ع لسان ريان:
فضلت واقفة فحتتي وبعاين لامي باستغراب،،راشد جا علي ومسكني من اكتافي دموعي كانت نازلة وم قادرة استوعب انو حبوبة اسيا مشت..راشد ضماني عليه وقال لي البركة فيكم اتصبري ي ريان ..قلت ليه بتمتمة يعني م حاشوفا تاني؟هي م اتفقت معاي كدة قالت لي حتجينا تاني دي امي الربتني ي راشد 💔 ..فضل ضاميني وبيصبر فيني بعدها امي جات علي وحضنتني فضلنا قريب ال 10 دقايق بنبكي ..رامي وريل جو عزونا وابوي قال اجهزو ي ريان وسارة علشان نتحرك..امي مسحت دموعا وقالت لي اجهزي ي ريان ربنا يرحمها ويغفر ليها.. دخلت غرفتي واقرب عباية لبستها ..ركبنا مع ابوي واتحركنا طول الطريق كنت شبه مصدومة امي فضلت تقرا قران بس انا ابدا م كنت واعية لي حاجة احساس انو امك الربتك وعشت معاها كل تفاصيل طفولتك تختفي فجاة كدة..معارفة زاتو وصلنا كيف ولا متين بس اول م وصلنا كان في ناس كتيرة جنب البيت دخلنا لقينا الجثمان جاهز ..خالتو سوسن مسكت امي وفضلت تبكي وتقول ليها فاتت الحنينه ي سارة فاتت وخلتنا ..تلقائيا دموعي جو جاريات خالتو سوسن جات وحضنتني وفضلنا نبكي.. بعدها ساقتنا علشان نودعا للمرة الاخيرة م قدرت اتحمل لم شفت منظرا مكفنة وتلقائيا جيت واقعة وفقدت الوعي 💔..
ع لسان ريم:
كنت في المطبخ بعمل لي في قهوة .. لمى فجاة جات داخلة ..قلت ليها صباح الخير ي شابة مالك في حاجة؟!..
قالت لي صباح النور في انو حبوبة ريان ام امها اتوفت. قلت ليها لا حولا ياخ متين الكلام دة!..قالت لي عمي محمد هسة اتصل وكلم ناس ابوي.. قلت ليها ربنا يرحمها ياخ اها ريان كيفا؟قالت لي والله عمي محمد قال تعبت شوية وداخت م قدرنا نتكلم معاها.. قلت ليها قلبي وجعني عليها والله هي متعودة عليها شديد..قالت لي اي ياخ من صغيرة معاها ربنا يصبرا غايتو. انا بحاول اتصل ليها من الشغل وانت زاتك حاولي..قلت ليها تمام..طلعت وخلتني واقفة..
تفكيري كان مع ريان اكيد حتكون موجوعة وخصوصا انها كانت مايلة لحبوبتا دي شديد
ع لسان لمى:
ركبت مع علي ووصلنا الشركة من م دخلت المكتب بحاول في رقم ريان بيديني مغلق..علي جا داخل وهو شايل القهوة في يدو..قلت ليه ي حليل ريان كنت بشربا معاها.. قال لي كلها كم يوم وحتجي ..ها رقما م دخل معاك؟!.. قلت ليه لا لسه مغلق قال لي اتصلي لي خالتو سارة طيب..قلت ليه خالتو سارة م كانت بترد لكن حاجرب تاني،،اتصلت ليها ردت علي بعد مسافة عزيتها وسالتها من ريان قالت لي والله ي لمى متاثرة شديد لكن هاك ليها ..ادتني ليها وصوتها كان منتهي عزيتها وقفلت ع طول..علي قال لي حتحتاج وقت علشان تتعود يلا انا حامشي بعد كدة وحأمر على ماهر اديه خبر انو ريان م حتجي وكدة..قلت ليه اي احسن من يتصل ليها ويعمل موضوع وهو مافاهم ..قال لي لا م تخافي حامشي ليهو هسه .. بعدها طلع وخلاني في المكتب..اليوم مر كئيب من غير ريان وحركاتا ..م عارفة حاقعد باقي الايام كيف!
