المخلص "باللهجة العراقية "

البارت السادس والثلاثون

المخلص..
البارت السادس والثلاثون..
بقلمي رسل..
rasolaa7

انستا  Rasolaa7

والفرح طر المدينة وانطة للناس التريدة
دگدك البيبان كلها ومن وصلنة انشلت ايدة
اخ ياحزنك يگلبي جمرة مضمومة بجريدة..

-يومين واول ما اجه بعده حتى ما مرتاح وندكت الباب
بقوة وصوت بجي وصياح كام فتحه ودخلت شذى الي
اول مرة اشوفها بهيج حاله الشعر طالع والوجه مليان
دموع حالتها تكسر الخاطر لزمت ايده وتبوس بيها..

-ابوس ايدك ما عندي غيرك ابوس ايدك رجعلياهم
ما اكدر والله العظيم ما اكدر اعيش بدونهم اخذهم مني
اخذهم وراح ماكو لا هو ولاهم فرح كلبي بيهم يا خويه
اخذهم مني..

-اتنفسي يمعودة بس اتنفسي راح تموتين التفت عليه.. زمرد كلاص مي بسرعه..

-ركضت للمطبخ جبت مي ورجعت وهي منتهيه من البجي اول مره اشوفها بهيج حال هاي ام السان الي ما يهمها شيء وماخذه الدنيا بلسانها اليوم هيج مكسورة
ودموعها مغركه وجهه كوه تحجي نص كلامها ما مفهوم من حركة كلبها..

-اخذ مي بيده وغسل وجهه رفع شعرها الي نازل على وجهه من البجي وباس راسها.. بس هدي حالج واحجي خلي افهم وين راح شنو اخذهم وليش شمسويه؟!..

-باوعت عليه وسكتت تنهدت وكمت مو صوجها صوجي انقهرت عليها وكسرت كلبي والا والله تبقى
حاقده وحقيره..

-كمت منهم وعفتها ويا اخوها كعدت العب ويا علاوي
وبالي يمهم عيني على علاوي وانقهرت عليها لو واحد
ياخذه مني اموت لو مهما جانت هي بس هالموقف ما ينحمل شلون كدر يحرم ام من طفلها شلون الواحد يكدر
الهاي الدرجة يعذب قلب ام باغلى ما عندها..

-صفنت بكلمتي وذاكرتي رجعت بكلامها الي جانت توكف بكل رحابه صدر وتحجيها بدون ما تفكر بعاقبه كلامها بدون ما تفكر انو الله عادل ولابد يفر دولاب الدنيا حتى يعشيك نفس الشعور ونفس الالم..

-ابن الحرام الله يحرمنا منه قبل لا نشوف عاره هذا
كلامها الي جانت ترمي على مسمعي وتحرك كلبي
بي هذا كلامها الي لليوم ما نسيته..

-الحياة الي نعيشها كلها دين بدين وهالكلام تعلمته من عمه نبع من دخلت بيتها.. الحياة دين بدين كل موقف
كل كلمه ترجع علينا اضعافها يا بعد عمتج طلبي من
ربج تكونين مظلومه مو ظالمه كل واحد وصلج الهالحال ربج راح ياخذ حكج منه البني ادام يتجازى
على افعاله بهالدنيا قبل الاخرة..

-واليوم تحقق كلامها هاي شذى الي شكد جرحتني وشكد اذتني شكد جانت تدعي على علاوي تالي الله حرمها منهم كلهم مو حقد مني ولا شماته بس حتى تعرف انو الله حق وانو الانسان شما يجني تالي يحصد
نتيجة اعماله..