يهزمني الحُب وانا جاهل بدرب المُحبين

البارت الثاني والخمسين

شّدت هيام ع رعد وهي حالفة م تكسر بخاطره وتواسيه وتشوفه طفلها الاول قبل ايهم ..
...........................
في بيت كاسر تحديدًا الساعة ١ الظهر
لين فزت للمكتب واخذت جوالها وردت ع اتصال مجهول
لين : الو ؟
المندوب : وصلت الفروة للبيوت المطلوبة
لين ابتسمت : تمام شكراً
المندوب : العفو
سكرت وطارت لباب البيت وحصلت صندوقين مغلفة بشكل جميل ومرتب شالتها ودخلتها داخل وفتحت اول صندوق وكان مكتوب عليه " هدية تنتظرك في الصندوق "
طلعت فروتها الوردية واللي انحفر عليها اسم " لين الذيب "
وتقدمت للمراية ولبستها وصرخت : تججننن !!!
تقدمت للصندوق الثاني وكانت بتفتحه بس قالت : لا كاسر لازم يفتحها بنفسه
وماهي الا دقايق ووصلها صوت كاسر داخل البيت وهو يقول : وعوودي
وعد طلعت من المطبخ : عييونها
كاسر تقدم لها وحضنها وطيح راسه ع كتفها وهو منهد حيله وقال : اااه م بغوا يعطوني الاجازة يقولون المديرة الجديدة ومدري وش
وعد ابتسمت وهي اللي قبلت اجازته لمدة خمس ايام وضحكت وقالت : اهم شيء عطتك اجازتك ؟
كاسر رفع راسه وباس خدها وقال : ايه يروحي معليتس
لين بصراخ : كااااسر جببت لك هديية
كاسر ابتسم : يعيون كاسر وكل اهله ي لييونه هاتي اشوفها
لين تقدمت وبيدينها الصندوق ومسكه كاسر ونزله وسحبها لحضنه وقال : يحللوها اختي يعرب يحللووهااا
لين ضحكت وحاوطته وقالت : ويحللو اخووي والله
كاسر ابتعد ومسك الصندوق وفتحه وشاف الكلام نفسه اللي كان ع صندوق لين وفتحه كامل وطلع فروته الكحلية واللي انحفر اسمه عليها " كاسر الوعد " طلعها كاسر ولبسها وكانت مناسبة جدًا عليه وبرزت ملامحه وطوله
وعد مسكت خدودها وقالت : يحلو حبيبي يحلو الكاسر يناس
كاسر لف لها وغمز لها وقال : يعيون حبيبتس والله
لين صفقت بحماس : ااافف اذا هيي كذا حللووه علييك اجل رعد كييف ؟
كاسر وقف عند المراية اللي توسطت جدار الصالة ولف وقال بصوته الثقييل : كاسر بن محمد !
لين ووعد بصوت واحد : ونععمم
كاسر ضحك : معلييكم زوود
لين : اافف ابيي ارووح اشوف رععد !!
كاسر : رعد الحين فالدوام قبل شوي كلمني يعني اتوقع هيام اللي بتستلمها
لين هزت راسها بمعنى " فهمت " وجلست ع الطاولة بعد م حضرت وعد اكلهم وجلسوا ياكلون وهم وراهم المخيم اللي بيكون الساعة ٥ وبيكونون الكل فيه
.......................
في بيت ابو محمد
حنين وهي شايلة الصندوق : مدري من مين !
ام فارس : يمكن فارس ؟
حنين استغربت : مدري بس بنشوف
جلست حنين وام فارس معها فالصالة وفتحت الصندوق وحصلت نفس العبارة " هدية تنتظرك في الصندوق " تحمست حنين وفتحته بسرعة وطلعت لها فروة كساها اللون البنفسجي الفاتح ورفعتها من الصندوق وبرز اسمها وراها " حنين الفارس "
حنين ضحكت : ماشاءالله تجنن !
ام فارس سحبت الكرت وقرأت م فيه وهي تقول : اخاف عليتس من برد الشتاء من محبوبتس لين الذيب
ام فارس شهقت وقالت : الذيب ؟؟
حنين بفشلة سحبت الكرت وقالت : هو لقب فالمستشفى وكذا
ام فارس : اووه طيب ماشاءالله عليها عرفت تختار ناسبتتس مره يحنين الفارس
حنين ضحكت وتقدمت وباست راس ام فارس وقالت : تسلمين لي يعمة
فارس ابتسم وقال بصوته الرجولي : ماشاءالله وشذا الزييين ي حنين الفارس ؟
حنين لفت له وابتسمت وتقدم فارس لها وحضنته بكل حب وقالت : شرراييييك
فارس نزل وباس خدها وقال : تهبلييين يعيونه
حنين كانت بتتكلم بس قاطعها جوال فارس اللي دق ورفعه لأذنه وهو يقول بهمس مسموع : هلا بيادر ؟
حنين شّدت ع قبضتها وزفرت بقهر ولفت وهي تقول بنفسها ( للحين سالفة بيادر م خلصت !! )
طلع فارس للمجلس وجلس فيه وتقدمت حنين بهدوء وهي تبي تعرف وش محور حديثهم ووش يدور عنه
فارس : ابشري خلاص ليه تبكين طيب ؟
بيادر : مقدر يفارس مقدر مات بين يديني
فارس ابتسم : خلااص يبنت الحلال مو اول مريض يموت بين يدينتس اجيتس ؟
بيادر استغلت الفرصة وزادت بكائها وقالت : اييه تكفى تعال
فارس : من عيوني دقايق وانا جاي
قام ومسك مفتاح سيارته ولف بيطلع بس طلعت حنين بوجهه وقالت بصوتها الانثوي : ع وين ؟
فارس حاوط بيدينه ورا خصرها وشّدها عليه وقال : بروح ساعة ونص وبرجع
حنين رفعت حواجبها وقالت : م سألتك كم بتجلس سألتك وين بتروح !
فارس ابتسم ع جنب وقال : وش النظرة القاتلة ذي !!
حنين ابتسمت : انطق
فارس : المستشفى يروحه شويات وبجي
حنين : حشى م فيه دكتور غيرك ؟ تووك جيت
فارس : ايه بس فيه حالة طارئة انا ماسكها شوي وبجي
حنين بهمس مسموع وكأنها تدق فارس بالكلام : تمام لحد يندم
مسكت يدين فارس بقوة وبعدته عنها وطلعت للصالة وفارس يناظر فيها وابتسم وطلع وهو م حسب حساب ان حنين سمعته واتجهة للمستشفى
حنين طلعت للغرفة وهي ماسكة البكية ودقت ع رعد ووصلها صوته وهو يقول : ارحبي
حنين ابتسمت : الله يبقيك ي سندي
رعد : امريني يعيون اخوتس
حنين : بروح معك انت وهيام للمخيم
رعد لف دركسون السيارة بيد وحدة والثانية مثبت فيها جواله وقال : خلاص انا قريب اطلعي لي
حنين ابتسمت : تبشر يعيوني
رعد : تبشرين بالجنة يالحنين كله
سكر رعد واتجهة لبيوت اهله وتقدمت حنين وجمعت اغراضها اللي بتأخذها للمخيم ولبست عبايتها وطلعت وقابلت ام محمد قدامها
ام محمد استغربت : حنين فارس جاء ؟
حنين : لا لا بطلع مع رعد انا
ام محمد ابتسمت : يالبيه يالرعد اصبري بطلع اشوفه
حنين ابتسمت : تعالي يروحي
مسكت حنين يد جدتها وطلعت معها برا وفز رعد من سيارته اول م شاف جدته ونزل لها وباس راسها وقال بصوته الرخّيم : تخاويني يالمها ؟
ام محمد ابتسمت : والله ودي لكن لازم اخاوي قاضي
رعد ضحك : اللي ودتس
اشر رعد لحنين تركب وهو عارف ان فيها شيء ودخل جدته للبيت ورجع ركض للسيارة وركب وقال : انطقي
حنين ضحكت : يعني واضح ؟
رعد : مررره خلصي تكلمي فارس مسوي لتس شيء ؟
حنين علطول شابكت يدها بيد رعد وتكلمت بكل شيء شافته وسمعته تحت انظار رعد واستماعه لها وقال بحدة : اعنبو غيره م يفهم ذا !
حنين : تعبت وربي يالرعد اني تعبت
رعد : اعقبب وانا الرعد والله م تتعبين واني لا اطلع بيادر الزفت ذي من عيونه
حنين شّدت ع رعد وقالت : تكفى ترا الالم يوجع لا تسويها مع هيامك وتكسرها والله الالم م ينطاااق وانت تشوف زوجك وحبيب عمرك يكلم غيرك بأسلوب حلو !
رعد ابتسم : ابشري والله
وقف رعد وطلب قهوة حنين المفضلة ونزلوا اثنينهم يتقهوون ويسولفون وهم منزمان م فضفضوا لبعض وكان رعد مستحل الجلسة كان يقولها كل شيء ضايقه فالفترات الاخيرة
......................
في بيت رعد
هيام تقدمت وفتحت باب البيت وحصلت صندوق وقطبت وقالت : هاه من مين ذا ؟
دخلته داخل البيت وسكرت الباب وراها ودخلت للصالة وهي تسحبه وم فيها حيل مع ثقل بطنها الزايد وهي خلاص ع مشارف التاسع فتحته بهدوء وكان طبقات واول طبقة كان مكتوب عليها " هدية " وسحبت هيام ع الطبقة الثانية بدون م تركز وكانت مكتوب ع الطبقة الثالثة " في " فزتت هيام وهي تذكرت فيّ وكانت تحسب اسمها يكتب كذا وقالت بحسرة : الله ياخذها اللي م تستحي الله يقهرها وياخذ رعد معها الله يقهرهم
صرخت هيام بقهر وضربت يدها بالطاولة الزجاج وطاحت بتعب وهي تبكي بحرقة وقالت بصوت مهزوز : وشش سوييت انا عشاان احب واحد زي رعد ووش سوويت من ذنب عشان يكون زوجي كذاا !!!
دخل رعد للبيت وقال بصوته الرخّيم : هيااامي
هيام لف له وهي وسط دموعها وانهيارها وقالت بحدة : هذاا وشش !!
رعد فز ركض لها وشالها بين يدينه وبعدته هيام بقوة ومدت يدها وكانت بتصفق وجهه بس مسكها رعد علطول وقال بحدة : خييير ان شاءالله !!
هيام سحبت يدها ومسكت شعرها وصارت تصرخ وتبكي وهي تقول : الله يااااخذذك اننتت م ففيي قلببك رحممة عليي تركتت اميي وانا بحاجتها واخرتهاا توصلك هدايا من فيّ اللي للحين م حااسبتك علييها م ترحممننيي انتت خلاااص !!
رعد كان مصدوم من حالة هيام وفز وحضنها وقال بهمس في اذنها : هيامي خلاص استهدي بالله حرام اللي تسوينه بعمرتس وين الهدية تبيني احرقها ؟ بحرقها بس وربي ان مالي يد فالموضوع ابد
هيام زاد بكائها وشهقاتها وهي تضرب ع صدر رعد وتقول : الاا لك يد انا سمعتك وانت تكلمني وتقولها تسلم عيونتس اناا سمعتكك يالرععد لا تكذب عليي !!
رعد ترك يدينه ونزل راسه لهيامه وقال : انا تحت سيطرتتس سووي فيني اللي تبين
هيام غطت وجهها بيدينها وكانت تشهق بشكل مرعب تحت ابتسامة الضيق اللي انرسمت ع وجه رعد وقال : هيامي نفتحها ونشوف من مين اول ؟
هيام جلست ع الكنب وغطت وجهها بالمخدة وصارت تبكي وتركت رعد وراها متضايق وهو يحس ان ضلوعه تتكسر ع كل شهقة تطلعها هيامه وتقدم للصندوق وسحبه وفتحه طلع فروته السوداء اللي انحفر اسمه وراها بالذهب وانكتب عليها " رعد الهيام " وابتسم واخذ الكرت وقرأه بصوت عالي وهو يقول : اخاف عليك من برد الشتاء من محبوبتك لين الذيب
رعد انسدح ع الكنب يضحك وقال : اولاً شفتي انه من لين مو من فيّ ثانيًا لين شفيها مستعجلة ع ذيب !!
هيام رفعت راسها بهدوء وقالت وهي تمسح خشمها اللي حمر وخدودها : من لين ؟
رعد هز راسه بنعم وقال : تعالي لحضني يحبيبي م اقاوم وجهتس
هيام تقدمت بتعب وببطيء لرعد وحضنته وقالت : يعني م بينك وبين فيّ شيء ؟
رعد ابتسم : ورب الكعبة اني مدري عن هوا دارها اعنبوتتس كيف التفت لها وانتي زوجتي !
هيام انسدحت وقالت : شّد علي
رعد حاوطها وشّد عليها وقال : تعبانة ؟
هيام بصوت باكي : نفسيتي تعبانة والحمل اهلكني يالرعد
رعد باس راسها ومسح ع شعرها وهو يقول : هونيها وتهون واحتسبي الاجر يروحه
هيام قامت وقالت : اسمع اول م اجيب ايهم بالسلامة بنجلس ٥ سنوات م بنجيب احد فاهم !
رعد انفجر يضحك وقال : مقدر اقاومتس طيب والخصر بيرجع والجسم يوووهه تحمليني اذا م سويتها معتس من اول اسبوع
هيام توسعت عيونها وقالت بحدة : ررععد خييير
رعد قام : امزح معتس جاهزة ؟
هيام : ايه اغراضي فوق نزلها
رعد : طيب البسي واطلعي لحنين برا
هيام ابتسمت : الله حنينيي
طلعت هيام لغرفتهم مع رعد اللي كان يساندها واتجهت للحمام وغسلت وجهها وطلعت وبدلت ملابسها واخذت فروتها البيضاء من كيستها ولبستها وحطت ميكب خفيف وانسدل شعرها الطويل اللي كساه اللون الاسود ع ظهرها وطلعت ولبست عبايتها ونزلت بهدوء مع الدرج وطلعت للسيارة وكانت حنين قدام جنب مقعد رعد واتجهت هيام وركبت وراهم وقالت بصوت لطيف : حننيينني
حنين لفت لها وابتسمت وقالت : عييونني يهيام الرعد
هيام : شخبارتس غريبة جايه ؟
حنين صغرت نظرتها وقالت : والله بخيير ليه م ودتس اني اجي ؟
هيام ضربت كتف حنين بخفه وقالت : خير يوسخة !
حنين ضحكت : والله صارت سالفة وراح الشيخ فارس للمستشفى وجيت مع رعد اللي كان قريب من بيوتنا
هيام هزت راسها بمعنى " فهمت " وماهي الا ثواني وطلع رعد من البيت وسكره وراه وركب اغراض هيامه ورا وركب وقال : توكلنا ع الله ؟
حنين وهيام : بسم الله
مشى رعد ودق ع فارس ووصله صوته وهو يقول : هلا رعد
رعد بحدة : لا هلا ولا مرحبا !
هيام قطبت وحنين ضحكت ومسكت ذراع رعد
فارس ابتسم : افا ليه ؟
رعد بجدية مرعبة : وقسم بالله اذا م تعدلت ان تحرم عليك حنين سامع !!
فارس قطب : رعد خيير شفيك !
رعد : انت عارف وواضحه السالفة اذا م بعدت عن الزفت اللي عندك وربي م يحصل لك طيب ماهي اخت الرعد اللي تجبر تتعايش مع شخص م يهتم لها !
هيام بنفسها ( ليتك تعلم نفسك يالرعد وتبعد عن كل بنت ممكن تطيحك بشبهه )
فارس بحدة : بس عااد وش سويت تكلم !
رعد : حنين معي وبشوفك فالمخيم وبنتفاهم رجال لرجال عن الزفت بيادر !
فارس انصدم وقال : هاه !!
رعد : الله يستر عليك الوعد بعد ساعة فالمخيم
سكر رعد بدون م يسمع رد فارس عليه ووصله اتصال من ذيب
رعد ابتسم : ارحبب
ذيب : ابقه يالله
رعد : امرني
ذيب : اليوم بجيب الشيخ وبتقدم للين رسمي
حنين شهقت وهيام كتمت صرختها وهم مو مصدقين انه خلاص ذيب بيجتمع ب ليّنه
رعد ابتسم : اللي ودك يبو عبدالله تحت الخدمة
ذيب ضحك : تمام خلاص ترا خطوبتي بملك عليها فيها
رعد : الله يتمم ع خير وتستاهل كل خير والله وحمدلله انك م رحت من يديننا والله انك رجال عن الف رجال يالذيب
ذيب شاش وقال : تكفى يالرعد لاتشوشني واتزوج بنفس اليوم
رعد ضحك : هو انت بتتزوج مو هي ملكة ؟
ذيب : يالله ع خييير تجهزوا معي
رعد : ابشر
سكر رعد وصرخت حنين : الله ليين بتنخخطبب وفالمخيييم !!
هيام بحماس : تكفيين حنيين يحممس !!
رعد ضحك : بس انتي وياها
سكتوا والكل استنفروا بعد فويس ذيب فقروب العايلة وهو يشرح كل شيء وانه بيتقدم لبنت خاله اليوم
ابو رعد كان رده ايجابي جدًا وهو يقول : والله م بنحصل مثلك يالذيب لبنتي لين والله يتمم ع خير ويشرفنا والله
ابو ضاري : ماشاءالله الله يتمم ع خير يولدي وابشر باللي يطيب خاطرك
كاسر : ماشاءالله ع البركة يبو عبدالله وتزهاااك لين والله
الكل كانوا متحمسين للخطوبة اللي الكل كانوا ينتظرونها بحرارة و ع الجمر
.............................
في المخيم الكل وصلوا
ام محمد : يعيال يالله يد بيد ونزلوا اغراضنا
رعد تشمر وقال : ابشري
تقدم رعد وشاف كاسر يلبس فروته وقال : ماشاءالله يكاسر الوعد
كاسر لف له وابتسم وقال : ارحب يرعد الهيام
رعد : امش ساعدنا
كاسر : ابشر
فارس بهمس : رعد حنين زعلت ؟
رعد شال الاغراض وقال : وش يهمك ان شاءالله !
فارس بحدة : يخووي م تقللب علي !!
رعد : ايه ايه
مشى رعد وتجاهل فارس اللي رجع وشال الاغراض مع العيال وخلصوها وطلعوا لقسمهم وجلس رعد جنب محمد وجلس فارس جنبهم وقال : رعد وربي م بيننا شيء
رعد : فارس اسمعني وركز معي انا م اهتم لمناقشاتك ذي كل تبريرك قوله لحنين انا وشدخلني ؟
فارس : ياللييييلل
قام فارس وهو م يتحمل زعل حنين عليه ويعرف جدًا ان زعلها شين وم ترضى بسرعة ووصل عن المدخل وقال : حننيينن
حنين فزت وتقدمت للباب وقالت : خير ؟
فارس بجدية وهو مشابك يده بيدين حنين : اسمعيني تكفين وربي م ارضى اجلس ٥ ايام بالأجواء ذي اللي م ناقصها الا حبيبة قلبي وهي زعلانة مني تكفين والله اسلوبي كذا معها ولا م اكن لها اي مشاعر واخسى احبها وانتي زوجتي وحبيبتي الاولى والاخيرة !
حنين كانت عارفة ان فارس م يحبها بس م تبيه يتعود ع الاسلوب ذا وقالت : اسلوبك يتغير معها سامع !
فارس : ابششري
حنين رفعت رجولها وباس خد فارس وقالت : خلاص تقلع
فارس ابتسم وقال : من عيوني كم عندي حنين ؟
حنين ضحكت : ووححددة
فارس باس راسها وقال : انشهد بالله وحدة ولا غيرها احد !
تركت حنين يدين فارس اللي طلع لقسم الرجال وهو يمشي بخطوات سريعة وجلس جنب رعد وقال : انطم ولعاد تتدخل بيني وبينها
رعد ابتسم : حليتها ؟
فارس هز راسه بنعم وتكلم رعد : ايييه اعقل
فارس قام وقال بصوته الثقييل : عريسسسنا وصصلل
ذيب ضحك ونزل من سيارته وهو رافع يده وقال بصوت عالي : سلااام عليييكم ياهلي
الرجال بصوت واحد : وعلييكم السلااام
تقدم ذيب وسلم ع كبارهم وبعدها العيال وجلس وقال : وصلتك رسالتي يخال وانا طامع بنسبك وطالب يد لين بنتك ع سنة الله ورسوله
ابو رعد : وجاتك بنتي يالذيب
رعد : يالله حيي شووفك
ذيب ابتسم : حيي نباااك يالرعد
كاسر ابتسم وهمس لذيب : والله وسويتها وخذيت دكتورتنا
ذيب ضحك : عوق قلبي ودكتورتي وطبي والله !
كاسر : الله يتمم ع خيير يروح اخوك
ذيب قرب وباسوا خشوم بعض " سلام الرجال " وقال ضاري بصوت عالي : الله يتمم لك يشيخنا
ذيب : اللهم اميين يارب
بدأت السوالف عن الخطوبة والملكة اللي بتصير الليلة عن اهل قاضي وعند اكثر اثنين مهمين بالعايلة " لِين الذيّب "
''' في قسم الحريم '''
ام محمد : وين لين ؟
لين قامت وهي م تدري عن شيء ابدًا وتحسب ان ذيب م بيسويها وقالت : هنا يجدة امريني
ام محمد : ماشاءالله يبنتي بيتقدم ذيب الليلة لتس
لين ابتسمت وشوي وشهقت وقالت : ااايشششش !!!!
البنات طاحوا يضحكون عليها وقالت حنين : ايه الليلة بتنخطبين وبتتملكين بعد
لين نزلت دموعها علطول وهي تضحك وقالت : اماااانه الليلة !!
البنات كلهم قاموا وحضنوها حضن جماعي وقالت شوق : اخيييرًا اجتمعتوا
لين ضربتها بخفه وقالت : اي والله اخيرًا
شوق ضحكت ورجعت حضنت لين وقالت بهمس : اسفه ع كل شيء صدق اني كنت طفلة وجاهلة وربي اني اسفه
لين حاوطت خصرها وقالت : طيب يالنونو سامحتتس
شوق بعدت وقالت : وشقصدتس ؟
لين : لا بس عشانتس قصيرة مرره يالنتفه
شوق ضحكت : وقفي جنب ذيب وشوفي
هيام : مبروك يالين الذيب
لين رفعت شعرها وطلع اسمها اللي انحفر ع الفروة وقالت : حمدلله م سويتها ع الفاضي
هيام ضحكت : اليوم طار عقلي بقولكم السالفة بعدين
حنين لبست فروتها وقالت : وربي الفروة تجنن احبببتس
سلمى دخلت وهي تزغرط وقالت : مبررروك ي ليينن الذييب
لين ضحكت : الله يبارك فيتس يارب
الكل جلسوا وقالت بشرى : متى بيتقدم ؟
سلمى : المغرب توو شفته شوي ويطير من الفرحة
" وبجهة سلمى وذيب "
ذيب بفرحة : شفتيها ووش قالت ؟
سلمى ضحكت : والله للحين م رحت يعيوني
ذيب فز وحضن سلمى وقال : اااه ي سلمى انقضى الكثير وبقى القليل وبجتمع فيها وبحطها بيني وبين روحي
سلمى حاوطته وقالت : الله يتمم ع خير ويجمعكم ع البر والطاعة يارب
ذيب ابتسم : امييينن يارب
سلمى : وبعدين وشفيك استخفيت اثقلل وخلك رزيين
ذيب رفع حاجبه وقال : مع لين ؟ وربي اني نسيت الثقل والرزانه واني جايها ع وجهي افداها انا بروحي وعمري وحياتي كلها وقسم بالله تهوون روحي عند صوتها وضحكتها
سلمى فزت بفرح وقالت : يالله وش كبر حظها فيييك يخوي
ذيب : لا والله انا اللي من كبر حظي انها بحياتي
سلمى : يالله متى بتتقدم ؟
ذيب : المغرب ان شاءالله
سلمى ابتسمت : توكل ع الله والله يوفقك ويسر امرك ويسعدك ويجمعك ب ليّنك بأقرب وقت
ذيب ابتسم : الله يسمع منتس يروح منصور
سلمى : الله منصوررري
منصور كان وراهم وقال : لبيه يعيونه
سلمى ضحكت وقالت : ابوسهم وربي
منصور تقدم وقال : يالله سويها
ذيب ضحك وقال : يخوي تمون احترم اني موجود طيب !
منصور دف ذيب وقال : تقلع انت بس وراك ملكة
ذيب ضحك واتجهة لقسم الرجال وارتفعت سلمى لمنصورها وباست عيونه وقالت : احبك
منصور ابتسم : اهيييمك ي سلومتي
سلمى تخصرت وقالت : اللهجة ؟
منصور : تقبليها عاد
مشى منصور وقال : اهييمتس يبنت عبدالله
سلمى ضحكت وسكرت الباب اللي بينهم ودخلت تدور لين
....
لين ضحكت : امانه المغرب يالله احبببه
سلمى : اها طلعتي خفيفة مثله
لين غطت وجهها وهي تتخيل انها بحضن ذيبها وقالت : ااااه اععششققهه
هيام : الله تذكرت بدايتنا مع ازواجنا
حنين : شفتتيي ؟
سلمى ضحكت : وربيي
بشرى : يالله شعور حلو انهم ببداية المشوار
وعد ابتسمت : الله يتمم لتس يعيونها
لين حضنت وعد وقالت : حلووتتي وعييون الكاااسر
وعد ضحكت وشّدت عليها وقالت : يحظظي فيتس وفالكاسر
جلسوا البنات يسولفون والكل متحمس للمغرب وينتظرونه بفارغ الصبر
...........
عند الرجال
اعتلى صوت الكل فزوا له وهو يقول : سلام عليكم
حمد بصدمة : ذياب !!
ذياب : هلا والله بأخوي الكبير
سامي م كان اقل صدمة من حمد وتقدموا لأخوهم من امهم وهم مصدومين وقال حمد بحدة : وش جابك !
ذياب : جيت اسلم واجلس مع اهلي شفيك كأنك م تبيني !
سامي : بعد اللي سويته تجي بكل برود وكيف اصلاً طلعت من السجن ؟
ذياب : خلصت مدتي وجيتكم
ابو محمد : ذياب !
ذياب تقدم للجد قاضي وقال : لبيه
ابو محمد بحدة : وش جابك م تستحي ع دم وجهك انت !!
رعد كانوا العيال ماسكينه بصعوبة وهو يقول بصراخ : فكوونني عليييهه !!
ابو رعد بعصبية : ذياااب تقلع من وجيهنا !
ذياب : طيب لا اله الا الله اسمعوني جيت عشان ابيكم تعرفون ان طارق ناوي رعد نية ماهي بزينة وجيت احذركم منه وتراه يقول بأسعد ايام رعد بطلع واخرب يومه واعفسه فوق تحت
رعد انفجر عصبية وقال بصوت هز بيت الشعر : ااذااا هووو ع رججااال يططللع قدااامميي
ذياب بحدة : رعد اترك منك الهياط وانتبه لنفسك
طلع ذياب بعد م سلم ع حمد وسامي ودخل عند قسم الحريم وطلعت ام شوق وهي تبكي وحضنته وقالت : اشتقت لك يولدي
ذياب ابتسم : والله انا اكثر يمه وشخبارتس ؟
ام شوق ضحكت : حمدلله بخييير
بيان جات تركض وقالت : عمة اسمعي
سامي كان واقف مع امه واخوه ذياب وفز اول م شاف بيان كانت تفتن ولابسة فروتها وشعرها الويفي الاسود ووجهها كانت توجع القلب وسحب شماغه وغطاها فيه وقال بصوته الثقييل : ادخخليي يبننتت
بيان فزت برعب وركضت داخل ودخلت ام شوق معها بعد م ودعت ولدها وقالت بصوت سمعوه ذياب وسامي : يبيان بينتي وش بغيتي ؟
سامي بنفسه ( يووييلل حااالي بيااان !!! )
ذياب ضحك ع جنب وقال بنفسه ( بيان ؟ بنت عبدالله اعنبوتس والله انتس موتن حمر ! )
سامي تنحنح وقال : ذياب وين بتروح ؟
ذياب لف له بهدوء وطلع بوكيت الدخان وسحب سيجارة منه وحطها بين شفايفه وشغلها وزفر بتعب وقال : مدري والله توو طلعت من السجن وشفت موقعكم من حساب حمد
سامي : طيب ترا ذيب الليلة بيخطب شرايك تجلس ؟
ذياب ضحك : تبي رعد يذبحني انت ؟
سامي : اعتذر له ووضح له انك م بتعديها وانك اخذت عقوبتك ونادم عليها
ذياب : ع خير ان شاءالله بتقدم واخذ وحدة من بنات قاضي وبتزين ان شاءالله
سامي قطب : في احد ببالك ؟
ذياب مشى بدون م يعطي رده لسامي اللي كان يدعي ان ذياب م يقصد بيان وفعلاً كان ذياب طايح عند بيان ويبيها من اول نظرة وبدت منافسة اخويين محد يدري نهايتها وش بتكون ..
........................
في المغرب وصل الشيخ وضيوفه الرجال وجلس وقال : وين ذيب بن عبدالله بن قايد ؟
ذيب تقدم : موجود
الشيخ بدأ يتكلم عن الزواج ومن الامور ذي وتقدم ابو ضاري مع ولده ذيب وعياله زايد وضاري وقال بصوته الرخّيم : والله نتشرف حنا يا اهل قايد ان نطلب القرب منكم والنسب ياهل قاضي بطلب يد ابنتكم لين لولدنا ذيب على سنة الله وسنة رسوله وطلباتكم منفذة بإذن الله ولا نخاف تردون على طلبنا وواثقين بكم اهل وربع
ابو رعد قام وحاوطوه عياله رعد وكاسر وقالوا : واحنا اهل قاضي قابلين تقدمكم لبنتنا لين ع ولدكم ذيب والله يتمم ع خير والشروط فالعقد بين لين و الذيب
الشيخ تمم ووقع ذيب واخذ كاسر الكتاب وسلم ع ذيب بحرارة وباركوا له الشباب
ذيب بحب : الله يبارك فييكم وعقبال اللي م قد تزوج واللي افلحوا الله يوفقهم يارب
الكل : اميين
تقدم كاسر لقسم الحريم وقال : ي أم رعد
ام رعد تقدمت مع لين لكاسر وسلم ع اخته وقال : موافقة ع ذيب ؟
لين همست : تستهبل صح ؟ ومن لي غيره والله م ابيني الا له ولا ابيه الا لي
كاسر ابتسم وباس راسها وقال : اجل ع البركة
وقعت لين وانفجرت فرحة ونزلت دموعها وقالت : كاسرر تكفى عاادي اشووفه ؟
كاسر ضحك : ايه يالخفيفة بيجي يشوفتس
ام رعد مسكت راس بنتها وحضنتها لها وجات حنين وشاركتهم الحضن وتقدم كاسر وحضنهم مع حنين وفزوا ع صوت رعد : ماشاءالله حضن جماعي بدوني ؟؟
لين ضحكت : تعااال ي كل اهلي
رعد ابتسم وتقدم وحاوطهم بيدينه وباس راس لين وامه وقال : ع البركة يروحي الله يتمم ع خير
لين : اميين يارب
كاسر : بس عااد وخر كتمتني
رعد ضغط اكثر وكح كاسر ولف رعد يركض وكاسر وراه وهو يقول بصوت عالي : تعااال يوررع والله م اخليك
رعد ضحك ووقف وقال : تعال وخل نشوف من الورع فينا
م كان بين كاسر ورعد فرق طول بس رعد له طوله وهيبته وكان عريض وضحك وحضن كاسر اللي ابتسم وحاوطه واتجهوا للرجال وقال رعد : يالله ؟
ذيب قام وهو يرجف وقلبه يدق وقال : بسم الله توكلنا ع الله
رعد مشى مع ذيب وقال : الناس يخطبون فالبيوت وانت كسرت القاعدة فخيام يالظالم !
ذيب تكتف : الله اكبر اهلنا قبلنا كانوا يعرسون بخيام
رعد : الصدق م نقدر نقول شيء
ذيب ابتسم وقال : وينها ؟
رعد : ادخل وبتحصلها بالخيمة البيضاء
ذيب دخل وقال بصوته الرخّيم : يوولدد
ام ضاري تقدمت وسلمت عليه وقالت : الف مبروك يولدي والله انك تستاهل كل خيير
ذيب ابتسم : الله يبارك فيتس يجنتي
سلمى بصوت عالي زغرطت وسد رعد اذنه وقال : ووججعاااه
سلمى ضحكت برعب وقالت : يممه وشتبي انت تقلع نبي نفرح بأخونا
رعد ابتسم : اني والله قد دريت انها سلمى الملسونة
سلمى : دزز بس
رعد تقدم لقسم الرجال وتركهم يأخذون راحتهم
العنود وبيان وبشرى وخولة وسلمى حاوطوا ذيب وصاروا يباركون له
خولة من بعيد : الف مبروك يالذيب تستاهل كل طيّب والله
ذيب لف لها وقال : الله بيارك فيتس ي أم ثريا
وسلم ع البنات وقالت سلمى : اف خلاص لين مسكينة تنتظر داخل
ذيب مسك قلبه وقال : يوييل حالي اذا هو اسمها ويقلب موازيني اجل لو ادخل
بشرى ضحكت : الله يقويك
مشوا البنات ونزل ذيب راسه بحكم انه طويل ودخل مع باب الخيمة وشاف لين معطيته ظهرها وفز علطول وحاطوها بيدينه من وراها وحط راسه ع كتفها وقال بصوته الثقييل وهو يهمس عند اذنها : اااه اخييييرًا ي لييني
لين كانت تحترق احراج بس حطت يدينها فوق يدينه وقال بهمس : يروح لينك انت
ذيب لفها له وسحبها لحضنه وقال : تكفين خليتس كذا خليني اشبع منتس
لين حاوطت رقبته وقالت : ذييب اخيييرًا اخيييرًا
ذيب شّد عليها وقال : اسمحي لي اسويها بخاطري من اول
لين استغربت وبعدت عنه ومسك فكها وسحبها لمبسمه بس لفت لين بوجهها وقالت : بدري يروحي ؟
ذيب باس خدها بقوة وقال : تكفيين
لين ضحكت : لا ابعد
ذيب ابتسم وحط وجهه عند نحرها واستنشق ريحة لين بقرب وبحب وطبع بوسته ع نحرها وقال : استودعتس الله ي لين الذييب
لين بخجل : بتطلع ؟
ذيب هز راسه بنعم وقال : امريني بخاطرتس شيء ؟
لين هزت راسها بنفي وقالت : لا لا سلامتك يعمري
ذيب باس راسها وقال :
اجمل اماني عمري واغلى عطاياه
‏قربتس عساني ما خلا من وجودتس
‏سكنتي قلبي ي اللين وتليته من اقصاه
‏حب ذيبتس لتس تعدى اقصى حدودتس
يالله عساني م اذوق طعم البعد وفرقاه
ويالله عساتس بقربي لأخر عمري ويفداتس
يالقلب والشرايين ومعشوقتي وعمري واحلاه
-
لين فزت وحضنته بحب وقالت : صح لسااانك يشاعر قلبيي
ذيب ابتسم وشّد عليها وقال : صح بدنتس يالغزال اللي م انكتب شعري الا لها ولا ارضى اقول شعر لغيرتس
لين ابتسمت وشافت ذيب وهو يلف وطلع برا وريحته ثبتت في لين وعند ذيب المثل كانت ريحتها ثابته فيه وابتسم وهو راضي وحس انه بدأ عمر وحياة جديدة بقرب لين ..
::::::::::::::::::::::::::::::::::::::::::::
انتهى البارت ادعموني بنجمة وكومنت عشان اتحفز اكملكم 🤍
( هاااااي وحشتوووني البارت ذا كلنا بنتفق بحبه مالي دخل 🤌🏻😔 ، استمتعوا فييه وعطوني رايكم بكل شيء احبكم 🫦 )