ع لسان ميرو:
كنت في الصاله بتاعتي، ،جاتني البت الاسمها نادين اتونست معاي شويه وقالت لي م عملتي ايفنت ليه ياخ؟..قلت ليها الايام دي اموري م ظابطه والله لحد فتره كده لي قدام ممكن اعملو،،قالت لي طيب تمام زي م قلت ليك اديني خبر،،قلت ليها باذن الله،،وانا هناك ماهر اتصل لي قال لي حتمشي لي ريان الليله؟ !.. قلت ليه ايوه حتجي معانا؟قال لي اي حامشي، ،قلت ليه طيب تمام وقفلت منو،،ماهر ع قدر م هو مستفز وسغيل الا انو حنين جدا،،احتمال ريان لانها علاقتا بيه من الاول م كانت كويسه ولانها حاليا في وضع صعب م قادره تشوف خوف ماهر. وحبو ليها ،،بعد م رجعت من الدوام غفيت شويه وصحييت للغدا،،خالتي امنه قالت لينا حاولو مع ريان دي خلوها تطلع من غرفتا دي وتتكلم مع الناس، ،قلت ليها باذن الله ي خالتي ..بعدها طلعنا انا ويقين وماهر ع بيت ناس ريان، ،لقينا خاله ريان وامها ومعاهم سناء وحبوبه مريم،،سلمنا عليهم وقعدنا حبوبه مريم قالت بركه الجيتو اطلعو لي ريان دي ي بنياتي، ،وفعلا قمنا انا ويقين وطلعنا ليها ،،قعدنا جنبها،،قلت ليها ريان كيفك ؟...هزت لي راسا من غير م تتكلم، ،قلت ليها قريب ال 3 اسابيع حتفضلي،محبوسه في الغرفه دي؟ريان اتكلمي طلعي الجواك انت كده بتاذي نفسك بتاذي الحوالينك، ،فضلت اتكلم معاها كتير بس رفضت تتجاوب معاي ،،طلعنا انا ويقين وقلنا ليهم م راضيه تتكلم،،ماهر قال ليهم ي جماعه حنعمل العقد الاسبوع الجاي كلمو ريان،،ولو عندها اعتراض،خليها تتصل علي، ،حبوبه مريم قالت ليه الله يديك العافيه ي ولدي،عمك م غلط لم اختارك..
ع لسان لؤي:
قاعدين انا وريم وعلي ولمى واحمد مع جدي عبد الماجد،،كان بيقول الحمد لله م غالي ع ربو،،كلنا عارفين انو موجوع بس زي م قال م غالي ع ربو،،ونحنا قاعدين كده جو عم ابراهيم ومعاه ماهر،،سلمو علينا وقعدو،،عم ابراهيم قال لي جدي ي عمي عايزين ننفذ كلام محمد الله يرحمو ونعقد لي ريان وماهر،،جدي قال ليه انا م عندي مانع ي ولدي بس راي الاولاد شنو؟ماهر قال ليه انا موافق ي جدي، ،باقي يكلمو ريان بس،،الحاجه الانا مستغرب فيها انو ليه عم محمد اختار ماهر وليه ماهر مُصر ينفذ كلامو؟!..بعد م ناس ماهر طلعو جدي دخل غرفتو يرتاح،،قلت ليهم انتو ي شباب انا م فاهم حكايه العرس الفجاه دي!..لمى قالت لي م عارفه عمي الله يرحمه.قال كده ليه، بس باين انهم عايزين ينفذو كلامو،،ريم قالت اذا اصلا زواجهم مبني ع القرار ده من غير م يكون في تفاهم بينهم م اعتقد في داعي،،احمد قال م عارف بس احتمال عمي شاف في ماهر انو ممكن يكون سند لي ريان وكأنو قلبو كان حاسي انو ح يموت فعايز حد يقيف مع ريان، ،علي قال كلام احمد هو الصح ولو اني اعتقد انو كمان ماهر بيحب ريان بحسو كده ملهوف عليها وخايف القصه م انو بس عمي اختارو !..
ع لسان ريان:
نزلت من غرفتي لاول مره لانو راسي كان حيتكسر من الصداع، ،كل يوم امي كانت بتجيب لي القهوه في الغرفه بس الليله م جابتا،،حاولت اتجاهل الصداع وانوم بس م قدرت ف نزلت ع طول،،لم وصلت الصاله لقيت امي وخالتو سوسن وحبوبه مريم،،امي قالت لي الا نجبرك بالقهوه يعني علشان تجي نازله؟!. م اتكلمت واتحركت ع المطبخ علشان اعملا وقفني صوت خالتو وهي بتقول تعالي القهوه هنا،،مشيت عليها علشان اشيل كبايتي واطلع لكن هي قعدتني جنبها،،وقالت لي ريان لا الاه الا الله!..مبسوطه من نفسك وانت بالحاله دي؟!.امي قالت لي تخلينا نشيل همك ونحنا اصلا الفينا م شويه مرتاحه كده؟ وابتدت تبكي،،ع طول دموعي نزلو، ،مشيت عليها واترميت في حضنها، ،قلت ليها بس انا م قادره اصدق انو ابوي مشى خلاص اني م حاشوفو تاني.. كلنا بقينا نبكي من اول جديد، ،وقتها عرفت انو كلنا م اتجاوزنا م في حد نسى بس هم بيصبرو في نفسهم،،حبوبه قالت لي طيب ي بتي ريحي ابوك ووافقي ع كلامو اتزوجي ماهر ود عمك،،قمت من حضن امي وقلت ليها هو ليه ابوي عمل كده؟ليه قال اني اتزوج ماهر،،احتمال الولد م موافق حافرض نفسي عليهو؟!..حبوبه قالت بالعكس ماهر م عندو مانع ي بتي وقال لو رضيتي يعقد الاسبوع الجاي،،م عرفت ارد ب شنو او اقول شنو،،امي قالت لي انت م راضيه؟ ماهر شاب كويس جدا،،من جواي م كنت موافقه بس،بم انها رغبه ابوي قلت ليهم اعملو الشايفنو مناسب وطلعت غرفتي اساسا م في حاجه ح تفرق معاي تاني
