"اهتزَّ قلبي ل كلماتك، ،انا التي لا أُبالي 💜"
ع لسان ريان:
ختيت ايدي ع الباب علشان انزل وقفني صوت ماهر وهو بيضرب الدريكسون بايدو وقال لي بانفعال انت غبيه عمري م حاشوف وحده بغباوتك اسراء منو ي انسانه انا بحبك انت ِ ،،فضلت قاعده في حتتي من غير م اتلفت عليه،،جراني من ايدي وقال لي ساكته ليه؟ صح قبل شويه كنتي هايجه وعامله موضوع؟ هبله انت؟للدرجه دي م شايفه حبي ليك!..جاوبيني ساكته ليه مش كنتي بتقولي لي عيش حياتك واتكلم مع العاوز تتكلم معاها؟ شايفه لياتو درجه انا م فارق معاك ولا بهمك،،م حاولتي حتى انك تسأليني او تتدخلي ،،بس،الحياه البتقولي لي اعيشها واتكلم فيها مع العايز اتكلم معاها انا م شايف فيها غيرك،كنت منزله عيوني وم قادره اعاين ليه،،قال لي ريان بتكلم معاك انا ارفعي راسك عايني لي،،قلت ليه ماهر خلينا نرجع،،ضحك وقال لي اساسا م ح تتغيري ح تفضلي تهربي من اي حاجه ،،ح تفضلي عنيده ي ريان وهمك الاول نفسك وبس، ،ساق العربيه ورجع والطريق كلو انا قلبي بضرب من كلام ماهر، ،معقوله بعد ده كلو يطلع بيحبني انا؟!
ع لسان ماهر:
ريان ح تفضل بارده زي م هي،،مافي حاجه ممكن تغيرا وحتى انا فشلت في اني اخليها تحبني!..بعد كلامي معاها م اتغير حاجه غير انو التواصل بينا انعدم،،اي نعم في بيت واحد في غرفه وحده بس كل واحد منعزل عن التاني تماما،،م فاتحتني في موضوع الطلاق تاني واصلا م ممكن اطلقها في الفتره البسيطه دي،،بس اذا هي م مرتاحه معاي وحتكون مبسوطه بالقرار ده ف حاعمل ليها الفي بالها،،بقيت اتعمد اني اطلع كل يوم العصر حتى لو م عندي محل امشي ليه علشان اتجنب اني اقعد معاها ونفضل ساكتين كده،،في يوم جيت راجع لقيت يقين وميرو في الصاله،،يقين قالت لي شنو ي ماهر كل يوم مشاوير وطلعات؟ميرو قالت لي سوقنا معاك طيب ملينا من قعده البيت،،قلت ليهم ظبطو طلعه واطلعو عادي،،ميرو قالت لي ماهر في شنو؟ قلت ليها ولا حاجه وانا واقف كده ريان جات طالعه من المطبخ ف اتجاوزتها وطلعت الغرفه طوالي
ع لسان ريان:
انا وماهر بقينا باردين مع بعض شديد، ،او احتمال انا البارده م قدرت اقول ليه حاجه او بالاصح م عارفه اقول شنو؟..كنت مستغربه اصلا هو حباني كيف ومتين؟ماهر من م انا عرفتو وانا وهو في حاله اشتباك،،كنت بتكلم مع البنات وحكيت ليهم كالعاده،،مزن قالت لي ريان انا كلها يومين وجايه وحنتلاقى م عندي حاجه اقولا ليك خليني اصل وبنتخابت بس،،سماح قالت ي حليلك ي ماهر الله يعينك ع الهبله دي انت عارفه هو زاتو غلطان م لقى غيرك يحبها؟قلت ليهم انتو صحباتي ولا عدواتي؟نهى قالت لي انت عدوه نفسك ي ريان والله حرام عليك الود بيحبك في شنو تاني؟قلت ليهم يخوانا م عارفه انا م لي في الجو ده،،مزن قالت لي ده راجلك وبعلي من هبالتك ي ريان😭..قلت ليهم اها وانا اعمل شنو هسه؟سماح قالت لي هو عداه العيب اهتمام واهتم وحب وحباك جا دورك يعني، ،قلت ليها امشي واقول ليه انا بحبك؟ح يسفهني والله اساسا نحنا م بنتكلم مع بعض لينا فتره،،ياسمين قالت لي وعايزاه يتكلم يقول شنو ي مسيخه؟ نهى قالت لي يقول ليك بحبك وانت تفضلي،قاعده زي الكنبه حسبي الله في برودك ي ريان🙂. قلت ليهم خلاص م تحسسوني بالذنب زياده،،ياسمين قالت ي شابات ريان دي عواليقه والله المهم زي م قلت ليكم حسام جايب اهلو وجايين الاسبوع الجاي ف عاوزاكم تكونو معاي يعني،،قلت ليها من عنينا، ،مزن قالت ليها وااصلا انا حاكون جيت ومنو نتفاهم مع ريان دي،،ياسمين قالت جامد انتو بس تعالو
