🍃🌼علاش تحير فيا...🌼🍃

🌠الحلقة 25...🌠

🍃🌼🍃

خيام يحكي،،
ما نعرفش كيفاش تعدي بقية نهاري.. يا نخمم في رحيل و آش من كارثة حلتها في الدار.. بقيت يدي علي قلبي يطلبنيش العساس يقلي راو فما حريقة والا يقلي رحيل داخت مالڨاز.. حطيت الإحتمالات كل وليلا رحيل طلعت مسيطرة حتي علي أفكاري.. ما صدقت كملت بقية لوراق الي في يدي ودخلت سيرين.. شفعت لربي في داخلي ولعنت النهار الي عرفتها فيه واكيد شلقت بيا كي تقلبت وقت لمحتها... خطفت الفيست متاعي وهي تنطرت عليا كي لقضا.. فكتها مني ولوحتها علي القاعة...
سيرين: انا راني وصلت للتوب معادش نجم.. ياخي شبيك يا راجل؟ شبيك مطفيني...
انا: ياخي جيتك جديد انا؟ لتو لا تعودت بيا.. انا هكا ليلا سيرين وكان عجبك...
سيرين: بربي بابا! اسمعني انا راو معادش نجم... تعبت منك وفدييييت.. لا تخرجني ولا تسهرني ولا تهز عليا جد بو التلفون... نقلك نجيك للدار تقلي لا.. مسكر عليا بيبان كل ياخي بااااااش خطيبتك انا اه بااااااش... سيا يزينا لحد هنا...
من غير منشعر ضربت الطاولة وقلبت الي فيها كل... علي قد ما رحيل تهديني علي قد ما سيرين تخرج اسوأ ما فيا...
ركبتي العصب وصحت بلا منحس...
انا: رحيييييل فك عليا اياا عاد
عم السكات وريت عينيها دمعوا.. عضيت علي لساني مغزززل... غلطت في اسمها انا توة واش بش يفضها...
من غير مقدمات.. نحات الخاتم ولوحتو عليا وغزرتلي بعين مكسووورة...
سيرين: منيش بوهالية ليك سي خيام.. طول عمري نعرف الي انت تخوون فيا وسكت اما هذي اول مرة تغلط في اسمي باسم وحدة.. والظاهر هالوحدة مش عابرة كيفها... خاتمك براااا بلو واشرب ماااه والمفاهمة بين paa وبوووك.....
خرجت وسكرت الباب وانا ترميت علي الكرسي نرد في النفس.. حاس روحي تنرفزت ويدي بدات ترعش.. حليت القجر وجبدت حربوشة بلعتها طول...
تكيت راسي علي الكرسي شوي وتنفست براحة.. ومع تغميضة عيني جات بين عينيا رحيل بمنظرها متع الصباح.. ترسمت علي شفايفي تبسيمة عريضة.... لبستها في العادة تخبي كل تفاصيل بدنها.. ديما تلبس sport وواسع.. وشوفتها بال chemise متاعي صدمني.. يمكن لحظتها شفت الجانب الانثوي المخبي فيها... في العادة منركزش وخاصة رحيل معرفتي بيها جديدة اما هي عملت فيا الي معملتوش سيرين الي تعرفني من سنين.. رحيل تنجم تخلق في عاصفة متع تناقض.. من شيرة تضحكني ومن شيرة تغششني.. مرة تخليني نبهت فيها ومرة تخليني نزيد نحب نغزر فيها اكثر.. رحيل من الناس الي يخلوك تفرح.. يخليوك تحس بالسعادة الداخلية.. بالسلام.. مع رحيل حتي نوبات الغش منتسحقلهمش دواء خاطر مجرد نرا دموعها نندم علي الي عملتو..
ووسط أفكاري خرجت طاير.. حاس بفرحة كبيرة.. لأول مرة نحب نمشي للدار.. لأول مرة نحب نشارك هالفرحة مع حد... نحب نحكي الي في قلبي وطول مشيت لأمي..
دوب لا دخلت لبيتها نلقاها قاعدة بحذا الشباك تغزر للبرة.. قداش غاضني حالها.. ملي تحطت علي هاك الكرسي وهي محبوسة بين اربعة بيوت ولكلو من بابا.. كان يحشم بيها.. حتي كي يحضر مناسبة من المناسباات ميهزهاش معاه..
هبطت علي ساقيا قدامها وهي حطت يديها علي خدّي..
أمي: ولدي الغالي واخيرا جا يشوف أمو ( بست يدها وهي باستني من جبيني بمعزّة)
انا: سامحني أمي.. الله غالب ماك تعرف الخدمة
امي: تعرفني نتوحشك.. هاك ترا بعينيك.. أمك ديما وحدها.. بوك ميروحش كان في ليل... كان انت تعرس وتجيبلي كنتي هوني تونسني اه...
ضحكت وهي فهمت عليا وكملت تحكي..
امي: اكيد منحكيش علي كا اللفعا سيرين.. اصلا بوك من بكري كشاكشو طالعة ويستني فيك تجي.. ننصحك اهرب خيرلك قبل لا يعطيك محاضرات..