صحيت بعد مدة طلعت من المشتل وكان واضح انو الظهر اذن عاينت في الساعة وكانت ماشة لي وحدة وحاجة..دخلت غرفتي صليت ورقدت نمت تاني..صحتني امي للغدا ونزلت معاها لقيت اخواني قاعدين حولين الصفرة ..قلت ليهم سلام وهم ردو علي وقعدت وبديت اكل..كنا ساكتين لحد م امي قالت شنو الهدوء دة؟م من عوايدك ي ريان تقعدي هادية كدة وانتو برضو م تتحسسو البيت بيتكم ودي اختكم ع فكرة مافي زول غريب.. رامي عاين لي وقال ليها لا ي خالتي م متحسسين ولا حاجة..قالت لي اها وانتي ي ريري ساكتة مالك؟قلت ليها مافي حاجة ي سرو..عاينت لينا كدة وقالت انا م نفسي تحصل بينكم مشاكل ولا تتحسسو من بعض وانتو كلكم كبار وعاقلين وفي النهاية انتو اخوان حاولو حبو بعضكم ..راشد قال ليها حاضر ي خالتو سارة م تشيلي هم انتي ..انا اكتفيت باني ابتسم بس وواصلت اكل عادي ..بعد خلصنا ريل المرة دي لمت معاي الصفرة واصرت انها تغسل العدة فخليتا تغسلها وانا عملت الشاي لم طلعنا لقينا امي ورامي وراشد قاعدين في الصالة وبيتونسو ختيت الشاي وكنت حاشيل كبايتي والف غرفتي لولا نظرة امي الخلتني اقعد..يعني انا كدة تلقائيا زول م بحبني م بحاول اقعد معاهو وبتهرب من اي مكان يجمعني بيهو وامي عارفة الحتة دي كويس وبرضو بتصر علي اني اختلط معاهم..
عصرت ع قلبي وقعدت وبقيت بشرب في الشاي وانا ساكتة وهم بتكلمو مرة مرة لحد م سمعت صوت تلفوني بضرب في المطبخ م صدقت وقمت وانا في سري بشكر البني ادم الانقذني من الموقف دة
وصلت المطبخ وشلت التلفون واتنهدت براحة لم لقيت المتصلة ياسمين ..رديت عليها بي سيما ي سيما.. قالت لي ريري السمحة ادخلي في الكول الجماعي دة..بعد مسافة اصوات البنات كلها اتداخلت وانا شلت نفسي وطلعت غرفتي وبقيت بتونس معاهم..🖤
ــــــــــــــــــــــــــــــــــــــــــــــــــــــــــــــــــــــــ
ع لسان محمد:
من اخر مرة اتكلمت فيها مع سارة وانا مخي جايط .. كان همي اني انهي كل الاجراءات البتخليني انقل شغلي وارجع السودان باسرع وقت والقى طريقة اتقرب من بتي واحنن قلبها علي وعلى اخوانا .. هي مفتكرة انو انا م بحبها وعلشان كدة اتخليت عنها وهي صغيرة .. بس ابدا الحكاية م زي م هي شايفة وم زي مصور ليها عقلها ..رفعت تلفوني واتصلت ع ابوي وحكيت ليه اني جاي راجع خلاص قال لي قرار سليم ي ولدي تعال ولم شمل اولادك .. ومنو نتلم كلنا اصلا ابراهيم ود عمك زاتو جا راجع من بريطانيا وتقريبا حيوسعو الشركة تبع العيلة ي ولدي.. قلت ليهو كويس جدا ربنا يسهل بس ❤️
ــــــــــــــــــــــــــــــــــــــــــــــــــــــــــــــــــــــــ
ع لسان ريم:
كنت قاعدة في الصيدلية بي ملل ومنتظرة لؤي يخلص دوامو ويغشاني علشان نتحرك ع البيت سوا..بعد حكاية 5 دقايق كدة اتصل علي وقال لي ي حلو اطلعي انا منتظر برة.. قفلت التلفون وطلعت ركبت معاه .. قلت ليهو دة شنو التاخير دة؟انا جعت شديد ع فكرة..قال لي ي قلبي انت مفروض تكوني اكتر واحدة فاهمة انو مجالنا دة ضاغط بصورة م طبيعية يعني في اخر لحظة جاني بيشن وم قدرت اخليه واطلع ..قلت ليه عارفة والله بس انا اساسا متنشنة حبتين،،قال لي ليه ليه؟ تتنشني وانا معاك ي شيخة حرام عليك..بقيت اضحك وقلت ليه م القصد فجاة وقف بينا في مطعم وقال لي انزلي خلينا نتفاهم..فعلا نزلنا وطلبنا غدا وقال لي احكي انا سامعك.قلت ليه م عارفة بس متضايقة من وضع عيلتنا حبتين يعني حبوبة ليها كذا يوم بسمع فيها انها نفسها تصلح علاقة ريان معانا قبل م تموت..وانت عارف م بحب سيرة الموت دي ابدا ومن جهة تانية ريان شاغلة تفكيري ..نفسي اتعامل معاها باريحية زي الباقين عارف قبل كم يوم لمى كانت بتوريني في فساتين وقالت نعملهم للشباين في عرسي وكنا عادين ريان معانا مع اني واثقة انها حتجي زي الغريبة في اللحظة الاخيرة زي م عملت في الخطوبة تادية واجب وبس
ابتسم وقال لي كلو بهون وكل حاجة حتتصلح المسالة مسالة وقت وبس ..بطلي تتنشني بنفسك ساي وليك علي لم العرس يجي اخلي. ريان تجي وتقعد معاك اسبوع انتي بس افرديها💛..
ــــــــــــــــــــــــــــــــــــــــــــــــــــــــــــــــــــــــ
ع لسان ريل:
طول عمري كنت بحس بالوحدة وسط اخواني كون انو انا بت وهم اولاد..كانو بطلعو سوا ويجو سوا وانا الكنت براي ..امي هي الكانت بتحاول تخليني م اركز مع الموضوع وحتى ابوي كانو بطلعوني هم ومدلعني هم علشان م احس بالملل بس انا كان نفسي يكون عندي اخت بت.. بعد م امي ماتت اخواني حاولو م يخلوني وحيدة حاولو بقدر م يقدرو ولسه بيحاولو انو يخلوني مبسوطة وم احس بفراغ امي وفراغ اني محتاجة اخت معاي..بس انا كل م اشوف ريان وامها قلبي بوجعني م حسد ولا غيرة ابدا بس انا برضو نفسي امي تكون معاي نفسي لم ابكي تضمني وتمسح دموعي ..الحاجة المانعاني من ريان انو واضح انها م بتريدنا وفعلا كلام رامي صح هي جافية مع الكل وحتى مع ابوي ..ف م حاعرض نفسي للاحراج واحاول اتصاحب معاها ابدا ..احيانا لازم نرضى بواقعنا ونعيشو زي م هو حتى لو ماكان على هوانا💔
ــــــــــــــــــــــــــــــــــــــــــــــــــــــ
ع لسان سارة:
م قدرت اسأل ريان الحصل شنو وليه م اتكلمت مع ابوها..اخر فترة بقت حساسة بزيادة وانا م بقدر الوما..رامي جا وقال لي انو قبل ينزلو جامعة وكدة حابين يمشو لي ناس جدهم تاني فاتفقنا نمشي ليهم في نفس اليوم بالعصر ..اول م عرضت الكلام ع ريان اتهربت من الموضوع وقالت لي انها حتطلع مع البنات ..مشيتا وانا عارفة كويس انها هي الحتخترع الطلعة ع البنات علشان م تمشي معانا..خليناها في البيت وطلعنا وريل كان باين عليها انها متحمسة جدا ..علاقتهم معاي م سيئة حتى لو كان فيها بعض الرسمية بس برضو احسن من علاقتهم بريان ..وصلنا البيت ونزلنا والكل سأل من ريان .اعتذرت ليهم ووريتهم انها طالعة مع صحباتا بس من نظراتهم ممكن اعرف انو هم عارفين انها بتتهرب منهم..قعدنا والونسة ابتدت والاولاد كانو مبسوطين مع اولاد عمهم وريل كانت بتتونس مع لمى وريم..عمي عبد الماجد جاب سيرة انو محمد حينزل السودان وانو ابراهيم والي هو ود عمو لي ناس محمد برضو جا من بريطانيا ليهم كم يوم وعاملين عزومة وطلب مني اجي واجيب معاي ريان والاولاد..طول القعدة تفكيري كان مشغول بمحمد الجاي م زعلانه منو لانو م جاب لي سيرة انو جاي اصلا من زمان بطلت اهتم بتفاصيلو وبعد اخر مكالمة دارت بينا حيعمل الف حساب قبل يتكلم معاي تاني..بس شايلة هم ريان وتعاملا معاهو حيكون كيف؟!تعبت وانا بحاول اخليها تتعامل بطريقة عادية مع اهلها بس بتي وانا بعرفها عنيدة وعنيدة جدا !!
