" لم تكن النجاة سهلة لكنني نجوت..لم اعتد ع سلك الطرق الممهدة لطالما كانت طرقي وعرة وانا من كان سببا في تمهيدها.. انا صاحبة الفضل ع نفسي دائما وابدا 🖤.."
صحيت كالعادة ع صوت امي وهي بتصرخ في راسي بعد م المنبه ضرب وانا وقفتو للمرة الرابعة ..يعني المنبه م بصحيني بس صوت امي كفيل بانو يخليني اقوم في اقل من دقيقة..دخلت وانا مفتحة بالغصب اتسوكت واستحميت وطلعت لقيت امي مجهزة الشاي وقاعدة في الصالة ،،اول م وصلتها بقت تحمر لي قلت ليها شنو ي
سرو ياخ م تعايني لي كدة ..قالت لي اصلا غير قلة ادبك دي م بتعرفي لي حاجة المنبه دة ضرب كم مرة وانتي قفلتيه؟قلت ليها انتي عارفة بتك نوما تقيل م كل مرة نعيد نفس الكلام ي حجوج ياخ قالت لي اترمي واشربي شايك دة م تصدعي بي بنقتك الكتيرة دي🙂قلت ليها مع انك احرجتيني لكن م مشكلة قعدت جنبها وبقيت بشرب في الشاي كانت كل دقيقة بتعاين لي بطرف عينا وعادة هي بتعمل الحركة دي لم تكون عايزاني في موضوع ..ختيت كباية الشاي واتلفت عليها قلت ليها ها ي سرو احكي عايزة شنو؟ابتسمت وقالت لي طول عمرك فاهماني طيب خليني اجيبا ليك من الاخر كدة ابوك قال انو اخوانك ديل نازلين السودان الاسبوع الجاي وم عايز تحصل مشاكل بينكم ف عشان كدة قال لي افاتحك في الموضوع دة ..قلت ليها امي انتي عارفة انا م عندي مشكلة من ناحيتهم ولا شغالة بيهم اصلا هم المزودنها وزعلانين وانا م عارفة اليزعل من التاني منو في النهاية هم اولاد المرة الصغيرة يعني هي الجات ضرة فيك ي امي م انتي .. قالت لي ي ريان م عندك شغلة بالكلام دة وبعدين فاطمة الله يرحمها الموضوع دة م يتفتح تاني واخوانك ديل لم يجو م معروف ينزلو وين لكن اكيد حتتلاقو فم تعملي معاهم نقاش انتي الكبيرة ولازم تكوني واعية ..قلت ليها ي سرو انتي عارفاني م بغلط ع زول لكن هم لو لمو نفسهم عوجة مني م بتجيهم خليتا بتحمر لي ودخلت غرفتي ركبت السماعات ولقيت حلقة مسلسلي التركي بدت فطوالي بقيت بحضر فيها 💛..
"انا ريان او زي م بقولو لي ريري23 سنة خريجة هندسة معمار شغالة في واحد من فروع ابوي الهنا في السودان ومعظم شغلي بكون اون لاين ومن البيت وم بحب امشي المقر تبع الشركة كتير ..امي سارة 45 سنة طبيبة ومتخصصة جراحة وتقريبا شغلها دة هو السبب في المشاكل الحصلت وخلت ابوي يتزوج..
لم انا عمري كان سنتين امي كان نزلت شغل وكدة والمشاكل ابتدت من هنا واهل ابوي كانو مصرين ع انو امي تخلي الشغل وكدة وهي رفضت ف ابوي اقتنع بفكرة انو مفروض يتزوج تاني وفعلا اتزوج من بت اهلو واستقرو في السعودية بس م طلق امي وكان كل اجازة سنة بنزل لينا ،،وهسة قبل سنة كدة امهم اتوفت الي هي فاطمة دي وانا وامي عملنا الواجب وعزيناهم بس هم اصلا كدة م بطيقونا وانا م مركزة معاهم ابدا..وابوي محمد في منتصف الخمسينات كدة عندو شركات استيراد وتصدير ومعاه اعمامي وجدي خلا ليهم الشغل باعتبار انو كبر وقعد في البيت مع حبوبتي ..جدي ابو امي متوفي بس حبوبتي حية وقاعدة مع خالتي الفي البورت"
اثناء م مندمجة مع المسلسل كدة تلفوني رن وكانت صحبتي سماح رديت ليها وقلت ليها خير ي قاطعة اللذات ي هادمة المتعة..قالت لي كالعادة بتحضري ليك في مسلسل ي اما بتقري ليك رواية..قلت ليها بسسس الله ينور عليك وانتي دايما بتجي وتخربي لي الموضوع..قالت لي عايزة اوريك انو انا وباقي البنات طالعات العصر وقلنا نغشاك معانا بس م تستاهلي بالجد الحسنة في المنعول😏قلت ليها لا استكاناتك حبيبة كلو ولا الطلعات تغشوني طبعا😂..قالت لي عارفاك رمتالية وشغل زي الناس زاتو م شغالاهو قاعدة في البيت 24 ساعة زي الوالدة ..قلت ليها بطلي حقد ي وسخة انتي في زول ضربك ع ايدك وقال ليك اقري صيدلة ؟قالت لي انا عكسك تماما بحب الشغل احسن لي من كتمة البيت ،،قلت ليها ي زولة هي الركلسة زيها مافي وبعدين انا شغلي دة اخري معاهم اني ارسم ليهم النماذج وابعتا ليهم م بحب الكتمة والتقييد😘..قالت لي غايتو عجيبة جدا ي بت محمد انتي ،،قلت ليها انقلعي بالله عليك المسلسل حتفوتني😆 قفلت منها ورجعت واصلت في المسلسل "اصلا نحنا شلة من الاساس انا وسماح ومزن وياسمين ونهى ..كلهم دخلو طب الا سماح صيدلة وانا عكسهم كلهم كنت شايلة هندسية ودخلت معمار💕.."
خلصت من الحلقة وكشفت للساعة كانت 10 الا طلعت برة واتوجهت ع الحديقة كان عندي فيها مشتل صغير فيهو جزء من لوحاتي البرسمها لم اكون فايقة وورود انا زارعاها سقيت الورد وقعدت في الكرسي وبقيت بتامل في اشكال الورود القايمة بمختلف الوانها ❤️..شلت نفس عميق وانا بفكر في اخواني الجايين ديل هل حينزلو معانا هنا ولا حيرفضو ولو نزلو الحياة حتمشي كيف ؟انا عارفة امي طيبة وقلبها ابيض بس انا الحقارة م برضاها وم عارفة التطورات المنتظراني شنو ؟
"اخواني ديل ولدين وبت الكبير رامي 21 سنة والبعدو راشد 18 سنة والبت ريل وعمرها 16 "كل العارفاه عنهم اساميهم واعمارهم م حصل اختلطت بيهم قبل كدة واحتمال علشان كدة انا متوترة..
اتنهدت وهزيت راسي كاني بحاول اطرد الافكار ،،ورجعت دخلت البيت لقيت سرو في المطبخ دخلت وقلت ليها سرو ي سرو اساعدك بشنو ؟قالت لي ختي الجبنة بس انا خلصت ،،ختيت الجبنة وقعدنا نفطر قالت لي ريري قلت ليها نعم ي رفارف قلبي،،قالت لي كلام قبيل م عايزة اطول فيه لكن لو ممكن تطولي بالك هم في الاخر اخوانك يعني..قلت ليها انتي وابوي خايفين ليه حاقتلهم مثلا؟انا م عندي مشكلة معاهم ي امي وريتك كل واحد يلتزم حدودو بس وم علي بيهم ولا عليهم بي وخلاص قالت لي م تبقي قلبك قاسي ،،قلت ليها لا قاسي ولا غيرو هم البدو بالشينة فيبقو قدرها😘..قالت لي الله يهديك اذا انتي الكبيرة تفكيرك كدة هم الصغار م حنقدر نلومهم ،،قلت ليها بعدين م القاك منحازة ليهم ابوي وشاركوني فيه لكن انتي م بقبل فيك ي سرو تمام؟دخلت المطبخ شلت لي تفاحة واتحركت ع غرفتي قلتي ليها بالمناسبة العصر طالعة مع البنات .. قالت لي تمام ..
دخلت غرفتي ومسكت الاسكتش كان عندي نموذج تسلميو فاضل فيه يومين وقربت اخلص منو ..زدت شوية حاجات في النموذج ونمت مسافة بعد موضوع الغدا وكذا دخلت جهزت نفسي لبست بنطلون وطونك اسود وجزمة وطرحة عنابي ..شلت شنطتي وطلعت للبنات بعد م اتصلو لي .. سماح كانت سايقة العربية وانا ركبت جنبها قدام قلت ليهم يشهد الله شوق كدة لم ماف طريقة ..سماح قالت لي شوق شديد..ياسمين قالت ينعل ابو الشغل ياخ خاطفنا من بعض مزن بقت تضحك وقالت ليها والله اسكتي بس دغوتات تقيلة نهى قالت حليل ايام المدرسة ياخ هسة بنتلاقى من زمن للتاني..قلت ليهم غايتو انا مرتاحة جدا من ضغط الشغل دة م بمشي الشركة الا اذا في حالة طارئة شغلي معاهم كلو اون لاين ..ياسمين قالت لي ي قادرة ي ناهرة انتي😂..سماح قالت لي غايتو مع مسلسلاتك دي ليك حق م تزهجي ..وصلنا المول ونزلنا طلبنا بيتزا وعصاير وقعدنا نتونس قلت ليهم بالمناسبة م شفتو اخواني نازلين السودان..نهى قالت لي احسن ليهم يكونو وسط الاهل هنا بم انو امهم اتوفت قبل فترة وكذا..مزن قالت لي اها ي ريري وانت متقبلة الفكرة؟قلت ليها انا م عندي مشكلة معاهم هم الم بريدونا براهم..سماح قالت لي م تشيلي في قلبك منهم انتي الكبيرة وبعدين الجفا دة بكون بي سبب البعد بس يعني هم م قامو ولقوك في وشهم وسمعو بيك سمع بس ،،ياسمين قالت لي اي ياخ وم حصل قعدتو مع بعض وبعدين خليهم يجو يونسوك في بيتكم دة بدل براك كدة .. قلت ليهم م حاسة انو حنتاقلم مع بعض لكن الله يستر بس ،،اتونسنا مسافة واتصورنا وغيرنا جو وبعدها رجعنا..وقبل انزل قالو لي لازم نعيدا تاني قلت ليهم وهو كذلك❤️
دخلت البيت لقيت امي بتحضر في التلفزيون..قلت ليها الليلة علشان كنتي اوف وم وراك شغل مركلسة جدا ومسترخية..قالت لي والله قعاد البيت دة سمح خلاص اتاريك علشان كدة عاملة كل شغلك بالايميل ومن البيت م بتطلعي..قلت ليها شفتي كيف الراحة النفسية والجسدية دي اهم حاجة
ــــــــــــــــــــــــــــــــــــــــــــــــــــــ
محمد: رامي نادي لي اخوانك ديل وتعالو
رامي:طيب ي ابوي
اتلمو كلهم قدام ابوهم البدا بالكلام
محمد:زي م عارفين انو الاسبوع القدامنا حتنزلو السودان انتو كبار وواعين وم محتاج اوصيكم بس برضو ريان اختكم الكبيرة ي ريت تحاولو تتعودو عليها وبالنسبة للبيت والمحل العايزين تنزلو فيهو القرار برجع ليكم انا م حاضغط عليكم
رامي:ان شا الله ي ابوي حنقرر ونوريك عايزين ننزل وين
قامو من جنب ابوهم واتوجهو ع غرفهم وقفو في نص الممر
راشد:ها حننزل وين هسة؟مع ناس جدي ولا في بيت ابوي
رامي: م عارف بس لو حصل ونزلنا في بيت ابوي ريان دي م عندنا شغلة بيها انا اخوكم الكبير وم عندنا اخوان تاني
راشد:طيب طيب م تنفعل اللهم انا شايف انو ننزل فيهو في الاخر هو بيت ابونا برضو
ريل:وحتى انا دة رايي هي م البت الوحيدة وابوي عندو اولاد غيرا
رامي: تمام بنتفق بعدين
ــــــــــــــــــــــــــــــــــــــــــــــــــــــ
خليت امي بتحضر في التلفزيون ودخلت غرفتي بقيت بقلب في الفيس لحد م زهجت قفلت النت ورقدت وانا بعاين للسقف وبفكر في كلام البنات ..معقول ممكن يملو علي البيت؟ ممكن نتعامل كاي اخوان عادي؟ انا م بكرههم بس برضو م بحبهم يعني نقدر قول ع الحياد م في اي مشاعر مني ليهم.. كل العارفاه انهم شاركوني في ابوي وم حاسمح انهم يشاركوني في امي..اي نعم اني الكبيرة ومفروض اكون اعقل من كدة بس للاسف فقدي لابوي واني اشوفو في السنة مرة كانت حاجة كفيلة بانها تخليني م اتقبل فكرة انو يكون عندي اخوان اتعودت ع اني اعيش براي وم حاسبة فكرة انو عندي اخوان اساسا وعايشة ع المبدا دة.. زهجت من التفكير وغمضت عيوني علشان انوم.
"يعز عليِّ ان اقحم نفسي في دوامة التفكير اللا متناهي.. لكني خلقت هكذا لتستطيع اقل التفاصيل قتلي ببطء🖤"
يتبـــع...
