تخوفني وأصلا اول مرة نلاحظ هالعينين الشاعلة بالنار.. كينو الانسانة الي قدامي مش مريم الي نعرفها 
جبدت يدها مني تحكي.. 
مريم:  رحيل ياخي أنا خايبة؟ 
انا:  علاش تقول هكا
ضربت يديها علي الطاولة وانا تهزيت وتحطيت
مريم:  جاوبني!!!  انا خايبة؟؟  ياخي انا شعملت بش نستاهل هذا كل؟؟شنيا العيب الي فياااااا بش كل انسان نحبووووو  يمشي ويخليني والا يخليني نكرهوووو... فاش غلطت انا بالضبط...
حاولت نهديها وشديت علي يدها.. عيني في عينيها وريت كمية  القهر والغش. لا لا فما شي غريب.  مريم صح انسانة حساسة وعاطفية اما لمرة هذي قاعدة تراا في نسخة جديدة.. نرا في جانب شخصيتتا العصبية ومزاجها الحاد
انا:  متقولش هكا.. انت ملاك في هيئة بشر.. انت اطيب قلب عرفتووو في حياتي.. انت البراءة بكلها.. وهذا الي يميزك... 
قلت ككا وقربت كرسيا منها وعديت يدي علي خدها وتبسمت... اما هي متبسمتليش.. هي ركزت بعينيها فيا اكثر وقربت مني وهزت كاس لقهوة وباقي تغزرلي خوفتني... 
مريم:   اطيب قلب؟  يمكن اذكا علاش عفسوووا فيا ناس كل... 
قالت ككا وشربت لقهوة فرد فم وقامت
انا:  تي اقعد  خلينا نحكيووو شوي ايجا نقرالك كااسسك ههههه
غزرتلي علي جنب وفكت مني كاس قهوتها وتبسمت تبسيمة صفراء تحكي
انا:   توة نقراه وحدي.. مثلا قاعدة نرا في روحي واقفة في النص.. وورايا برشاااا ناااااس نحبهم والا خليني نقوووول كنت نحبهم.. قاعدة نراا فيهم بعدووو  وصارتلهم حاجة خايبة
من كثر ماني مهبوولة صدقت ونطيت نثبت في الكاس
انا:  علااه اش صارلهم
غزرتلي وطيحت الكاس وانا بقيت صامة في بقعتي
مريم:  تكسرووو ومشاو قطااايع كل قطعة في شيرة كيما كاس لقهوووة..
جيت بش نتكلم سونا تلفونها... هزت وانا عينيا مرشوقة في الكاس الي مشا طروووف لوطة... 
نسمع في صوتها وهي تحكي
مريم:  باهي سي ظافر توة نجيك للفيلا.. اوك مرسي... 
خلطت وراها قبل لا تسكر الباب.. 
انا:  بش تخرج!  تحب نوصلك؟ 
مريم:  لا مزلت مش خارجة توة... ناوية نفرغ البيت؟ 
انا:  تفرغها علاااش؟ 
مريم:  عندي حوااايج زايدين نحب نطيشهم... انت خارجة؟ 
انا:  اي شوي اخر نمشي للخدمة.. مريم صافا؟؟ 
تبسمت وصفنت يديها لفوق  تحكي
مريم:  عمري ما كنت احسن من هكا.. حاسة روحي فقت واخيرا من غيبوووبة..  بقيت مبهمة فيها ونغزر باهتة.. لمحتها كي طبست تحت الفرش وجبدت صندوقها الكبير المخبي...جبدت دبشي وهزيت صاكي. غيرت وخذيت مفاتح الموتور وجيت خارجة.. وقفني صوتها.. 
مريم:  رحيل.. كي تجي بش تلقي مفاجئة.. نشالله تعجبك
مزلت شنجاوبها سكرت الباب... قبل لا نطلع فوق الموتور.. طلبت خيام مرة وثنين وثلاثة مهزش... ليون نورمالمون نتقابلو اووووف... فقررت نمشي لدارو في البرطمان...