"Meeting friends and talking with them are nice things that make our day 🖤!!"
في كافيه وفي قعدة لطيفة ..كانت ماسكة كباية النسكافيه وبتتكلم بانفعال ..تخيلو قال لي خلي امور الواسطات؟!كائن غريب واستفزازي جدا ..سماح قالت ليها وحلو كمان ..حمرت ليها وواصلت كلاما وقالت نزلت مع العمال اول يوم واهو مواصلة في الدوام وعموما كدة الحكاية ظريفة..نهى قالت ليها بعيدا عن ماهر الانت م طايقاه دة لكن حلو جدا انك اتاقلمتي وعملتي لنفسك موضوع..سماح قالت انا م عارفة كيف بني ادم بالحلاوة دي م ينطاق م شفتو الطول والقوام والاستايل ولا اللحية! تبارك الرحمن حلو حلو يعني..ريان قالت ليها الحالة انك شفتيه مرة وحدة ي مهزئة بطلي تنبرشي كدة ..قعدو يضحكو وبعدها ياسمين ابتدت تحكي عن حكاية حسام وعن ردة فعلو لم اتكلمت معاه.. نهى قالت ليها انت عملتي العليك وهو غلط في كلامو بس احتمال عندو مبرر اسمعيه..
ريان قالت ليها م عارفة بس انا شايفة رد فعلو طبيعي يعني فجاة زول يعرف انو هو مدمن وبتاع مهدئات ويحاول يناقشو اكيد حينفصم فيه واحتمال يكون في قصة ورا الموضوع فرايي انك اسمعي القصة منو..مزن قالت ليها اقعدي معاه واسمعيه اساسا هو بيكون وصل للحالة دي علشان م لاقي حد يتكلم معاه ..سماح قالت وانا رايي من رايهم اسمعي منو عايز يقول شنو وحاول تخلصي من السكة دي..
ياسمين ابتسمت ووقفت ع حيلها وقالت طيب حلو حاتكلم معاه،،وهسة قومو خلونا نجهز حاجات العروسة الحلوة دي ♡
اتحركو وهم بيتونسو ويضحكو ..وقفو في كذا حتة واتجادلو في كذا حاجة لحد م خلصو كانت الساعة حوالي 4 وحاجة ..اخر حاجة دخلو مطعم اتغدو فيه وبعدها رجعو🖤..
ــــــــــــــــــــــــــــــــــــــــــــــــــــــــــــ
ع لسان ياسمين:
من لم رجعت من البنات وانا بفكر في حسام حتكون قصتو شنو؟!..بالليل كنت قاعدة مع اهلي في الصالة وبنتونس فجاة تلفوني بقا يتصل عاينت ليه وكان حسام..اتسحبت من الصالة وطلعت غرفتي رديت عليه..
قال لي ياسمين م حترضي تتكلمي معاي وتسمعيني؟ م كان قصدي اتعصب معاك في الكلام اديني فرصة اشرح ليك..
قلت ليه تمام ي حسام حنتكلم بكرة ..قال لي تمام للصباح طيب ..
نمت وصحيت بدري م عارفة ليه الموضوع شاغلني كدة بس حسام م يستاهل انو يواصل في الطريق دة ..لبست بسرعة ونزلت شربت الشاي واتحركت ع المستشفى..في الطريق حسام اتصل وقال لي زي م قلتي المستشفى م مكان مناسب للنقاش عازمك قهوة في" " تعالي نتكلم وبعدها نتحرك ع المستشفى
وصلت ونزلت لقيت حسام قدام عربيتو منتظرني ..سلمت عليه وقعدنا جنب ست شاي ظريفة كدة جابت لينا القهوة وهي بتتبسم ساي..قعدنا مسافة بعدها حسام قال لي
ابوي كان انسان صارم جدا ..عندو اي حاجة لازم تمشي برايو كان بعاملني وكأني بت م في تأخير برة البيت م في طلعة الا باذن ..واذا خالفت رايو كان مصيري اني اتضرب واتحبس في غرفتي..امي م كانت بتقدر عليه لانو لو اتكلمت كانت بتتضرب هي زاتا..عشت طفولة كئيبة وكلها قمع وكبت رغبات وابوي كان شايف انو كدة صح وانو كدة حيطلعني مؤدب وواعي..بس للاسف هو السبب الاساسي في تدميري ..دخلت الجامعة وباريت شلة م كويسة عودوني ع الحبوب والمهدئات ..أبوي مات وهو مفتكر انو كان صح وانو عرف يربي ،،عارفة م قدرت ابكي عليه لم مات؟بالعكس حسيت اني ارتحت منو ..امي بعد موت ابوي عرفت اني بتعاطى وزعلت جدا وقتها وحاولت معاي علشان ابطل وقدرت تخليني أبطل واعيش،معاها عادي كنت مبسوط بوجود امي واننا ماخدين حريتنا عادي لحد م هي ماتت كمان ..موت امي كسرني ي ياسمين م قدرت اتحملو فرجعت لحياتي القديمة تاني..انا م مبسوط بالبعمل فيه وعارف اني غلطان بس م قادر اتحمل وجع قلبي فباخد الحاجات دي علشان انسى ..
