"قدِس عُزلتك..وامنح بعضاً من الحُب ِ للعُتمة- لوسادتك -لجدران غرفتك وكل ما ساهم في تخبئة حزنك عن الاخرين .. ثم تباهى بانك جابهت كل تلك الصراعاتِ وحيدا 💛.."
ع لسـان ريل:
قاعدة بي ملل وانا بسمع في كلام البنات المعاي وهم بحكو عن اهلهم ..فيهم البتقول اختي سرحتني والبتقول امي متعودة تسرحني من زمان..م ابديت اي ردة فعل معاهم لحد م الترحيلات بدت تجي شوية وراشد وقف لي ودعتهم وركبت معاه..عاين فيني مسافة وقال لي مالك؟!قلت ليه باين علي يعني اني متضايقة؟ قال لي جدا يلا احكي.. قلت ليه مافي حاجة محددة القراية ضاغطة بس،،قال لي بس كدة؟قلت ليه اجلنعم مافي حاجة تانية،،قال لي ي زولة لو ع القراية هينة اليغلبك تعالي لي وانا بشرح ليك،،ابتسمت وقلت ليه طبعا اساسا حاجيك قال لي وانا تحت الخدمة ي جميل ♡!
وصلنا البيت ودخلت غرفتي ع طول كنت مرهقة وزهجانة،،اتدوشت وقعدت في سريري جا ع بالي موقفي مع ريان احتمال انا كنت اندفاعية زيادة عن اللزوم بس برضو احسن من نتعامل من غير نفس.. رقدت وانا بتذكر في كلام البنات اساسا من م امي اتوفت وانا م بتسرح غير وحدة لورا،،كنت معتمدة عليها في اي حاجة في حياتي لدرجة اني م بعرف اتسرح براي..م كنت خاتة احتمال في انها ممكن يجي يوم وتخليني وتمشي كنت شايفة الحاجة دي بعيدة ..م عملت حساب انو الموت بجي فجأة ومن غير استئذان.. كالعادة دموعي نزلت بغزارة وختيت راسي ع مخدتي وانا بحاول اضبط انفاسي..
ــــــــــــــــــــــــــــــــــــــــــــــــــــــــــــ
ع لسـان سماح:
اليوم كنت اوف وم عندي حاجة فاتفقت مع ريان تجيني البيت ونعمل موضوع،، من الصباح دخلت المطبخ عملت لينا بسبوسة ظريفة وجهزت عصير وريان. قالت جايبة معاها الشيبس والحاجات ..دخلت استحميت وغيرت ببجامة مريحة كدة لحد م ريان وصلت شغلنا فيلم وقعدنا نتونس..قلت ليها اها ي بنتي الحاصل شنو تاني قالت لي والله ابوي قال حيجي الاسبوع الجاي ف حاعمل فيها ظريفة واجاملو يومين وبعدها ماشة لي خالتي وحبوبة،،قلت ليها يومين؟!!كتار زاتهم عليك الله نقصيهم عاينت لي وهي ماسكة كيس الشيبس في يدها وقالت لي بتتريقي صح؟!!قلت ليها م هو م ممكن اخليك بتتمسخري كدة براك قال يومين قال،،قالت لي سماح اطلعي من دماغي ياخ اكتر من كدة م عندي حاجة..فضلت اعاين ليها وقلت ليها اها طيب م فكرتي في كلام لمى وريم؟قالت لي بخصوص الشغل يعني!قلت ليها اي ي بت قالت لي م فكرت والله واساسا النية م واصلة ي زولتي ..من كتر م اتغظت منها شلت المسند خبطتها وبقيت بصرخ عليها بصوت عالي انتِ انسانة مستفزة ع فكرة يخرب بيت ابو برودك ي شيخة ،،رمت المسند من يدي وهي ماسكة صحن البسبوسة وبتقول اممممممم رهييييبة جدا البتاعة دي
حقيقي يعني ريان دي اكتر بني ادم بتستفزني وبتوتر اعصابي!!
ــــــــــــــــــــــــــــــــــــــــــــــــــــــــــــ
ع لسـان لمى:
اليوم كان ضاغط ومتعب جدا في الشغل احيانا كتيرة بتف ع نفسي اني قبلت اقرا اقتصاد واجي اشتغل في شركة عيلتنا دي ..يعني الشغل كله ع راسي انا وعلي واحمد وابوي وعمي بجونا من مرة لمرة ..طلعت ع الكافتريا وانا مصدعة وزهجانة وقافلة معاي طلبت قهوة وقعدت تلفوني بقا يضرب وكانت ريم..رديت عليها بـ خييير! قالت لي الاخت منفسنة ولا حاجة؟قلت ليها جدا والله ها انجزي عايزة شنو؟قالت لي قاطعة موضوع بس وحبيت اشوف الشغل معاك ماشي كيف وبعدين منفسنة مالك؟قلت ليها الشغل كتير ياخ وصدعت،،قالت لي استكيني خلاص الدوام قرب ينتهي وبعدين ود عمو ابراهيم د نزل شغل معاكم؟ قلت ليها لسه بس حينزل وشايفة احمد بقول زول رسمي وطبعو صعب كاننا كنا ناقصين صعوبة م كفاية علي واحمد،،بقت تضحك وقالت لي ي زولة نتفاهم بعدين يلا سلام،،قفلت منها وخلصت قهوتي دخلت المكتب وانا بتثائب ونعسانة جدا،اول م قعدت لقيت نوت ملونة صغيرة مكتوب عليها"يخرب بيت ابو الشغل الخاليك ماشة ووشك حيقع منك كدة..ابتسمي ي جميلة المبسم ♡"
تلقائيا بقيت بضحك اساسا مافي حد حيكتب الكلام دة غيرو❤️ ..
