المخلص "باللهجة العراقية "

البارت الثالث والثلاثون

المخلص..
البارت الثالث والثلاثون..
بقلمي رسل..
rasolaa7

انستا Rasolaa7

تعـال إتمـرجح بروحي
أجيبن خلگ ما متعوب
أناغيـك بطواريـَّه
وأصوغَن من ثگل آهي
ضحكة تعـآند آه الناي
تكتـل كل نواعيـَّه..

-من الملل رجعت غفيت وما فزيت الا على صوت يرعب جمدت بمكاني وهو طفر على حيله الشعر مخربط والعيون جاحظه فتح الباب بسرعه واسمع
صرخة ليلى واصوات هوسه وبجي.. علي الحك
كتلوا كرار بس هالكلمه ضلت تتردد ابالي خليت ايدي
على اذاني ودموعي تنزل ما اريد اسمع شيء كافي
قهر كافي اتهسرت واردد بس كافي..

-اسمع الاصوات بجي وهوسه وما اكدر احرك روحي
واكوم دخلت بنت خالهم تبجي عفيه كومي رجلج تخبل
على اخوه ما ضل عنده حيل يشيله..

-لزمت الحايط وكمت كوه اسحل بخطواتي واصواتهم
ترعب طلعت بره واشوف هوسه ناحيه البستان ركضت عليهم وعلي فاقد يتوسل بكرار يكوم جيرانهم
يصبر عليه ومتصل بالاسعاف وعلي فرفحت روحه
وكل اقارب بيت خالهم ملتمين..

-منظر رجعني للمستشفى لذاك اليوم الي ما ينمحي ولا راح ينمحي بيوم هالمنظر ذكرني بالدكتور الي نكتل
هيج جان غارك بدمه وهيج جان حال الناس صراخ
وملتمين شلون يعني ما نرتاح ما كافي من هالمشاهد
الي تنعاد وين ما نروح ما كافي جروح بهالبلد الي من جهه حروب ومن جهه صاير غابه من داخله وواحد يغدر بالثاني..

-كعدت يمه واستجمعت قوتي الله يلعن دا..عش الي كسرني هذا شغلي هذا ما مفروض انهار تقربت على
علي همست.. فدوه قوي حالك خاله راح تموت شوف حالها الخاطرها قوي حالك لا تزيدونها عليها اخوك محتاجك لا تضعف..

-باوعلي وعيونه مدمعه وايده ترجف.. كرار راح يروح من ايدي يحجي ويرجف شفافه يابسه وروحه مفرفحه..

-بعدته بدون ما احجي شيء واخذت دور الممرضة مديت ايدي على نبضه وتنهدت مرتاحه النبض طبيعي بس الي يخوف الرصاصه بالظهر ووحده بالكتف الرجال الي جان واكف جان مخلي شماغ على كتفه باوعت عليه عمو انطينياه هذا الشماغ..

-هو بسرعه نزعه اخذته منه وضغطت على الجرح بس ظهره تركته اخاف اقل حركه يروح ينتهي وتاثر عليه ضغطت وحسيت ايدي انترست دم ووصلت الاسعاف الي مطولت هواي رفعته وياهم والتفتت على علي الي هز راسه جاي وراكم اخويه امانه بيدكم..

-هو طلع وراهم بسرعه واني ويا وتركنا ورانا خاله وليلى حالهم يبجي الصخر بس علي ما قبل خاله تجي والطريق كله ادعيله بس كون ما ضربت العمود الفقري ياربي بعده شاب ومرته منتظرته الطف بحاله يارب..

علي بقهر.. نورا بي امل احجي بروح اهلج كلبي راح
يوكف ياربي من عافيتي وحيلي لكرار ربي لا تفجع
كلبي بحزام ظهري..