خيوط القدر ٢

16

انفتح الباب بشويش وعيون يزن ما نزلت عنه

دخل وهو مبتسم لما شاف يزن صاحي وقرب منه الين جلس قدامه وحط كيس الاكل جنبه
- صباح الخير !

يزن هز راسه بعنف وحاول يتكلم بالاصح يسب بس الشرطرون كان مقفل فمه

تنهد وهو يخرج ابرة من شنطته ويمسك يد يزن الا بدأ يتحرك بقوة ما يبغاه يحقنه بيها

بس يده كانت ثابته لدرجة خلته يحقنها ليزن بكل سهولة

دقايق وبدأ مفعول المسكن وبدأ يزن يحس بثقل جسمه

بعد اللصقة عن فمه
- دحين بما انك هادئ اخيرا .. خلينا نتكلم

يزن كان لا يزال بيتمسك بقوته
- انت بصف مين ؟

هز اكتافه
- بصف شاهر

يزن عقد حواجبه
- طيب ليش مربطني كذا

حك شعره بيده
- لانك حمار .. كان مرة صعب عليك تظل عاقل بالمستشفى ؟! كان مرة صعب انك تكمل تاخذ الادوية وتبقى في ذيك الغرفة الين يوصل شاهر وياخذك ؟ ليش لازم تظهر انك القوي الفنان بالمكان الغلط ؟

يزن طالع بالابرة
- ايش كان فيها ؟

تنهد
- شوية مهدأت .. ما بسمحلك تشرد من هنا وتطيح بيدين احد ثاني .. هنا انت بأمان على الاقل

يزن عض شفافه
- خليني اكلمه .. شاهر .. اذا انت بصفه خليني اكلمه !

جلس يفكر للحظات قبل ما خرج جواله ودق عليه .. ثواني وجاه الرد
- صار شي جديد ؟!

مد غيث الجوال ناحيت اذن يزن الا اول ما سمع صوت شاهر بدأ يزعق
- ش .. شاهر

شاهر
- يزن رجع التلفون له ..

يزن هز راسه
- كلمني انا شاهر ..

شاهر غمض عيونه
- يزن .. ارجوك خليك مكانك .. لا تصعب علي الامور حبيبي ..

يزن عض شفافه
- الزفت ذا مربطني .. وجالس يحقني بأبر كل يوم

شاهر مسك ضحكته بالقوة عشان لا يعصب يزن
- انا بتفاهم معاه .. بس ارجوك اجلس هاجد يومين بس .. يومين وباجيك اخذك بنفسي

يزن غمض عيونه
- حا .. حاضر

سحب غيث الجوال ورجعه لاذنه فتكلم شاهر
- يا زفت قلتلك تعامل معاه بشويش مو تربطه !

غيث حك راسه بيده
- مو ذنبي انو حبيبك بسة ما تهجد .. كل ما حاولت امسكه واخليه ضعيف عشان لا يتحرك يجي يتفرعن !

شاهر صك اسنانة بقوة
- غيث .. الا يزن ! ..

غيث قلب عيونه
- ايش صار على الموضوع الا طلبته ؟

شاهر هز راسه
- تحت التنفيذ

غيث
- اتفاقنا كان واضح .. كادي مقابل يزن