" شعور سئ للغايه ان تتحول من دور الضحيه للمذنب فجأه!!"
ع لسان ريان:
وقفت فحتتي وانا بعاين لي رامي ودموعي نازله،،راشد جا قال ليه كيف يعني انت كنت عارف؟ريل جات قالت وليه نحنا م عندنا خبر؟!..حصلت لحظه صمت رهيبه والبكا كان فارض نفسو بصوره سيئه جدا، ،رامي شال نفس وواصل كلامو وقال انا م كنت ماخد في خاطري من ريان ساي،،ونحنا صغار وقبل كم سنه سمعت ابوي وامي بيتكلمو في الموضوع ده انو ريان جافيه مع ابوي ومفتكره انو بعد عنها بي رضاه،،امي كانت متعامله مع الموضوع عادي وقالت ليه حتتصافو في يوم باذن الله في النهايه انت بعدت بي سبب مرضك..لم دخلت عليهم اتخلعو واصريت اعرف الحاصل فابوي قعدني جنبو وحكى لي، ،الفتره الكان حبوبه مريم مصره ع امك تخلي الشغل هنا وتسافر السعوديه مع ابوي كانت هي فتره مرض ابوي وابوي كان رافض انو يجيب ليكم سيره المرض الا لم يتاكد انو حيتعالج فكان مكلمكم ع انكم حتسافرو ساي وبعد يبدا العلاج كان عايز يوريكم فلم خالتو ساره م رضت تخلي شغلها م كلما ،،وحتى قال لي انو كان يائس،من العلاج وكان مفكر انو يخليه لكن حبوبه اصرت عليه انو يتزوج امي ويسافر يتعالج فم كان قدامو الا انو يوافق ..ولحسن الحظ عمليتو نجحت فبقى م عندو طريقه يجي راجع ليكم بيها ويقول شنو؟وكيف يقدر يخلي امي الساندتو ووقفت معاه!! وخصوصا انو امك كانت شبه طلعتو من حياتا..قعدت في اقرب كرسي وفضلت ابكي،،وكذلك امي كانت مقهوره ودموعا نازله وع طول اتحركت من جنبنا،،ونحنا في حتتنا جو ناس حبوبه واعمامي وكل العيله تقريبا ملت المستشفى! !
ع لسان ساره:
اتحركت ع غرفه العنايه الجواها محمد، الدكتور رفض اني ادخل بس بعد اصرار مني وافق وقال لي م تتاخري،،انت دكتوره م محتاج اوصيك،،هزيت ليه راسي ودخلت،،محمد كان راقد ومغمض عيونو لونو شاحب والتعب باين عليه،،قعدت جنبو وانا دموعي ماليه وشي،،كل السنين دي وانا عامله فيها اني المظلومه؟طلعت انا الانانيه والظالمه،،بس م انا م كنت عارفه هو ليه م صارحني ليه م قال لي كنت خليت اي حاجه وراي ومشيت معاه،،طلعت من الغرفه وانا ببكي م قدرت اقعد اكتر، ،اتحركت ع محل الاولاد ولقيت كل العيله متلميه،،مشيت ع خاالتي مريم وقلت ليها ليه ليه عملتو كده؟ليه م وريتوني من زمان؟م هو انا م انانيه لدرجه افضل شغلي عليهو ليه عملتو كده ليه؟!!كانت بتبكي وقالت لي ده طلب محمد هو الكان عايز كده ي بتي،،ريان جات علي ومسكتني قعدتني في واحد مني الكراسي وهي لنفسها محتاجه حد يسندها،،حاله محمد م مستقره وم معروف حيحصل شنو لانو داخل في كومه "غيبوبه"!
ع لسان ماهر:
واقف في المستشفى وبعاين لي ريان وهي بتبكي،،قلبي واجعني عليها جدا نفسي لو في اللحظه دي اقدر اضمها واخفف عنها،،وبالي مشغول مع عمي محمد الساعه بقت 10 م ،،ولسه م منو خبر..علي قال حيرجع حبوبه مريم وجدي عبد الماجد والباقين ويجيبهم الصباح،،كلهم كانو معترضين بس القعاد م حيفيد بي حاجه ،،احمد قال لي نوصل ديل وانا حاجي راجع. قلت ليه تمام انا حانتظرك،،فضلت قاعد مع ريان وامها واخوانا،،خالتي ساره قالت لي ماهر م تتعب نفسك ي ولدي امشي وتعال الصباح،،قلت ليها لا ي خاله م فيها تعب انا واحمد حنفضل معاكم هو جايي راجع،،قالت لي ربنا يديكم العافيه،،بعد مسافه احمد جا وفضلنا قاعدين، ،احمد قال لي لسه م في خبر؟قلت ليه لسه والله في الغيبوبه،،فضلنا صاحين للاذان. كل شويه بعاين لي ريان كانت ماخده ريل فحضنها نامو شويه وريان فتحت عيونها، ،واضح انو بالها مشغول وم قادره تنوم واصلا كلنا كنا شايلين هم.الصباح جو ناس حبوبه والباقين ولسه م في اي جديد! !
