" ك من سار مئه عام، وفي نهايه الطريق وجد ظلا مناسبا ليستلقي عليه،،هكذا يكون الاحتواء 𑁍❤︎"
ع لسان ريان:
في يوم كنت في غرفتي جاتني خالتو سوسن وقالت لي تعالي نازله تحت،،نزلت معاها وقعدت،،حبوبه قالت لي ي بتي انت بعد كده بقيتي متزوجه وع ذمه راجل،،كفايه انو عرسكم زاتو م اتعمل زي الناس بسبب الظروف بعد كده لازم تمشي بيتك وتكوني مع راجلك،،قلت ليها بس ي حبوبه امي م تمت العده لسه وماهر كلامو انو حيخليني قاعده لحد م تخلص،،قالت لي الباقي كلو شهر وحاجه بس م فرقت انا معاها وانت زاتك مره مره تعالي لينا ماهر م حيمنعك مننا،،خالتي قالت لي انا زاتي قاعده ي ريان م تشيلي هم ،،امي قالت لي اي ي بتي امشي الولد تعب كل يوم داخل في الطريق وزي م حبوبتك قالت ليك تعالي في اي وقت،،قلت ليهم تمام المناسب اعملوه،،اساسا اخر فتره بقيت م عندي حيل اناقش او ادخل في مواضيع ..
ع لسان ماهر:
كنت في الشغل والمهندسه الجديده السدت محل ريان جابت لي التصاميم وطلعت،،وانا قاعد بتفرج عليهم كده تلفوني ضرب رديت وكانت حبوبه مريم،،بعد م سلمت علي قالت لي ي ولدي تعال بكره سوق مرتك كفايه كده،،قلت ليها بس ي حبوبه لسه العده م انتهت،،قالت لي م فاضل كتير انت بس تعال،،قلت ليها وريان عندها خبر؟قالت لي اي عارفه بس انت تعال سوقا بكره، ،قلت ليها طيب خير ي حبوبه واصلت شغل ونهايه الدوام لم رجعت البيت كلمتهم اني حاجيب ريان بكره. امي قالت لي واخيرا ي ولدي مع اني كان نفسي نعمل ليك عرس كبير ونفرح بس يلا لي خير ربنا يسعدكم،،ابتسمت وقلت ليها ان شا ء الله ي امي..خليتهم برتبو في الغرفه وطلعت مع الشباب، ،كنت عايز امشي لي ريان بس تاني غيرت رايي وقلت خلاص بم اني حاجيبا بكره م اتساغل وامشي ليها ،،حبيت اكون خفيف ظل م عايزا تمل او تزهج مني وخصوصا لانها اخر فتره نفسياتا م تمام!
ع لسان سماح:
خالتو ساره ضربت لي بم اني اقرب وحده ليهم علشان اجي اساعد ريان واجهز معاها حاجاتا،،قالو احسن تمشي بيت راجلا من هسه، ،فعلا العصر مشيت لي ريان كانت قاعده في غرفتها وماسكه اسكتش بترسم لم شافتني ابتسمت وقالت لي جايه تساعدي العروسه؟،،قعدت جنبها وقلت ليها ريان اذا م مقتنعه وافقتي ليه؟الموضوع د موضوع عمر، ،باقي عمرك كلو حتكوني معاه قادره تستوعبي الحاجه دي؟!..ختت الاسكتش ع جنب وقالت لي اهو حصل الحصل وخلاص، ،قلت ليها ده م موضوع مفروض تكوني فيهو بالبرود ده ي ريان،،قالت لي سماح الله يرضى عليك خلاص الموضوع اساسا انتهى،،م اتناقشت معاها تاني وابتديت ألم في حاجاتا وجات ريل وخالتو سوسن ساعدوني،،بعد م خلصت قلت ليها ريان انا حأمشي لم تفتحي تلفونك وتحبي تمارسي حياتك بصوره طبيعيه م تنسي تتصلي علي ودعتها وطلعت وانا من جواي زعلانه جدا ع الحاله الهي مدخله نفسها فيها دي
ع لسان ريان:
كنت لابسه عبايه وطرحه سودا عاديه، ،قاعده ومنتظره ماهر يجي يسوقني،،بالجد الدنيا م معروفه منو كان يصدق اني بين يوم وليله اكون مرت ماهر وزواجي يتم بالصوره دي،،ريل كانت قاعده جنبي وزعلانه، ،بعد مسافه ماهر جا داخل، ،قعد شويه وخالتي عملت القهوه اتونس معاهم وانا كنت ساكته، ،لم جينا علشان نمشي م قدرت اوقف نفسي من البكا،،ابتديت ابكي من اول جديد كنت ماسكه في امي وببكي، ،كانت بتقول لي ريان الله يخليك ي بتي كفايه،،بس،غصبا عني م كنت قادره يعني فجاه ابوي راح وفجاه اخلي امي وراي وامشي!..ريل برضو حضنتني وفضلت تبكي،،قاطعنا صوت ماهر وهو بيقول خلوها قاعده م حتمشي معاي،،حبوبه قالت ليه بسم الله ي ولدي كيف يعني م تمشي،،قال ليها خليها ي حبوبه اصلا م حتكون متطمنه وبالها حيكون مشغول بامها فخليها احسن،،امي قالت ليه كل يوم تدخل في الطريق كده ي ولدي؟ ..قال ليها م مشكله، ،حبوبه اصرت عليه يبيت بس قال حيجي يوم تاني ودعهم وكان طالع، ،امي قالت لي اطلعي،قدميه،،طلعت معاه قال لي مش اتفقنا انك لم تتزكري عمي الله يرحمه حتدعي ليه؟ البكا عمرو م كان حل، ،هزيت ليه راسي وانا ساكته،،ابتسم وقال لي يلا في أمان الله وختي في بالك انو حتى بعد م تمشي معاي م حامنعك من أمك في أي لحظة تحتاجي ليها حتلقي نفسك معاها ♥︎
