🍃🌼علاش تحير فيا...🌼🍃

🌠الحلقة 28...🌠

🍃🌼🍃

يمسح في وجهو من الدم وفاتح قفالي شوميز منطرهم علي الأرض كعبة كعبة..
يغزر لإنعكاسو في لمراية مشوش ومنرفز.. مش منجم يصدق انها ختارت صفّ أركان من جديد.. مش منجم يستوعب إنو لأول مرة في تاريخ علاقاتو يفقد السيطرة وهو عاااشق للسيطرة ويحب تحديات.. بالنسبة ليه الطفلة كي طرح الشطرنج يعرف لقواعد ويربح لآخر نفس.. يرا روحو اذكي من الكل ويتغابي ساعات وفي لحظة يقلب الطرح.. الصبر الي كان عندو ستة سنين ليوم وفاا ومريم سيا استهلكت كل فرصها وتوة بش يولي كل شي بالقوة..
ركز يديه علي الرخامة.. عين علي إنعكاسو في لمراية وعين علي باكو الدواء الي يقاوم ويصارع بش ميشربشي منو.. اما منجمش وروحو طلعت مالخنقة الي حسها.. من شيرة نادم علي الي يعمل فيه ومن شيرة مروان واحد آخر يحب يخرج من وسط جواجيه ويشعل دنيا بلي فيها.. في لحظة خيال مريم سكن عينيه وتجسدت  قدانو برفضها وعنادها وريشتها المرفوعة وراسها الي متهبطوو لحدّ...  حس بغش كبير خلاه يهز الي قدامو كل ويرميه علي لمراية بكل وحشية... ومعاه تشوه خيال مريم وإندثر وولي قطايع كييما لمراية لي تطرشقت قدامو.. بلا احساس ولا حتي رمشة عين عفس علي الڨزاز وتعداه ومشي لبيتو.. خجوة ورا خطوة لين وصل لمكتبتو الصغيرة المعلقة في الحيط.. جبد كتاب منهم وتحلت فتحة في الحيط.. دخل وتسكر الباب وراه..
بيت ضلمة وحيوطها كل تتشاعل بضوء أحمر نحي الشوميز وطيشها علي القاعة.. وقعد علي الكرسي يلعب بكورة مطاطية متع ستراس في يديه.. يغزر لتصاورها المعلقة في الحيط.. كل تركينة في هالبيت فيها صورة لمريم.. حياتها بتفاصيلها.. بعثراتها.. بخطواتها بكل لحظات عاشتهم مصورة قدامو.. ستة سنين من تخطيط.. ستة سنين من الصبر وهو يستني في اللحظة المناسبة بش يظهر قدامها أما هو شافها.. هو تعمد يقابلها ويشهد علي دموع فراقها الي تسبب فيه هو...  ذاكرتو هزتو لتفاصيل خطتو هو وتسنيم.. أول مرة شاف مريم وقت تسنيم طلبت منو يسقسي عليها ويعرفها.. يعرف شكون المرا الي سكنت قلب أركان وتنافس في تسنيم..  وكانت هذيكا مرة وحدة كافية بش تسكن عقلو.. 
مسلطنة بزينها وحرجها لأسود.. متمردة في مشيتها وتحريكة شفرتها حتي.. ركز مع ادق تفاصيلها حتي ريحتها... برفانتها واسم  كل مكان مشاتلو.. ملي كان يتبع فيها علي جال تسنيم.. ولي يتبع فيها بش يرضي مرضو الي خلاه  يدمن علي السيطرة.. انسانة كيف مريم صغيرة ونفاحة وقتها كانت بالنسبة ليه فريسة سهلة اما صبر برشاااا بش يقرب منها وقعد يتصيد في الفرصة وحتي هالانتظار كان مجرّد قطعة أخيرة  بش يبدا بيها لعبتو.. رجع راسو لتالي وتفكر اول مرة مريم شافتو.. والا خليني نقول تعمد بش تراه ومش تراه بوضوح... واختار ليلة مناسبة بش يشهد علي  حزنها... 
،،، فلاش باك،،،
تمشي وتصارع في دموعها وشهقتها.. هاربة من خيال أركان الي إحتلها سنين وبعد هجرها... تمشي وسط الطريق ومش مصدقة الي صار بيناتهم توة.. كلامو يتكرر في وذنيها.. كيفاش بالسهوولة هذي تخلي علي حبهم  ولأسباب مش معقولة.. ومن شيرة اخرا هو كان واقف يترصد فيهم من بعيد.. شهد علي فراقهم الأخير.. وتلذذ برشا  بدموع مريم... طلع في الكرهبة ووقف في حافة الطريق ونزل.. شادة سحابتو فوق راسو مغطي روحو علي لمطر.. يحسب في لوقت بالدقيقة والدرج متاكد انو هي بش تتعدي من هوني وكيفاش ميعرفش وقت الي هو مراقبها وحافظ كل ديتاي في حياتها وبالفعل تعدات.. الطريق كان كلو زحمة.. صوت تزمير لكراهب وترها ومع لمطر الي هابطة عليها تبلت بكلها ولا شافت شي.. تببع في ريقها وتغص.. دموعها تخلطت مع المطر وحست كينو السماء ليلى حزينة معاها وتقسم معاها في وجيعتها... وقفت في نص طريق مهمشة.. صوت أركان يتردد في وذنيها ولحظات الي عاشوووها تتعاود وتتكرر قدامها.. حست بجوجمة في راسها وقدمت خطوة رافعة يدها توقف في تاكسي اما التاكسي الي تعداا لطختها بالمااااء وطاحت علي القاعة.. لكراهب يزمرو  عليها وهي علي الأرض لا عرفت تبكي علي أركان ولا تبكي علي الحالة الي هي فيها..طبّس عليها وبسحابتو حماها من المطر.. غطاها بجهامتو.. شمّ ريحتها المخلطة بريحة لمطر.. وقطرات لماء الي نازلين من شعرها لامسوه وحفروا في مخو ذكري هاللحظة.. كيما تخيل لقاءهم وكيما خطط.. كل شي صار كيما حب وأكثر.. 
هي ترجف شي مالبرد وشي من خوف.. صوت لكراهب رعبها وخيللها انها ماتت هي والحب والي في قلبها.. تخيلت انو برسمي كلمة"بعدك مستحيل نعيش "كي التعويذة السحرية الي تحققت من اول دقيقة بعدت فيها علي أركان.. مركزتش معاه هالراجل الي طبس عليها وحملها... عينيها بدات تضبب وتضيع.. وضاعت مريم وسط حزنها وتخيلاتها والشي الوحيد الواقعي الصحيح هو شهقتها وصوت أركان الي هجرها..  
ما حست كان علي صوت يوشوش في وذنيها بش تفيق ولمسة يد علي جبينها توعّي فيها.. بدات تفيق وتوفي السرحة وما شافت من خبال هالراجل كان تاتو صغير في رقبتو شدلها انتباها 
٠٠٠
،،،الواقع،،، 
فاق من سرحتو ورجع للعالم لواقعي وين فما حقيقة ثابتة هو يعرفها ومتأكد منها.. مريم لتوة تحب أركان.. مريم لتوة لا نساتو اما نسات مروان والا خليني نقول ملاحظتوش..
قام من مكانو عارق ومربوووث.. هز روحو وخرج من بيتو ويا دوب تحل الباب متع البيت السرية لقي آدم متكي علي الفوتاي يقلب في التلفزة متاعو ويتفرج..
مروان هزو وحطو وجبد منشفة يمسح في رقبتو ويديه.. غزر لآدم يسأل فيه
مروان:  شعملت لهاك ال ~٠٠٠ أمجد
آدم:  تهني جوو باهي فرحت بيه وعطيتو طريحة نباش القبووور قلي انت شبيها حالتك هكا!!  شنية جوّ لمشروع متاعك!! 
طيش لمنشفة علي الفرش  وقعد بحذا آدم وفي يدو كاس يترشف فيه.. 
مروان:  كل شي سالك اما فما حاجة مقلقتني.. الاراضي الي يخدم عليهم ظافر منيش مرتاحلهم.. كموقع يااااسر طيارة اما كمصدر منعرفش!  حاسة فما شي غريب...
آدم تبسم وضرب بيدو علي كتف مروان يحكي..
مروان:  اعطيني آدريس لمشروع توة نبربش ونعرف
سرح شوي وغزرلو غزرة حاادة خلاتو يحس انو فما موضوع خطير بش يتقال..  
مروان:  خليك من الارض مش مشكلة كبيرة تو نتصرف وحدي.. عندي ليك حاجة اخرا نحبّك تعملها.. فما طفلة مفقودة والراجل الي خطفها منعرف عليه كان طراطش.. بش نعطيك اسمو وانت حاول تعرف وين مكانو ووين ينجم يكون مخبي الطفلة...
بعثلو صورة علي التلفون وآدم تفاجئ حس روحو يعرف هالشخص منين.. وبين دهشتوو وسأل طول
آدم:  منعرفش وين راتو عيني هالراجل!  شكونو!! 
مروان:  هذا شوفير ظافر الرياحي.. ركح امورك وتستحق اي شي كلمني.. وتوة اخرررررج من بيتي خنرتاح.... 
تبسم لخووه وقام وهلي وقفتو تحل لباب بنطرررة ودخلت جيهان كشاكشها طالعة مفووورة بالغش..
جيهان:  قتلككككك خوفو مش اضربووووو ياخي هبلللللت آدم...
شدها من كتفها يهدي فيها بكل برود
آدم:  calm dowmكوزييين
نترتلو يدو وغزرت لمروان
جيهان:  زوز مرضضضضضضي وربي بلااني بيكم... انا معادش زايدة حتي درج في توووونس بش نرجع لايطاليا بحذا maaaa
آدم كمش جبينو يقلد فيها كيفاه تصييييح:  مااااع باااااع مالا معززة... معادش تصيح يا فقصة هاو شنجي نكسرلك فمك... كا ااف٠رخ يستاهل الطريييخة
ضربت ساقيها علي القاعة مغزززلة..
جيهان:  ياخي تسخايلني منعرفش اش صار!!!  وكا البنات شنية ذنبهم!!!!  منيش مصددددقة اش عملت وانننننت سي مروان باعثووو ومتقوي بيك عاد سي خوووك ياسر راكم كثرتلوووها...
ما طاقو صبر... ضرب يدو علي الطاولة سكتهم.. وجيهان عينيها دمعت...
مروان:  براااا ارجع لأمك  برااا... تسخايلها  ملوجة عليييك وعلي راحتك!!  امك الي دروووڨ كلاها ونهشهها وشطر وقتها مش صاحية!!!  برااا ارجعععع وعيششش الذل وكووول اضرب من راااجل امك!!! 
عينيها دمعت ومكنتها الشهققققة.. قربت منو وتجرأت لاول مرة تهز عينيها فيه
جيهان:  أمي اامدمنة وراجل امي الي يضرب فيا أهون ببرشا من ولاد عمي الي يقولون ما لا يفعلوون.. تحميو فيا من رجال وانتوما ما خليتو حتي طفلة وما بكيتوووش... بلكشي ربي يحاااسب فيا علي دموع لولايا...( غزرتلهم زوز متقزززة) الزوز كي بعضضضكم تتشابهو.. زوز تلعبو بالبنات سيرتووو انت سي آدم مخليتش طفلة من صحابي في لفاك مصوحبتهاش وبعد رميتها خليتهم يكرهووني كل...  نكرررررررهكم والله
خرجت وطربقت لباب وراها وبقي آدم راسو راس مروان خوه.. غزروا لبعضهم ووطأت الغزرة بتبسيمة فسر بيها آدم إنو ناوي يعمل الي قال عليه خوه كل ويتبع خطاوي شوفير ظافر الرياحي.. 
بقي وحدو راسو راس لحيوط.. جا بش يغير دبشو ويرقد.. اما تلفونو سونا ولقاها تسنيم هز طووول.. تصدم وقت سمع صوتها تبكي...
تسنيم: مروان عيشششك تنجم تجيني للسبيطار... غالي عندووو سخاانة قووية وما لقيتش اش نعمممممل... بقيت وحدي
العرق لبوو ودمو فور... غير دبشووو بزربة وخرج... طلع في لكرهبة يسااارع في لوقت.. وقبل لا يهبببط صونا تلفونو من الكلينيك متاعو.. جاه صوت الطبيب صاحبو وهو يحكي..
هو : سي مروان نتيجة التحليل طلعت و.........

مريم الجمني



✴✴✴✴

شراايكم فالقفلة...😂😉
طلعواا الحلقات فيسع نكمل نهبطلك♥️❤️