يهزمني الحُب وانا جاهل بدرب المُحبين

البارت الأخير

البارت الأخير • يهزمني الحُب وانا جاهل بدرب المُحبين • 1.1.2023 • صلوا ع النبي قبل نبدأ ببارتنا الختامي..
::::::::::::::::::::::::::::
البارت السبعين والأخير :
مشى سعود فيها وركبوا وراحوا كل الضيوف من بيوت اهل قاضي وم بقى الا بنات قاضي وحفيداته واحفاده ...
" في مباني هيئة الضباط "
منصور ورعد دخلوا مع بعض وهم جايين بنفس السيارة وكل من القادات والضباط والعساكر دقوا تحية لهم
منصور ابتسم لهم عكس رعد اللي كان يفرض هيبته بكل مكان وبكل قوة
منصور همس له وقال : يالرعد وش العلم ؟
رعد لف له وقال : وش ؟
منصور : يصفقون لنا ولا م تشوف ولا تسمع انت ؟
رعد بصوت عالي جدًا قال : صااالح
صالح تقدم ودق تحية لهم وابتسم له رعد وباسوا خشوم بعض " سلام الرجال " وتقدم صالح لمنصور وسلم عليه
رعد : صويلح وش العلم ؟
صالح وهو يشّد ع يدينه قال : وصل امر ملكي بأسم اللواء رعد بن محمد بن قاضي ال ***** ، و منصور بن عبدالرحمن بن غازي ال ****** ..... وتم ترقيتكم لرتبة فريق
رعد ومنصور لفوا لبعض بكل قوتهم وقالوا بصوت واحد : اسألك بالله !!!!
صالح ضحك وقال : والله العظيم ووالله انكم تستاهلون كل خييير والحيين يالرعد تقدر تفرض سلطتك ع هادي
رعد ابتسم وقال : فرضتها من اول خل عنك
منصور بصوت عالي قال : حااااااي يالررعدد
رعد انفجر يضحك وقال : امش امش الله يقلعك نلحق التكريم والشارات
منصور مسك ذراع رعد ومشى معه ودق لهم صالح تحية وسمعهم يقولون بصوت عالي : استريييحوا
ضحك صالح واستراح والكل فالممر استراحوا ودخلوا مكاتبهم
" فالمسرح "
تم تكريم رعد ومنصور كأول اثنين يوصلون رتبة فريق بعمر الثلاثين سنة
رعد ابتسم وقال : اليوم يوم مولدي تصدق
منصور ابتسم وقال : كل عام وانت شيخ قبيلتك يالرعد وكل عام وانت رجال عن الف رجال وعساها سنينك هنيية
رعد نزل بيده راس منصور وباسه وقال : وانت بخييير يالنسيب
منصور فز وباسوا خشوم بعض " سلام الرجال " وقال : امش هذي يبي لها احتفالية
رعد ضحك وقال : كويس طلعونا بس امش نوقع حضور وانصراف
منصور : بمكتبي لعبتي معليك
مشوا لمكتب منصور ودخلوا وحصلوا فهاد فيه
منصور قطب وقال : فهاد ؟
رعد ضرب راس منصور بخفه وقال بهمس : فشلتنا لعبتي وم لعبتي اخرتها نقلوا مكاتبنا
منصور ابتسم بفشلة ولف لفهاد عشان يعدل موقفه ويحافظ ع هيبته وقال بحدة : استتعد
فهاد استوعب ان الفريق رعد ومنصور قدامه ودق تحية بكل قوته لف له رعد وقال بحدة وبصوته الثقييل : وين مكاتبنا ؟
فهاد م استراح وقال منصور وهو يضحك : استريح يفهاد الله يرج رعد
رعد لف له ورفع حاجبه وقال : احلف ؟
فهاد : مكاتبكم في مبنى الافرقة
رعد : يوووه بعييييد
فهاد كتم ضحكته وقال : جنبنا يحضرة الفريق رعد
رعد لف له وقال : وش نقلوهم ؟
فهاد : ايه
رعد دقق بوجهه وقال : كأنك تبي تضحك ؟
فهاد تنحنح وقال : لا طال عمرك
رعد ونظراته حادة قال : ايييييه اشوا
طلع رعد بقوة ومنصور ابتسم لفهاد وقال : سجل اسمائنا وعساك ع القوة
فهاد ابتسم لمنصور وقال : ابشر مسجلة اصلاً فالمسرح وقت التكريم ووياك حضرة الفريق منصور
طلع منصور بعد م تأكد ولحق رعد لسيارته وركب معه وسمعه يقول : حسافة البدلات لو جينا بثيابنا كان ابرك
منصور ابتسم وربط حزامه وقال : وانت الصادق المهم ع وين ؟
رعد : بروح لبيوت جدي واهلي تخاويني ؟
منصور : ايه بالله بخاويك ولدي عندكم وسلومتي وسيارتي بعد
رعد ضحك وقال : ههه بفهم وش خليت معك ؟
منصور ضحك وضرب كتف رعد وقال : يحبك للتنكيت يالسخيف ومسوي هيبة فالمباني قلع الله ذا الراس
رعد انفجر يضحك وقال : لازم محد يشوف شخصيتي ذي الا اهلي حتى انت بحرمك منها
منصور بجدية : قلععه تحسبني ميت ؟
رعد ابتسم وقال : امزح جعلني فداك
منصور باس كتف رعد وقال : مجار لبى عيينك يالرعد
مشوا متجهين لبيوت اهل قاضي ...
" في الحوش الخلفي من بيت ابو محمد "
ام محمد : يسلوم جيبي الكرسي حقي مقدر اجلس ع الارض معكم
سلمى من داخل قالت : ابشري يمه ابشري
ام محمد ابتسمت وقالت : حلال عليتس يبنتي ي سارة م جبتي
ام ضاري ابتسمت وقالت : لبى روحتس يمه
ام رعد : ايه وش باقي عندنا من فعاليات ؟
ام سلطان ابتسمت وقالت : والله يناديه باقي زواج عهود وبيان بنفس اليوم بعد اربع ايام وبكرا تمايم ولد منصور وولد كاسر
ام رعد لفت لأم ضاري وقالت : سارة وش قررت سلمى !
ام ضاري : تسميه ؟
ام رعد هزت راسها بنعم وكملت ام ضاري تقول : والله للحين مدري لكن سمعتها تقول ذيب
ام محمد جلست ع الكرسي اول م جابته سلمى وقالت : والله ويستاهل الذيب السمواة
سلمى ابتسمت وقالت : بديتوا بالسوالف اصبروا نجيب القهاوي والشاهي ونجي
حنين من وراها : جينا خلاص
جلسوا كل من البنات والامهات وجدتهم مها حول بعض وبدت السوالف والضحك والحش والمحارش بينهم كلهم
لين : صدق سلمى امه وافقت ع اسم ذيب ؟
سلمى صفقت وقالت : اااه لا الله يجعلها الحية السوداء اللي تلدغها بنت الكلاب
طاحوا البنات يضحكون عليها وهي تتحسب عليهم
لين وهي ماسكة بطنها : يوييلليي خلاااص بمووت
هيام ودموعها اخذت مجراها : ااه يارب تعبتت من سلمى
حنين ضحكت وقالت : وهي صادقة المسيكينة
بشرى : طيب يبنت وش بتسوين ؟
سلمى : مدري للحين م ناقشت الزفت ولدها
هيام ضربت سلمى بقوة ع فخذها وانفجرت تضحك
سلمى بألم : هيام شوي شوي لا تسقطين انتي ولين عاد واااو بيتجمعون ذيب والرعد ع راسي !
وعد وهي تضحك : طيب سدي حلقتس وبيسكتون !!
لين وهي منهارة عند وعد قالت : تشوووفييين
صالحة جلست وقالت : حنين عطيني من المعمول
سلمى مدت يدها ع المعمول وقالت : خير حبيبي مطول وجهتس تجين وتجلسين معي !
وعد بحدة : سلوم اقصري الشر
سلمى بحدة : اووه وعد سدي حلقتس تكفين
ولفت سلمى لصالحة وكملت وهي تقول : اييه وش جابتس ؟
صالحة : اتوقع عشاني تؤام جميلة ضيعتي بيننا وشدخلني انا !
هيام همست لسلمى وقالت : وهي صادقة
سلمى : ايييه مرره مالتس دخل وقبل شوي تدافعين عنها وهي عامدة ! اعنبوكم م فييكم طب ولا طبيب !
صالحة قامت وعيونها تدمع وقالت سلمى بصوت عالي : دمم ان شاءالله مو دمووع
حنين بحدة : سلمى خلاااص !
بيان ضحكت ومدت يدها وضربتها سلمى عليها وقالت : كففوو يوخييتتيي
سلمى ابتسمت وقالت : كفوتس الطييب
هيام مسحت وجهها وقالت : مدري وش اقول الصدق
سلمى لف لهيام وقالت وهي ماسكة يد هيام : هييومتي م ودي ازعلتس عاد انتي غييير
هيام شّدت ع يد سلمى وقالت : تخسيين تزعليني اصلاً
حنين ابتسمت وانسدحت عليهم الثنتين وقالت : اقول همزوني واقصروا الحكي
سلمى ضحكت وصارت تهمزها وهيام بالمثل وشوي واعتلى صوت رعد في ارجاء بيت جده وهو يقول : يووولدد ندخل ؟
هيام فزت وقالت : حننيين وخري بروح له اقوله اني حامل
حنين انفجرت تضحك وقالت : روحي يالمشفوحة روحي
بشرى ابتسمت وقالت : هيام قبل تروحين بنتكم بشرى بتصير ام بعد ٣ اشهر
سلمى شهقت وقالت : يملعووونه فالشهر السااادس ويينه بطنتتسس !!!!
حنين فزت وقالت : لا عاااااد
ام ضاري ابتسمت وقالت : تقوليينه صادزة يبنتي ؟؟
بشرى ضحكت وقالت : ايه والله شوفوا
رفعت ملابسها الوسيعة جدًا وشافوا بطنها الصغير وصرخوا كلهم وطاحت دموع بشرى فرح وقالت : هيومه ترا حمود م يدري لا تقولين له
هيام بصدمة كانت واقفة ولا تحركت وقالت : وشلون ؟
بشرى ضحكت وقالت : لا تقولين له وبس
هيام : ايه ابشري
مشت هيام وهي فرحانة لبشرى اللي تعتبر اول م جاب حفيد لجدهم قاضي من البنات بعد اخوها ضاري
رعد ابتسم اول م شاف هيام وقالت : ارحبي يدهر قلبي ورجعانه ارحبيي
هيام ابتسمت وقالت : الله يبقي من له بقلبي مكانه
رعد حضنها وقال : وووه يزييين ريحتتس
هيام همست له اول م حاوطته وقالت : ويزين اخباري
رعد بعد منها وسحبها للغرفة الحريم وسكر الباب وراه وقال : علميني وش اخبارتس يالدنيييا واعلمتس خبري ؟
هيام شابكت يدينها بيدين رعّودها وقالت : طيب يحبيبي بتصير اب للمره الثانية
رعد م كان مستوعب وقال : شلون ؟
هيام ضحكت وقالت : انا حامل
رعد توسعت عيونه وقال بقوة : اسألتس بالله !!!!
هيام ابتسمت وقالت : والله يرعّودي اني حامل
رعد فز ورفعها من الارض وحاوطت هيام سيقانها ع خصره وقال : يارررب لك الحمد يااارب لك الفضل والمنة الحمدلله ياااربي
هيام حاوطت رقبته بكل قوتها وقالت : حمدلله يارب
رعد بعد وحط خشمه ع خشمها وقال : وش الاخبار اللي ترد روحي
هيام ابتسمت وقالت : والله م يرد روحي الا شوفتك وحسك
رعد نزل وباس مبسمها وكأنه يوصل لها المشاعر اللي م قدر لسانه يوصلها لها وبعد وقال : اهيييم انا اهييم والله فيتس يالهيام
هيام ضحكت بخجل وقالت : نزلني اول وقولي الخبر حقك
رعد نزلها وقال : وانتي ردي طيب
هيام قطبت وقالت : وش ؟
رعد احتدت نظرته وقرب وحاصرها بين يدينه والكنب وقالت هيام بتوتر : ايييه اهييمك اكثر والله
رعد ابتسم وباس خدها وقال : حبيبتس الرعد صار فريق
هيام شهقت بقوة وقالت : يووييلليي تقوووله صااادزز !!
رعد انفجر يضحك وقال : والله اني صاادز يبنتي
هيام صارت تنط بفرحة وقالت : مو معقولة راسي وصل الغلاف الجوي من الفخرر يحلووك يالرعد
رعد حاوط خصرها وشّدها عليه وقال بصوته الثقييل وهو يهمس : اااه ويحلو خصرتس يالهيام
هيام حاوطت رقبته وقالت : يعمرها انت وروحها ودنيتها اسمع ادخل البنات وتبشر خواتك وامك وجدتك وعماتك
رعد ضحك وقال : عسى م نسيتي احد ؟
هيام ضربت ظهره بخفه وقالت : انقلع بس
رعد بعد منها وقال : يالله اجل بس وين العيال ؟
هيام : مدري والله محمد بدوامه وفارس بعد لكن السرابيت الصغار مدري وينهم
رعد ابتسم لها وطلع لصوت طواريق سيارة كاسر برا ودخلت هيام وقالت : ابششركم ولا يبشركم الرعد ؟
ام رعد ابتسمت وقالت : وش حامل ؟
هيام ضحكت وقالت : اييه بس مو ذا خبرنا
ام هيام فزت وقالت : يوييلليي يعني عيالي بيجيبون السنة الجاية !!
هيام ضحكت وقالت : يممه شفيتس ! المهم وش السنة الجاية هذي بيشو بتجيب بعد ثلاث اشهر ع خيير
ام رعد بفرحة : ووش خبر الرعد ؟
هيام : يبقولكم بنات امشوا ادخلوا
قاموا كلهم معاد خواته جلسوا وشوي وجاء رعد من وراء الحوش وتقدم وسلم ع جدته وسلم ع امه وعماته وقربوا حنين ولين وحاوطهم رعد وباس رؤوسهم وباسوا راسه وقال وهو محاوط لين وحنين : ابشركم اني ترقيت لرتبة الفريق
ام رعد ابتسمت وقالت : ماشاءالله تبارك الرحمن
الكل فز من هيبة رعد وهيبة كلامه ورتبته وباركوا له وصار يرد عليهم وهيام تناظر فيه من بينهم بحب وبفخر بحبيبها وزوجها
ام محمد بحب : ابشر بالمعونة وابشر باللي يطيب خاطرك يالرعد
رعد ابتسم وقرب وباس يدها وقال : م تقصريين نفداتس
ولف ع حنين ولين وقال : بنات وين سلمى ؟
سلمى طلعت له وهي بعبايتها وقالت : سم ؟
رعد لف لها وقال : منصور برا بسيارته اطلعي له
سلمى : امحق وانا احسبه ترقى مثلك المهم ع البركة يولد الخال
رعد ابتسم وقال : روحي الله يصلحتس ويبارك فيتس
مشت سلمى وطلعت لمنصور وركبت معه وولدهم بحضنها وقالت : للبيت صح ؟
منصور ابتسم وقال : وعليكم السلام
سلمى زفرت بملل وقالت : معليشش السلام عليكم
منصور ابتسم وباس يدها وقال : عليتس السلام الواجد يروح منصور
سلمى : وين بنروح ؟
منصور : للبيت بخاطرتس مكان ؟
سلمى : لا احسن ابي البيت ودي نتصافق انا وانت
منصور ضحك وقال : منجدتس وواثقة انتس بتفوزين
سلمى ابتسمت وقالت : حبيبي ترا رجعت قوتي لي ولا باقي تحسب اني حامل ؟
منصور : جوووي تم اجل
وصلوا بيتهم ونزل منصور وساعد سلمى وشال ولدهم بين يدينه ودخل فيه البيت ودخلت سلمى وسكرت الباب وراها وقالت : نزل ذيب وتعال
منصور ابتسم وقال : واثقة اني بسميه ذيب يعني ؟
سلمى وهي تصفق ومتخصرة قالت : اعجل بس
طلع منصور لغرفتهم ونزله ورجع نزل لها وركض علطول وانخرشت سلمى وصرخت وصارت تركض ومنصور ميت ضحك ع شكلها ويركض وراها وصرخت اول م حاوطت يدين منصور خصرها ورفعها بين يدينه ومشى فيها وجلس ع الكنب وسلمى بحضنه وقال : هاه حبيبي ؟
سلمى ناظرت فيه بحدة وقالت : ابععد
منصور صار يعاندها وسحبها له وقطع المسافة بينهم وانهارت سلمى احراج وقالت : ذيب يبكي بروح له
منصور ابتسم وباس خدها قريب من مبسمها وقال : لا معليتس م يبكي
سلمى : طيب اسمعني بنسميه ذيب خلاص ؟
منصور هز راسه بنفي وقال : لا مو عاجبني اسم ذيب طيب !
سلمى دفت منصور وقامت علطول وقالت : تستهبل صح !
منصور ابتسم وانسدح وقال : لا م استهبل
سلمى بصراخ : منصصورر عطيييت اخووي السمااوة تستهببل انت !!!
منصور فز ومسك فكها ورفعها له وقال : ويمين بالله اذا م قصرتي حستس اني لا ازعلتس !
سلمى نزلت دموعها وقالت : زعلتني اصلاً
منصور قرب وجهه منها وقال بحدة : سلو ! بس عاد
سلمى ابتسمت اول م سمعت دلع جديد من منطوق منصور لكن ابتعدت وقالت بصوت مهزوز : ي نسميه ذيب ي لاتشوف وجهي ولا تشوف وجه ولدك !
منصور بصراخ : كلااامميي اللي يممشيي اناا الرجااال هنااا وذاا ولديي الاوول !! حططي عقلكك برراسك ولعااد تحارشيننيي بأمور انا اولى فييها !!
سلمى لفت بصدمة وقالت وهي تبكي : منصوري كل ذا بخاااطرك علي ؟!
منصور مشى وطلع من البيت وسكر الباب وراه وطاحت سلمى ع الدرج وقالت وهي تمسح دموعها : ماشاءالله امه شغالة صح ! ولاعبة فيه لعب لدرجة لهجته قلبت !!
طلعت سلمى لولدها اللي بكى ع صراخ ابوه وسكرت باب الغرفة عليها ..
" في بيت سعود "
دخل هو وعهود وسحبت شنطتها واستوقفت يده عهود وقال : خليها انا اشيلها
عهود ابتسمت وقالت : شدعوة اسحبها بس
سعود ابتسم وقال : خليها تكفين
عهود تركتها وشالها سعود وشال اغراضها كلها ولفت عهود بنظراتها للبيت كامل وكان وسييع وفخم وطغاه اللون الابيض ابتسمت وقالت : حلوو مرره ماشاءالله !
طلع سعود وقال : م بتنزلين عبايتس ؟
عهود نزلت نقابها وشيلتها وعبايتها وعلقتها ولفت له وكان سعود يناظرها بحب ومتكي ع الكنب ابتسمت وقالت : وش ؟
سعود ابتسم وقال : جميلتي وصرتي حلالي وهل فيه سبب غير ذا يخليني ابتسم كذا ؟
عهود رفعت حاجبها وقالت : الله الله !
تركت شعرها وصارت تلعب فيه وكانت لابسة فستان ابيض ضيق وبارز لسعود ملامحها تقدم لها وحاوط بيدينه خصرها وتوسعت عيونها وقالت : سعود !
سعود حط راسه ع كتفها وقال : يعيونه انتي لبيه يعهودي
عهود ضحكت وقالت : تحبني ؟
سعود : اسألس بالله ذا سؤال ؟
عهود لفت له وحضنته وقالت بجدية : م ابي منك شيء بس ابيك تحطني بعيونك ولا تزعلني لأن ذياب اول من بتواجهة وبعده حمد وسامي وتعرف كيف ذياب وغير ذياب انا وزعلي الشيين خلني اشوف الدنيا بعيونك وبحبك ودلعني ولا ترفض لي طلب وانا والله بعاملك باللي احسن منها وزود
سعود ابتسم وحاوطها وشّدها عليه وقال بصوته الرجولي : ابششري باللي يطيب خاطرس يبنت هادي ابشري
عهود ابتسمت وقالت : تبشر بالجنة يعيونها
دخلوا اثنينهم وصار سعود يلف ع البيت ويعرف عهود عليه ...
" في بيوت اهل قاضي "
رعد طلع واستقبله حضن كاسر له وهو يقول : تستاهل يبو ايهم والله انك تستاهل
رعد حاوط اخوه وشّد عليه وقال : عقبالك يالكاسر
كاسر ابتسم وقال : وانا معك ترقيت ابشرك
رعد بعد منه وتوسعت عيونه وقال : اسألك بالله ايش ؟
كاسر ابتسم وقال : م اني كنت قائد جناح ؟ صرت عقيد طيار
رعد شقت الابتسامة وجهه وقال : ماشاءالله علييينا يعيال محمد
كاسر : اييه اللهم لا حسد
ذيب رفع حاجبه وقال : ايه كاملين والكامل الله لكن ربي م رزقكم عقول الله يخلف علينا بس
طاحوا العيال يضحكون ع رد ذيب وانصدم اول م تقدم رعد له وقال : شفيييك يالرعد نمزح لاحول ولاقوة الابالله !
رعد ابتسم وقال وهو يأشر لذيب بمعنى " تعال " : طيب م بسوي شيء ليه تهرب افا يالذيب
ذيب وقف قدام رعد وضربه رعد وطاحوا يضحكون اثنينهم وقاطعهم صوت فارس الحزين وهو يقول : يالرعد ترقيت ؟
رعد لف له وشاف كيف ملامحه حزينة وابتسم بضيق وقال : ارحب يفارس قلبي ارحب
تقدم فارس وحضنه رعد بكل حب وبكل قوته : ايه ترقيت ابشرك
فارس ابتسم وتغرقت عيونه دموع وقال : ماشاءالله عليه عضيدي وسندي الله يبارك لك يروح فارسك وابشر بالمعونة لبى روحك
رعد شّد عليه وقال : افاا يالفارس م بيننا والله العظييم ان وجودك يكفي
فارس مسح دموعه بشماغ رعد وقال : معليش جاي كاشخ جعله بقلبي وانا امسح دموع الفخر بشماغك
رعد ضحك وقال : والله اني فدااااك من ساسي لراسي
محمد تقدم وقال : وانا مالي حق بأحضانكم
ابتسم رعد وسحب محمد وحضنوا بعض وقال فارس : يحبي لكم يعيال
ذيب اشر لكاسر وتقدموا وحضنوا بعض كلهم وقال رعد : طيب والله انه من كبر حظي يوم اشوفكم تحفوني كذا وفرحانين فيني عاد لا نقصر مع منصور
محمد ابتسم وقال : ماشاءالله حتى النسيب ترقى ؟
ذيب : ايه علمني
ضاري وزايد طلعوا من المجلس وقالوا بصوت واحد : وش العلم
ذيب ضحك وقال : ابد حضن جماعي تعالوا
زايد ركض ونط فالسماء وشلوه العيال كلهم وقال : عيييال بصيييير اب
رعد انفجر يضحك وقال : يلعننا يعيال شغاليين !!
ضاري تنحنح وقال : اي والله وانا معكم
طاحوا العيال يضحكون وشوي وكل واحد فيهم ركب سيارته مع حرمته واتجهة لبيته متجهزين لتمايم صغارهم بكرا ..
" في بيت زايد "
دخل الحوش وحصل جده فهد موجود وجدته ابتسم وقال : عساه خير دقيتي عليهم ؟
جيهان : لا والله ولا كلموني حتى
نزلوا اول م سكر زايد الكراج ودخل وقال : ارحبببووا
ابو جيهان ابتسم وقال : يالله انك تبقيييه
زايد تقدم وباس راس جده وقال : وش المفاجأة ذي ؟
ابو جيهان قال : والله قررنا نجي نسكن بالرياض وقلنا نمر ع بنتنا نشوف وش وقعها
جيهان قربت وسلمت ع امها وابوها وقالت : والله تووي صرت بخير
زايد ابتسم وقال : وابشركم ان جيهان حامل
ام جيهان ابتسمت وقالت : الحمدلله يارب الله يبشرك بالخير
زايد : امييين يجدة وياتس اقلطوا
ابو جيهان : لا والله اكرم الجايات اكثر وبكرا اول الغيث
زايد م كان وده يلزم وهو تعبان عشان كذا قال : ع خيير ان شاءالله
طلع ابو جيهان وامها وسكر زايد الباب وراهم ودخل وكانت جيهان منسدحة فالصالة قرب زايد وانسدح جنبه وحط وجهه عند صدرها وغمض عيونه معلن استسلامه للنوم وفالجهة المقابلة جيهان ابتسمت ودخلت اصابعها بشعره وهي تشوف كيف زايد انقلب صار يعطيها م وراه ودونه ..
" في سيارة ذيب "
ذيب مشى متجهة لمستشفى لين ووقف فالمواقف وانصدمت وقالت : لحظة وش نسوي هنا ؟
ذيب نزل وقال قبل يسكر بابه : انزلي واقولتس
نزلت لين وهي تقول : اللهم اجعله خيير
ذيب ضحك وقال : خيير ونص بعد
مشوا ودخلوا وقالت موظفة الاستقبال : كيف اساعدكم
لين ابتسمت وطلعت بطاقتها وقالت : م يحتاج قلبي
موظفة الاستقبال : اهلاً وسهلاً دكتورة لين
لين : هلا بتس
دخلت لين غرفتها وقالت : هاه وش ؟
ذيب بحماس : وين غرفة الاشعة ؟
لين بقلق : وشفيييك ؟
ذيب : يبنتي ذيك حقتكم يالحوامل
لين ضحكت وقالت : السونار ؟ تبي تسوي لي ؟
ذيب صفق وقال : علييتس نور يالله ؟
لين بفرحة : يالله
دخلت الغرفة ولبست وخلصت ولبست ذيب الرصاص وشّدته عليه وانسدحت وقالت : تعال تعرف صح ؟
ذيب رفع اكمامه وقال : افا عليتس ازهلي العقيد ذيب بن عبدالله بن قايد يفحص عليتس
لين رفعت راسها وقال : عقييد !!
ذيب ابتسم وقال : ايه نعم ترقيت اكيد اني بمسك مهمة قريب لكن الشكوى لله
لين مسكت وجهه وقالت : ليه م تصير زي رعد ؟
ذيب : رعد كان مثلي لكن حول فالمكتب وم ينزل الميدان كثيير وهذا اللي خلاه يوصل رتبة فريق بسرعة عشان ادائه الاكثر من مبهر فالميادين وانا بتكون ذي اخر مهمة لي وبعدها خير ان شاءالله
لين ضحكت وحضنته وقالت : ع البركة يحبيبي وتستاهل فرييق اول بعد بس هم معميهم ربي
ذيب حاوطها وضحك وقال : ابششري بعززتس يبنت محممد
انسدحت لين وبدأ ذيب ييتحرك ع شروحاتها له ويقول : بس كذا الكمية تكفي ؟
لين وهي تضحك وتصور بكاميراتها قالت : ايه ايه يكفي ترا شوي بس تحط من الكريم
ضحك ذيب وحط الجهاز وعلطول نزلت دموعه وقال : ليينني تشوفييينه
لين ابتسمت ومسكت يده اللي تحرك الجهاز ع بطنها قالت : ايه اشوفه يعيون ليينك
ذيب كان منهااار ومبسووط وملامحه سعيدة بشكل يعور القلب ابتسم وطبع صورتين له وللين ومدها لها واخذتها لين بحب وقرب ومسح بطنها وباسه بكل حب ممن ادى لرعشة جسمها وضحكت وقرب وحضنها وقال : الله يتمم ع خيير يعيون ذيبتس
لين حاوطته وقالت : امييين يروحها
طلع ذيب عند الباب ولبست لين وخلصت وجات من وراه وفكت الرصاص وخلصت وقالت : يالله مشينا ؟
ذيب مسك يدها وقال : يالله يقلبي
وصلوا للبيت ونزل ذيب وشاف لين تركض وقال : وانتي بتصيرين ام وللحين هبلة اعقلي لعنبو ابليستس !
لين بصراخ : سدد حلقكك ابي الحماااام
ضحك ذيب وسكر سيارته ودخل وقفل باب البيت وراه ودخل الصالة وقال بصوت عالي : لييني اذا خلصتي تعالي همزيني
لين ابتسمت فالحمام وطلعت بعد م غسلت جسمها وتوضت لصلاة العشاء طلعت ودخلت غرفة الملابس وطلعت لها بجامة شورت وردية ولبستها وتعطرت وحطت كريم ع جسمها ويدينها وفكت شعرها ونزلت للدور الاول وشافت ذيب يتابع مباراة ومتحمس
لين ابتسمت وقالت : تستهبل اهمزك وانت حاط مباراة وبتشد اعصابك ؟
ذيب لف لها وتمنى انه م لف كانت لين اخاذه بمعنى الكلمة ابتسم وطفى الجهاز وقال : اعنبوه من جهاز تعالي وقربي مني
ابتسمت لين وجلست وانسدح ذيب ع فخوذها وقال : وش اهمز ؟
ذيب : راسي تكفين ي ليني
لين دخلت اناملها بشعره وصارت تهمزه وشوي وداخ ذيب نايم بحضنها ابتسمت لين وقال بهمس : ذيبي
ذيب همهم لها وقال : هممم
لين : يحبيبي صليت ؟
ذيب قام بهدوء وقال بصوته اللي ثقل فجأة : تعالي نصلي وننام والله اني دايخ
لين مسكت يده وقالت : يالله
دخلوا غرفتهم واول م خلص ذيب كانت لين سابقته ومنسدحة ودخل الفراش معها وحضنها ونام علطول وماهي الا دقايق ولحقته لين ..
" في بيت رعد "
رعد كان يسابق ايهم ويضحك ويقول : بتفوز ع بابا !
ايهم كان يضحك وقال : بااابتيي
رعد شاله من الارض وباس خده وقال : يروووح ابوك لبيييه
ايهم ابتسم اول م شاف هيام وراهم وقال : مامي
رعد ناظر بهيام وقال : تعالي اخذيه بدخل اتروش
هيام تقدمت وشالت ايهم من رعد وقالت : بتطلع شيء ؟
رعد ابتسم وقال : ايه بالله بطلع وييين يهيامي شايفة الساعة ؟
هيام بجدية : طيب وشو له ذا كله المهم بتتعشى ؟
رعد مشى وقال : ايه
هيام نزلت ايهم في المربع الخاص فيه وكان ملييان العاب وصار يلعب فيهم ودخلت هيام المطبخ وسوت مكرونة بشاميل وجهزت وحطت اكواب وجابت العصير وحطت كل شيء ع الطاولة وقالت بصوت عالي : رعد تعال العشاء
م وصلها صوته وتوقعت انه للحين يتروش طلعت وم شافت ايهم وركضت للدور الثاني ودخلت الغزفة وحصلته ينوم ايهم وقال بهدوء : اششش انزلي بجي
هيام ابتسمت وقالت : اف يحلوكم يعساني م انحرم منكم
رعد ابتسم لها ولفت هيام ونزل ايهم ولحفه وركض علطول ورفعها بين يدينه وقال : وش مزييينه الحلوة ؟
هيام ابتسمت وقالت : انتبه تطيحني بس
رعد : اوهووو يهيام الرعد للحين م وثقتي ؟
هيام ضحكت وقالت : اخااف مو عن ثقة !
رعد مشى للطاولة ونزلها وقال : كأنتس تعرفييين وش بخاطري
هيام جلست وقالت : بالعافيييية يارب
رعد ابتسم وباس راسها بقوة وقال : اوووه يعافيتتس يالدنيا
بدؤا يتعشون وصار رعد يحكي لها شلون ترقى ومن هالسوالف وبعدها قرروا يسولفون عن العرس اللي بعد اربع ايام وش بيلبسون وشوي وخلصوا وتساعدوا بالمواعين
رعد : جففيها لاتنسين
هيام رفعت حاجبها وقالت : وش اسوي انا الحين ؟
رعد ابتسم وقال : خلصت انا
هيام : وانا بعد
رعد مد يده وشابكت هيام يدها بيده وقال : الحييين تجييك النومة الاسطورية
هيام : اي والله
مشوا وطلعوا لغرفتهم وفعلاً بالثانية اللي دخلوا فيها انسدحوا وناموا نوووم عميييق ...
" في سيارة كاسر "
وقف عند الاحوال المدنية وقالت وعد : وين ؟
كاسر ابتسم وقال : بسجل اسم الحلو اللي بحضنتس واضيفه لكرت العايلة
وعد ابتسمت وقالت : تممت ع الرعد ؟
كاسر : ايه بالله
وعد : اجل ندعي يصير زي عمه وابوه رجاال
كاسر ابتسم وقال : اميين يارب
نزل كاسر وم اخذ وقت طويل الا وهو راجع ومع الكرت وفتح باب سيارته وركب وقال : وهذا ولدنا وتسجل بأسمنا
وعد شابكت يدها بيد كاسر وقالت : يالله عساني م انحرم
كاسر : منتس يارب
مشوا لبيتهم واول م وصلوا دخلوا وكالعادة كأي روتين صلوا وتجمعوا بالصالة اول م نام رعد وحطته وعد بسريره
كاسر : اووف مشتهي بيتزا
وعد نطت جنبه وقالت : نطلب ؟
كاسر : لا تعالي نجهزها انا وياتس
وعد ابتسمت بحب وقالت : الله نسويها ع شكل قلب ؟
كاسر قام ومسك يدها وقال : تجي ؟
وعد : ايييه وتصييير تجنن بعد
كاسر : هذا المعنى الحقيقي لصنعت بحب
وعد فزت ورفعت رجولها وباست خده وقالت : مع من تحب
كاسر شالها ودار فيها وهو يقول : يجععلننيي م خلااا
وعد ضحكت وقالت : منك يااارب يكاسر الوعد
كاسر باس مبسمها وقال : وعساني م كسرها
نزلها وبدؤا يطلعون العجين وكل مكونات البيتزا واشتغلوا عليها وحانت اللحظة اللي دخلوها فالفرن
وعد بحماس : الله تجننن !!!
كاسر ابتسم وقال : مو كثرتس خلي مني
وعد حضنته وحاوطها كاسر وقال : تعالي ندور شيء نتابعه
وعد : يالله
مشوا للصالة وجهزوا فلمهم وشوي ودق الفرن وراح كاسر يجيبه مع العصيرات اللي جابتها وعد وبدؤا ياكلون بحب مع بعضهم وناموا ع حالهم وبنفس اماكنهم وبأحضان بعضهم ...
" في بيت ابو منصور "
منصور خلص فنجاله وقال : اجل انا استأذنك يبه
ابو منصور ابتسم وقال : قبل تروح وش قررتوا انت وسلمى ؟
منصور تذكر دموعها وم طاوعه قلبه يقول عكس رغبتها وقال : والله بنسمي ع ذيب
ابو منصور : ماشاءالله والله ونعم بالذيب وبأهله لكن عليك دين تسمي علي
منصور ضحك وقال : لا تكفى
ابو منصور ضحك وضربه وقال : شف الوسخ !
منصور طاح يضحك وقال : افا علييك يبه ابشر بس بعد ثلاث بزارين
ابو منصور : انقلع بس
ام منصور قاطعتهم من ورا وقالت : ماشاءالله انا كلامي يدخل من اذنك اليمين ويطلع من اليسار ولا ووش !!
ابو منصور بحدة : وييميينن بالله ي منى اذا م تعدلتي لا اعدلك الولد وزوجته وشدخلك بيينهم !!
منصور طلع بدون اي رد ووقف بعد مدة قدام الاحوال المدنية ونزل وسجل اسم ولده بأسم " الذيب " ضاف ال التضخيم والتفخيم لأسم ولده ومشى لبيته ووصل ونزل وسكر سيارته ودخل البيت وكان هادىء سكر الباب وراه ومشى لغرفتهم وكان الباب مقفل وموجودة رسالة تحت الباب ابتسم منصور ونزل لها وسحبها وقرأ المكتوب وكان :
منصور زي م زعلتني مستحيل ارضى بسرعة عشان كذا بتنام برا وبعيد من حضني جدًا يالله اشوفك بكرا !
ضحك منصور ودق الباب وسلمى كانت صاحية وقربت وقالت : خير م قريت يعني ؟
منصور م تكلم ونزل كرت عايلتهم ودخله من تحت الباب واستغربت سلمى ونزلت وطاحت عينها ع اسم " الذيب " شهقت وفتحت علطول وحضنت منصور اللي حاوطها وقال بأستهزاء : مستحيل ارضى بسرعة يشيينك بس
سلمى عضت اذنه وقالت : اللهجة ؟
منصور مشى فيها داخل غرفتهم وقال : خليتس منها الحين تم رضيتي ؟
سلمى بحماس : وواجد بس !!
منصور ابتسم وباس خدها وقال : اييه م ابي اشوفتس زعلانة ابدًا
سلمى ابتسمت وقالت : وانا معك بزعل ؟ اسمع ليه ضفت اللام ترا ذيب م اسمه كذا
منصور ابتسم وانسدح وقال : اعتبريها اضافتي الخاصة
سلمى انسدحت بحضنه وقالت : واااه يكبر حظيي
منصور قرب وباس راسها وانسدح كويس ونام علطول ولحقته سلمى وقلبها شوي ويطير من الفرحة وهي تتخيل ردة فعل اهلها ....
" فالصباح تحديدًا الساعة ٥ في بيت ذيب "
صحى ذيب ع اتصال وازعاج جواله سحبه وقام وطلع من الغرفة فالشرفة ورد وقال : هلااا بلال
بلال ابتسم وقال : هلااا بك عساني م صحيتك ؟
ذيب : الا الله يجزاك خيير صحيتني للصلاة امرني ؟
بلال ضحك وقال : طيب نفس النكبة اللي راحت فيه واحد كلب اسمه رائد سجل اسمائنا في مهمة
ذيب بحدة توسعت عيونه وقال : لا عاااااد !
بلال : المصيبة انه ولد عمة خالد يعني الحقد واضح
ذيب مسح وجهه وشنبه وقال : يارب صبرني متى نباشر ؟
بلال : بعد ٤ ساعات
ذيب ابتسم وقال : يالله يحبيبي بسكر انا
سكر ذيب ومشى للحمام وتوضئ وصلى وسلم وخلص وقام ونط ع السرير وصار يهز لين اللي م صحت ابدًا وطفش ذيب وهو يصحي فيها وحضنها بكل قوته وباس راسها بقوة وقال : ودعناتس ربي
مشى وحط سلاحه بمكانه وكتب لها رسالة ع التسريحة تركها وطلع وسكر بيته وراه وطلع علطول بسيارته للمهمة اللي بالقصيم ..
" في بيوت اهل قاضي تحديدًا الساعة ١١ صباحًا "
الكل كان موجود وينتظرون كاسر ووعد يوصلون
كاسر وقف عند بيت ذيب وطلعت لين معها ورد وهدايا ابتسم كاسر ونزل وقال : هلا بالمحمول
ضحك اول م ضربته لين وقالت : لعنه يالسربوت انتبه عليها بس
كاسر : وين ذيب ؟
لين ركبت ونزل كاسر الهدايا فالسيارة مع هداياه هو ووعد وسكر الشنطة وركب وقال : ايوه ؟
لين : ابد والله عنده مهمة
كاسر بملل : والليييل !
وعد ابتسمت وقالت : ممكن يجي قريب
لين : ايه بيجلس ثلاث ايام يعني كويس بيحضر الزواج
كاسر : اششوا بيحضر
لين : ايه بالضبط انا خفت اصلاً
مشوا بعدها لبيوت اهلهم ووصلوا والكل نزل والكل استنفر يجهز اماكن الهدايا لوعد الكاسر وسلمى المنصور
" عند الحريم "
دخلوا لين ووعد وقالت سلمى : م بغييتوا
لين ضحكت وقالت : ووشو البركة في اخوتس م جاء
سلمى شهقت وقالت : لااااا ويينه ؟؟
لين : في مهمة وبيرجع بعد ثلاث ايام ع خير
سلمى بحزن قالت : اافف يارب
وعد مسحت ع ظهرها وقالت : معليه يحبيبي معلييه
ام ضاري بضيق : استودعته الله
لين بحزن : اميييين
ام محمد بعصبية : وبعدييين !! امشووا للمجلس الحريم بيجون
مشوا البنات مع جدتهم ووصلوا المعازيم كلهم
" بدون اي احداث مهمة بعد ٣ ساعات "
تجمعوا بنات مها وحفيداتها وزوجات عيالها يفتحون الهدايا
سلمى بحب : يالله شوفوا ذيب وش جايب !
رفعت لهم خاتم حجر كريم اسود صغير ع مقاس يد ولدها وعلطول سحبت حنين الذيب واخذت الخاتم ولبسته وانهاروا البنات من صغر حجمه
لين ضحكت وقالت : وقفي بصوره مع الورد
صورته لين وكتبت بالستوري " عاش الذيب وعاش من هو سمّيه❤️ " ونشرتها وشوي ووصلها فويس من ذيبها وكان يقول فيه :
ماشاءالله والله وضبط ع يده فدييته سمّي خاله هو
سلمى بحب سجلت فويس له وهي تقول : م تقصر ينظر عيني وعضيدي
سكرت لين جوالها وبدؤا البنات يباركون ويصارخون بحماس
شوق بحماس : بنات شوفووا هديية الرعد !!!
هيام ضحكت ودخلت ومعها ورد داخله مفتاح سيارة مرسيدس ومع الورد مبلغ وقدرة !
وعد قامت بصدمة وقالت : السيارة لمين ؟
هيام بفرحة : لسمّي رعّودي
وعد حضنت هيام بكل قوتها وقالت : يمه صدق مرره شكرًا لتس وللرعد
هيام حاوطتها وقالت : شدعوة وعدي شدعوة ؟
سلمى ابتسمت وقالت : اذا ذي هداياه بالمولود اجل لو يتزوج ؟
بشرى ضحكت وقالت : عزتي لبنتي م عندها احد شكلي بحول ع عيالتس يخولة
خولة ضحكت وقالت : م عندي الا مشاري واكبر منها بخمس سنوات عادي ؟
بشرى : شوفيني انا ومحمد بيننا ٩ سنوات وعادي
خولة : اجل تم تبشرين به
هيام زغرطت وقالت : وولدي لليما خلاص
حنين ضحكت وقالت : وجاته لييما
تقدموا وصاروا يسولفون ويضحكون مع بعضهم ..
" عند الرجال "
كاسر بحدة : والله يالعضيد انها كثييير قسم بالله
رعد : يخوي ماهي لك لسمّيي وشفييك محترق !
كاسر ضحك وحضن رعد بكل حب وقال رعد : لك ترا بس كنت انتظر تجيب مولود واول م سميت علي قلت بسس هذي هي
كاسر : اني عارف يحمار !
رعد توسعت عيونه وقال : رجعها
طاحوا العيال يضحكون وقال منصور : والله وذيب بسم الله عليه م خلى شيء الا وجابه !
ضاري : طبعًا !
زايد بفخر : ايه ايه لازم
رعد ابتسم وقال : زيود متى جاء جدي ؟
زايد : اص تكفى امس لخمني اول م حصلته بحوش بيتي
انفجر كاسر يضحك وذياب معه
رعد مسح وجهه وشنبه وقال : اااه كاسر متى بتعقل
كاسر وهو طايح ع ذياب يضحك قال : يخي خلني اضحك
فارس ابتسم وقال : وهو صادز خله
رعد : طيب عرفتوا ذيب متى بيرجع ؟
كاسر كح وعدل صوته من الضحك وقال : ايه بعد ثلاث ايام
ذياب : جوووي قبل زواجي !
محمد : الاصح بيوم عرسك انت والدبشة سعود
حمد بحدة : خيير كل شيء الا النسيب
سامي : حمد مسوي فاهم نسيبنا كلنا يالتيس
رعد ومحمد بصوت واحد قالوا : اعقبب
عكس الباقيين اللي طاحوا يضحكون وقال حمد : حييي عيينكم يحمود ويالرعد
رعد ابتسم وقال : حيي نباااك
محمد : الله يسلم عيينك يحميد
جلسوا العيال وحمد يرافس سامي ويقبصه وسامي يردها والضحك والمهاوش كان ماخذ الجو بجهة العيال ...
" فالقصيم "
ذيب بتعب : اه يارب تعبت من اول يوم !
بلال انسدح وقال : يالله هانت اهم شيء انها يومين اللي بقت
ذيب : ايه وجوالاتنا معنا
بلال : تشوف فيه فيه حسنات
قاطع حديثهم صوت طلق النار وطلعوا ركض بلال وذيب وصرخ بلال وقال : ذيييب !!!!
احد العساكر طار علطول وشال جثته اللي طاحت قدامهم كلهم والكل ساعدوه وشوي وقال حافظ : بعلم اهله طلعوا لي سجل الارقام
احد العساكر : توفى ؟
العقيد حافظ : ايه الله يرحمه
العسكري : لا اله الا الله !
سحب السجل علطول وقال : وش اسمه ؟
العقيد حافظ بحزن : ذيب بن عبدالله
العسكري صار ينزل ويقرأ وقال : اقرب رقم له هو الفريق رعد بن محمد بن قاضي
العقيد حافظ مسك راسه وقال : رعد !!! لا اله الا الله انا لله وانا اليه راجعون
سحب جواله ودق ع رعد ..
" في بيوت اهل قاضي "
كل العيال طلعوا للحوش وتجمعوا فيه ومن السوالف والحكي
رعد قاطعهم وهو يقول : عيال شوي اسكتوا والله يستر وش عنده العقيد حافظ يدق
محمد نزل فنجاله وقال : رد
رد رعد ووصله صوته وهو يقول : حضرة الفريق رعد ؟
رعد : ارحب حضرة العقيد حافظ امرني ؟
حافظ بحزن قال : عظم الله اجركم في ميتكم
رعد فز وانتفض جسمه كله وقال : هااااه ؟
حافظ : ذيب بن عبدالله تصاوب بقلبه وفقد الحياة علطول
رعد مشى قدامه شريط احداث بتصير وكيف انهيار لين اخته وقال بصوت عالي : لاااا اله الاااا الله اننااا لله وانااا اللييه لرااجعووون
فزوا العيال كلهم ومسك كاسر قلبه وقال : ذيييبب !!!!
طاروا كلهم لسياراتهم تحت صراخ جدتهم وهي تقول : ع ويين !
محد جلس ع الفرشة الكل غادر ومسكوا خط للقصيم
ام محمد مسكت عصا قاضي بقوة وقالت : الله يستر وراهم !
ابو رعد طلع وقال من وراها : افا وين راحوا ؟
ام محمد : مدري دق ع رعد وشوف وش وراهم
ابو رعد مسك جواله ودق ع رعد وكان مشغول ولف لأمه وقال : يمه م يرد الله يستر
ام محمد : الكل معه دق ع واحد منهم !
دق ابو رعد ع محمد ووصله صوته المهزوز وهو يقول : هلا يعمي
ابو رعد بحدة : حمود وش العلم ؟؟!
ابو هيام وابو ضاري طلعوا وقال ابو هيام : وشفيكم ؟
محمد بحزن قال : يعمي ذيب تصاوب
ابو رعد : هو طيب ؟؟ ولا فييه شيء
محمد علطول خنقته العبرة وقال بصوت باكي : يعمي ذيب توفى
ابو رعد انصعق وطاح علطول ع رجوله وقال : لا اله الا الله
ام محمد مسكت قلبها وقالت : ووش يمحمد تكلمم !!
ابو هيام بحدة : محممد بسم الله عليييك وش العلمم !!
ابو ضاري : ذيب فيه شيء ؟
ابو رعد بحزن وضح ع ملامحه قال : ذيب مات !!!
لين صرخت من وراهم وقالت : ااايييشش !!!؟؟؟
فزوا عمانها وابوها لها وقالت : ييبه وش قلتت يببه !! لا يبهه تكفى ذيييب كلمتته الييوم بعد رسالللتته تكففىى يببه انا عاارفه ذيييب م يخليينني !!
ابو رعد بحزن حضنها وقال : خلاااص يبنتتيي خلاااص تكفييين
انهاروا كل من في بيت قاضي بعد خبر كسر ظهورهم وكان اول خبر مفجع بعد ابوهم وجدهم وصوت صراخ لين كان يكسرهم زيادة الكل انفجع والكل م توقع ابدًا كذا يصير فيهم قبل فرحتهم ببيان وبعهود وبذياب ...
" فالقصيم "
وصلوا العيال ودخلوا للمستشفى ركض وشافوا الضباط والعساكر كلهم موجودين
منصور بصوت عالي : ذيييب عندكم ؟!!
العقيد حافظ طلع وقال : ايه
زايد م قدر يوقف وطاح علطول وفزوا عيال خواله له وكان رعد جسد بلا روح كان منصفق ولا هو يحس بالعالم
فجأة صرخ احد العساكر وقال : لخبططتوا هذا ذيب بن عبدالله بن فايز ! وولد عمهم العقيد ذيب بن عبدالله بن قايد
شهقوا العيال كلهم وحسّوا بردة الروح وقال رعد بحدة وبصراخ : انااا احاااسب اللي ووصللكم الاسسم غللطط والله لا اجرره وافصلله واسررفف فيييه !!
منصور بهدوء حضن رعد وقال : حصل خييير يالرعد
رعد انهار علطول وقال وهو يشّد ع منصور : اي خيير يمنصور والله لو تذبحني م طلع مني دم نشفوا دمي
محمد بحدة : رعد كاااسرر
رعد فز لأخوه اللي طاح مغمى عليه وكان ضغطه نازل ونقلوه للطوارئ وطلع ضاري وقال : ابي اشوف اخوي الان !
وصلهم صوته وهو يقول : ضاري ؟
ضاري ركض وحضن ذيب بكل قوته وقال : الحمدلله يارب اللي ن فجعنا فييك
محمد ابتسم وقال : يارب لك الحمد
ذيب ابتسم بخوف وقال : وشفيكم ؟!
رعد مسح وجهه وشنبه واخذ موية وشربها دفعة وحدة وقال : عديميين المسؤولية اللي عندك قالوا لنا انك ميت بعيد الشر
ذيب شهق وقال : اسألك بالله !؟! وكااسسر وشفييه جعله بعمرري
كاسر فتح عيونه وقال : بسم الله علييك يالذيب
قرب ذيب وحضن كاسر وبعد منه وسلم عليهم كلهم وقال : علمتوا اهلنا طيب ؟
محمد قام وقال : لا والله الان اقولهم
دق محمد بس محد كان يرد الكل فالرياض كانوا منهارين رجع وقال : محد يرد !
ذيب سحب جواله وقال : انا م همني الا ليني وامي
دق عليها ووصل صوتها المصدوم وهي تقول : ذييب !
ذيب ابتسم بضيق من صوتها وقال : عييونه اسمعي يليني الاسم لخبطوا فيه عشان اللي مات رحمة الله عليه اسمه ذيب بن عبدالله بس نختلف بأسم الجد وانا حيٍ ارزق والله قولي لأهلي تكفين
لين ضحكت وهي تشاهق وقالت : يالله لك الحمد يربي اللي م ذوقتني الفجع والفقد بأعز خلقك علييي !!
ذيب ابتسم وقال : يجعل يومي قبلتس يارب
لين بحدة : لاا ان شاءالله !
سكر ذيب وقامت لين وقالت : لاا ذيييب م مااات لخبططوا بيينه وبيين احد شابه اسمه !
ابو رعد ضحك وقال : اسألتس بالله !؟
ابو ضاري سجد علطول وقال : ياااارب لك الحمد !!
الكل رددوا الحمد والدعاوي للذيبهم والكل سجدوا فرحة لسلامته ..
" عند العيال "
رعد بحدة : الان بأخذه معي !
العقيد حافظ : تبشر والله
وقع ذيب انه كمل ثلاث ايام وطلع وهو يضحك وقال : حمدلله الكل ناظروا فيه بحدة وكمل وقال : احمم اقصد استغفرالله بس يعني كويس م جلست ثلاث ايام
كاسر ضربه وقال : ااااه اي والله الحمدلله
حضنه ذيب وقال : معلييك يكاسري ناشب ناشب لك الله لايعوق بشر !
كاسر حاوطه وقال : اططللقق من يننشب في ذمتتيي
تركه ذيب وراح ومسك ذراع زايد وقال : طحت لبى قلبك يالعضيد وبسم الله علييك
زايد ابتسم وشّد ع ذيب وقال : خرشوني فيك يالذيب
منصور ابتسم وقال : معليييكم سمّي ولدي م بيجيه شيء !
الكل ضربوا جبهاتهم وقال رعد وهو يمسح وجهه وشنبه بضحك : ولدك سمّيه مو هو سمّي ولدك
الكل انفجروا يضحكون ع منصور اللي حك راسه وقال بفشلة : ايييه صح المعذرة معاد معي عقل من اللي صار !
ذيب ابتسم وقال : بعيييد الشر يارب
الكل بصوت واحد قالوا : امييين
ركبوا سياراتهم وقال محمد : حلويييين الرياض صد رد !
رعد : الله المستعان يحمود
محمد ربط حزامه وقال : توكلنا ع الله لنجد العذية
مشوا كلهم وووصلوا بعد ثلاث ساعات وكملوا ٨ ساعات فالصد والرد والسفر ذا كله والخرشة اللي صارت لهم ودخلوا بيوت اهل قاضي والكل كانوا فالحوش
ذيب وهو مع كاسر ابتسم وقال : يروحي ع لين
كاسر بحدة قال : ووللدد محاارمناا
ذيب ابتسم بسخرية وقال : والله ان تشبع ذي الحذيان من وجهك
انفجر كاسر يضحك ونزل ذيب وعلطول حضنته لين بكل حب وتركت الكل يشوفهم ويعرف ان لين كانت خايفة عليه حاوطها ذيب وضحك وقال : خلاص يالقمر خلاص لييه الدموع يالمزييونه ؟
لين ضربت راسه بخفه وقالت : اه خوفوني والله صرخت حسيت روحي بتطلع وقسم بالله
ذيب ابتسم وقال : بسم الله الرحمن عليتس
لين رفعت نقابها وحطت خشمها بين بدلة ذيب ورقبته واستنشقت عطره وقالت : يارب لك الحمد ع سلامة حبيب الروح وحبيب ليينه
ذيب ابتسم وشّد عليها وقال : يسلمتس ربي يعيون ذيبتس
رعد تنحنح وقال : لين خلصتي ؟
لين بعدت وقالت : اف اف شوفوا من يتكلم استاذنا القمة فالاحترام رعد بن محمد !
رعد توسعت عيونه وقال : احلفيي !؟
كاسر انفجر يضحك وقال : جوووي ليين عطييييه
لين ضحكت وقالت : وانا صادقة !
رعد قرب ومسك خشمها وقبصه وقال : وسخة ترادين اخوتس الكبير !
لين باست خشمه وقالت : نمزح مع اخوي الكبير
رعد ابتسم وقال : يجعله فداتس
مسك يدها ودخلوا كلهم بعد صراخ وبكى من خوات ذيب وامه وجلس ساعة يسكت فيهم لين استوعبوا انه قدامهم وبدأت السوالف تزيين والضحك والفرحة اللي الكل كان يدعي ان ربي يجعلها دايمة ببيت جدهم قاضي ..
" بعد ساعة ونص "
ام محمد بعصبية : قوموا قام نقمكم انت وياها ع البيوت يالله ورانا عرس بعد يومين يالله !!
ام رعد ضحكت وقالت : ابشري يعمة
ام فارس : عصبت مهاوي عصبت
ام محمد ضحكت وقالت : م اقوى بس يالله امشوا
ام فارس ضحكت ومسكت يدها ومشت معها لغرفتها والكل طلعوا لبيوتهم ..
" بعد يومين بدون اي احداث مهمة تحديدًا يوم زواج بيان وعهود بذياب وسعود "
الكل تجمعوا بالقاعة والكل كانوا يتكشخون
" هيام تزينت باللون البيجي وكانت تفتن بمعنى الكلمة ! "
" حنين تزينت هي وليما باللون الابيض "
" لين بلونها الوردي المفضل تزينت ولبست فستان وردي "
" سلمى بعوايدها لبست وتزينت بالازرق بعرس اختها "
" بشرى تزينت بالبرتقالي الفاتح ولميس طابقت فستان امها "
" العنود تزينت باللون الاسود "
" صالحة وجميلة تزينوا باللون الاصفر "
" وعد تزينت بلونها الاحمر القرمزي "
" شوق تزينت بالفستان النمري "
" جيهان تزينت باللون الاخضر الغامق "
" غدي تزينت باللون الكحلي "
هيام بحماس : خلاص جهزتوا ؟
حنين : انا ايه
سلمى : وانا بعد مشينا ؟
طلعوا الثلاثي مع بعضهم للقاعة وبدؤا الحضور يوصلون وكان من اكبر افراح وزواجات اهل قاضي وشوي وطلعوا كل البنات وابتدأ زواج الحريم من منطوق الطقاقة وهي تقول :
طير الفرح غنى في بيت اهل قاضي واهل صالح
والسعادة حلّت في قلوبهم وعسى الحزن عنهم بعيد
اجمل عروستين عهود وبيان يا رب بارك لهم ووفقهم
واتمم عليهم فرحتهم بسعود وذياب وارزقهم الحظ الفالح
-
زغرطوا الحريم وبدؤا يرقصون ويصفقون والفرح والسعادة كانت ماخذه الجو ..
" بعرس الرجال "
رعد بحدة : عياال شوي تركييز الفرقة وصلوا !
كاسر صف جنب اخوه وتم صفهم من النص اللي كانوا واقفين فيه ابو رعد وابو ضاري وابو هيام وابو سلطان والباقيين انقسموا من يمينهم وشمالهم ومقابلهم صف اهل صالح كلهم
والفرقة دخلت الزواج واصوات الطق والاهازيج معتليه في اذن كل حاضر وهم يقولون :
ليلة ما يقدر يعيد الكـــون هدبــــــها
لليلـــــة اهــل قــاضــي واهــل صــالـح انور نورهــا زود
و السمـــاء نجومها اضوت في ذهبــها
كيف ما تضوي و الكل حــــاضر و موجــــــــود
بشـــــوق المحبة نلتقي من سعــــــدها
عـــرســـانـــا ياكل الحسن فيــهم موجود
وخــذوا مـن يغـــــار البدر من طلة هدبــــــها
خـــذوا بنت الاصــــل والكـــرم والجود
فــيهم القصـــــــــايد ما توفي سببـــــها
وذيــاب وســعود ياكلون من الشهـــــامة بــــــلا زود
عيــــال الرجــــــــــال و المكـــــــارم هم اهلها
و الله يجعـــل ايامكــــــم حـــــــب و ورود
وســــعــادة يحــــكي بها الكـــون و يعجـــب بها
-
تقدموا احفاد قاضي يعرضون بسيوفهم قدام انظار الحضور وابرزهم احفاد صالح اللي سحبوا سيوفهم ودخلوا معهم فالعرضة النجدية اللي الكل اتفق ع اتقانها
كاسر بصوت عالي : عشششتووواا
محسن ابتسم لكاسر ومسك كتفه وصار يعرض جنب كاسر اللي ابتسم وصار يتمايل مع محسن
سعود ابتسم وتقدم لذياب ومسكوا بعض وصاروا يمايلون سيوفهم ويضربون برجولهم الارض
ذياب بهمس لسعود : عشششتت يعريسس
سعود ابتسم وقال : الصدق انت العريس وعاااشت ايامنا الحلوة يذياب
ذياب بفرحة عظيمة قال : اللهم امييين
رعد صار يتمايل ومحمد وفارس يمشون ع نهجه فالرقص وكانوا ثلاثتهم كالمرايا كل منهم يعكس الثاني
والكل عيونهم ع الرعد اللي اخذ انظارهم مثل م كانت هيامه فالجهة الثانية ماخذه الجو وعيون الحريم اللي للحين يتقدمون لها وترفض وترفع خاتمها لهم
سلمى بصوت عالي : عااااااشت هيييااام الرررعععد
كل حفيدات قاضي زغرطوا ودخلوا معها وكانت هي ووعد ماخذين الانظار بتمايلهم وغنجهم ودلعهم ..
" بعد ساعات نهاية الزواج "
وبعد م اخذ سعود عهوده واخذ ذياب بيانه والكل مشى متجمعين لبيت جدهم قاضي رحمة الله عليه
رعد نزل وقال : يالله احلى سهرة للفجر والله محد يسري
منصور ضحك وقال : سمعت يبه ؟
ابو منصور ضحك وقال : عاد ذا الرعد مقدر اقول شيء
رعد شاف الحريم بيدخلون وقال : لحظظة لحظة ويين ؟
الكل لفوا عليه وكمل وهو يقول : الان كلنا بجلسة وحدة !
سلمى ابتسمت وقالت : تم في ذمتي
رعد ابتسم وقال : حييي عينتتسس يبنت عممتتيي
سلمى ضحكت وقالت : حييي عييينك يالرعد
تقدموا الحريم وجلسوا كلهم حول بعض وجلسة ترد الروح والسوالف الخاثرة والحكي والقديم عن الماضي وكان كل واحد حاضن زوجته وعياله
ابتسم ابو رعد وقال : اشوفكم قدام عيوني وكيف كل واحد معه عايلته وقبل اربع سنوات كلهم كنتوا مقروشيننا ومزعجينا الحمدلله يارب
رعد ابتسم وقال : اجل نرجع نقروشك ؟ كاسر لين حنين
قاموا اخوان الرعد وتقدموا له وحضنوا بعض وضحكوا الكل وطبقوا فعل رعد وقامت هيامه وحضنت محمد وقالت : ووواه يزييننا انا وحمود
رعد رفع عينه لها وقال : يزينتس انتي خلي حمود في خير
بشرى ضحكت وقالت : الا يزييين حمود وخل العذااال مثل الرعد يموتون
رعد ناظر فيها وانفجر يضحك وقال : ااافووووه عاااد من زيين محمد عشان اصير من عذاله
محمد غص بالموية والكل طاحوا يضحكون وقال وهو يرمي العلبة عليه وضربت برعد وفي لين : تستاههل يكلب
لين ضحكت وقالت : وشدخلني انا الحين ؟
ذيب فز وقال : اععقببب تضررببهاا !!!
محمد برعب : سسكننهم مساكنهم
ابو هيام مسك راسه وسد اذانيه وقال : ليتك سكتت يمحمد
ابو رعد قال : والله ليتني امسيت صدق
ام محمد بفرحة : خلووهم يحلوهم والله
وعد ابتسمت وقالت : الله يجبر بخاطرتس يجدة محد مدلعنا كثرتس
ام شوق ابتسمت وقالت : واحنا جحدتونا ؟
ضحكوا الكل وارتفع صوت سامي وهو يقول : حااشى وكلاا نجحد
فارس بحب : الله يديييمها جمعتنا وقعدتنا ولا يذوقنا الفقد ويرحم امواتنا واموات المسلمين يارب
الكل : امييينن
بدؤا البزارين يدورون ع اهلهم والجلسة كلها ضحك وسوالف تجنن من منطوق مها ع عيالها واحفادها كلهم ...
||||||||||||||||||||||||||||||||||||||||||||||||||||||||||||||||||||||||||||||||
" بعد ست سنوات "
ام رعد بعصبية : ي اييهم بسس لعاد تضرب لميس !!
ايهم بحدة : جددة شوفييها تضرب قمرر اختي !!
ام محمد ضحكت وقالت : خليتس منهم
ام رعد : رفعوا ضغطي يعمة
ام فارس ضحكت وقالت : حمدلله ليما وذهب م يزعجون
ام هيام : كلهم فيهم بركة معليتس
هيام طلعت من المطبخ وقالت : كفووو ايهم ايه لاتخلي احد يضرب قمر بنت الرعد !
ايهم : كفوتس الطيب يمه معليتس ازهلي
ام رعد توسعت عيونها وقالت : ذا كلام واحد توو دخل سبع سنين !!
هيام ضربت صدرها وقالت : تربيتتتيي
قمر ضحكت وقالت : كفو ايهم كفو يخوي
ايهم لبس حذيانه وطلع ركض للمجالس وقابل رعد وقال : هلا بسمّي ابوي
رعد لف له وقال : ايهم وش تبي ؟
ايهم استحقره وقال : يشييينك بس خل اروح للذيب
رعد لحقه ومشوا بس استوقفته ضربة في ظهره ولف ايهم بعصبية وشاف لميس واخوها سيف وراها وقالت : اييه يكلب م تضرب اخوي !!
ايهم صار صدره يطلع وينزل وقال : انااا اوريتتس وانا ولد الرعد
رعد ومحمد دخلوا وقال : ونعممم والله
ايهم لف لأبوه وقال : يبه شف لميس ام شوشة ذي !!
محمد توسعت عيونه وقال : يووولدد !
ايهم طلع لسانه لمحمد وركض لأبوه وقال : خال محمد تمسك بنتك ولا كيف ؟
محمد ابتسم وقال : خلها تربييك
لميس طاحت تضحك وقالت : ابلللعع مسويي بتحرض ابوي علي يالبزر !
رعد بحدة : بسس خلاص
لميس ارتعبت وركضت داخل ونزل ايهم ولحقها ودخل رعد للمجلس
محمد : روعتها الله يروع عدوك !
رعد انفجر يضحك وقال : اني متعمد اصلاً
كاسر شال ولده وقال : رعد شف سمّيك المؤدب
رعد لف له واخذه وقال : يحللووه صدق
قمر من وراه قالت : بابا والله لا اعلم ماما
العيال طاحوا يضحكون عليه وقال كاسر : ايييه كفوو حبيبة عمها علمييها
رعد رمى رعد ع ابوه وقال : خذ ولدك المخيس ذا
ذيب ابتسم وقال : شوفوا بس بنتي كيف
قمر بحدة : اييه واضح والله انها ملعوونه اصل !
ذيب توسعت عيونه وقال : من ريم !
قمر : اييه رييم بنت عمة لين
انفجروا العيال يضحكون وشال رعد بنته وقال بصوت عالي : يووولدد طررييييقق
هيام تقدمت وقالت : اح وش مسوية بعد
رعد ابتسم وباس خشمها وقال : امسكيها والاصح امسكي لسانها
هيام ضحكت وقالت : ابششر
دخلت فيها وطلعت قمر للحوش مع بقية العيال تلعب ...
" عايلة رعد الهيام "
رعد عاش ٦ سنوات مليانة فرح وانجازات بجانب حب حياته هيامه وانجبوا ٣ اطفال
ايهم ( البكر )
اللي يبلغ من العمر ست سنوات
قمر ( اول بنت لهم وكانت جميلة ع اسمها وشابهت امها بكثيير ملامح )
تبلغ من العمر اربع سنوات ونص
همام ( اخر عنقودهم ولد )
يبلغ من العمر سنة ونص
—
" عايلة فارس الحنين "
فارس بالمثل كمل حياته ع نهج الحب والاحترام مع حنينه وانجبوا طفلتين
ليما ( البكر )
واللي تبلغ من العمر خمس سنوات
وذهب ثاني بناتهم
واللي تبلغ من العمر ثلاث سنوات
—
" عايلة محمد البشرى "
محمد وبشرى تخطوا حاجز الحب وكانوا عاشقين لبعضهم رغم فرق عمرهم وانجبوا ٤ اطفال
لميس ( البكر )
واللي تبلغ من العمر تسع سنوات
سيف
واللي يبلغ من العمر سبع سنوات
والتوأم ملك ومالك
واللي يبلغون من العمر اربع سنوات
—
" عايلة كاسر الوعد "
وعد وكاسر عاشوا حياة سعيدة وكل منهم يعطي وياخذ وانجبوا ولدهم الوحيد سمّي بطلنا
رعد ( البكر )
واللي يبلغ من العمر خمس سنوات
—
" عايلة هادي الشوق "
هادي تقبل اغلاطه وصححها وكمل حياته مع عشيرة الروح شوق اللي م تركته ابدًا وكملت معه طوال الست سنوات وناويينها للأبد وانجب منها تؤام
فهد وسند
اللي يبلغون من العمر اربع سنوات
—
" عايلة ذيب اللين "
لين وذيب تكاتفوا مع بعضهم وطاروا ببعض ووصلوا اقصى مراحل الحب وانجبوا طفلين
ريم ( البكر )
واللي تبلغ من العمر خمس سنوات
وضاري
واللي يبلغ من العمر سنتين
—
" عايلة منصور السلمى "
عاش منصور مع سلمى بحب وكرم تحت كرهه امه لزوجته وعياله لكن رغم حزنه ع وفاتها لكن حس انه خيرة لعياله وانجب من حبيبة عمره طفلين
الذيب ( البكر )
واللي يبلغ من العمر خمس سنوات
ليلى
واللي تبلغ من العمر ثلاث سنوات
—
" عايلة سالم العنود "
سالم رغم قسوة الوقت عاش بحب مع عنوده وانجب منها ولدهم الوحيد اللي نجى بصعوبة وانفجعوا بخبر عدم قدرة العنود ع الانجاب مره ثانية
سلطان ( البكر والوحيد )
ويبلغ من العمر ست سنوات
—
" عايلة سعود العهود "
سعود وعهود كانوا غارقانين ببعضهم وانجبوا بنت وحيدة وينتظرون طفلهم الثاني
عهد ( البكر )
واللي تبلغ من العمر خمس سنوات
—
" عايلة حمد الغدي "
حمد وغدي كانوا الطف ثنائي والكل اتفق ع حبهم لبعضهم وانجب حمد من غدي طفلتين
شوق ( البكر )
واللي تبلغ من العمر خمس سنوات
اثير
واللي تبلغ من العمر سنة
—
" عايلة ذياب البيان "
ذياب وبيان صدموا عايلتهم بأنجابهم بعد زواجهم بتسع اشهر بس وعاشوا بحب مع بعضهم وعطى ذياب ما وراه ودونه لعيون بيان وانجب منها ثلاث اطفال
عبدالكريم ( البكر )
واللي يبلغ من العمر ست سنوات
سلمى
واللي تبلغ من العمر ثلاث سنوات
ادهم
واللي يبلغ من العمر سنتين
________________••••________________
مسك الختام ❤️
الحمدلله ع التمام اليوم الاحد الموافق الاول من يناير سنة الفين وثلاثة وعشرين [ 1 • 1 • 2023 ]
اتممت روايتي الاولى تحت عنوان " يهزمني الحُب وانا جاهل بدرب المُحبين " من قلم كاتبتكم : الجُّود آل مطّلق
—
فالنهاية ممكن البعض م يأمنون بالحب لكن صدقوني هو موجود والكل بيقع له مع الشخص الصح اللي ربي كاتبه له ومثل م رعد تخطى مع هيامه كل مصايبهم وعاشوا مع بعض رغم كل شيء ورغم كل شخص وقف ضدهم وكملوا يد بيد معهم اطفالهم الثلاثة الكل بيعيش مثلهم بس لا تيأسون من الحُب !
ممكن يهزمكم وانتوا جاهلين بدربه ؟
اتمنى تكون روايتي الاولى اول انطلاقاتي ككاتبة عظيمة واتمنى تكون حازت اعجابكم كلكم واستودعتها الله واودع فيها عايلة قاضي كلهم بحب وحزن
ونقول نلقاكم بأذن الله برواية قادمة الجُّود تودعكم جميعًا اشوفكم ع خيييير
:::::::::::::::::::::::::::::::::::::::::::::::::::::::
انتهى الرواية ادعموني بنجمة وكومنت
تمت بحمد الله 🤍