خيوط القدر ٢

23

بدر حضن هادي الا كان لساته مو مستوعب .. المفروض يكون في صف مين دحين ؟
رعد الا يخاف يثق بالناس من زمان ؟ ولا كادي الا انظلم بالموضوع ؟

محد يعرف رعد قد هادي .. هو الا تحمله طوال السنين في انهياراته السابقة .. هو يعرف عصبيته .. يعرف كيف يفكر .. ويعرف حس بأيش لما شاف كل علامات الخيانة قدامه .. رعد حس انو انطعن مرة ثانية

المرة الاولى نادر تركه عشان سراج .. سحب عليه في اليوم الا كان رعد ناوي يرتبط بيه ويلبسه خواتمهم الا لساته لليوم مخبيهم بعلبة تحت رفوف الجزم بدولابه القديم

اخذ هادي نفس عميق .. لو بيحاول يصلح الا بيناتهم .. هل بيكون قراره صح ؟ .. هل يقدر يشارك بدر كل ذي الافكار ؟!

بدر مسح على راس هادي بشويش
- كل شي بيكون بخير .. هما ما كانوا مناسبين لبعض اصلا

هادي بعد يد بدر عنه وخرج من حضنه
- محد يناسب احد بذي الدنيا .. كل الناس تتعلم تناسب بعض .. تغلط وتسامح وتعطي فرص .. تحب وترجع .. تزعل وتنفصل وتتغلى .. تكابر وتتألم .. مافي شخص انولد لاجل شخص بشكل جاهز .. كلنا انولدنا صفحة بيضا وظروفنا غيرتنا ولما نحب نقرر نغير كل شي حولنا عشان الا نحبه .. الا صار بيناتهم غلط بس هو الا حيحكم كيف بيكونوا بعدين

بدر عقد حواجبه
- لا تقولي بتحاول ترجعهم ! .. هادي خلاص هذا طريق مافي منه رجعة !

هادي هز راسه
- ما برجعهم .. بس لو يبغوا يرجعوا يستاهلوا شخص يوقف بالنص بيناتهم ويذكر كل واحد بالأذى الا الثاني سببه له .. بدر كادي ضحا ورعد ضحا .. حرام كل ذا يروح كذا بدون نقاش اخير على الاقل

بدر اخذ نفس عميق
- هادي مهما كنت شخص طيب ولطيف .. الا صار بيناتهم قتل مشاعرهم لبعض .. لا تحاول تحقق المستحيل ..

هادي قاطعه
- المستحيل هو اني اسيب رعد يخسر كادي .. واسيب كادي يخسر رعد ..

بدر مسك كتف هادي بقوة
- هادييي ! .. لا تتدخل بيناتهم

هادي رفع راسه يطالع في بدر
- ليش ؟ .. ليش تبغاهم ينفصلوا لدي الدرجة بدر ؟! .. لا تقولي انو شغلك مع ريان خلاك زيه

بدر
- ريان بيسوا الصح والا فيه مصلحة رعد

هادي فتح عيونه بصدمة
- بدر .. لا تقولي .. لا تقولي انك تعرف .. لا تقولي انو هو السبب !

بدر بعد راسه عن هادي بس هادي مسك وجه بدر بيدينه وحط عيونه بعيون راعد الا كان بيحاول ما يطالع في هادي
- بدررررر .. انت منت ورى الموضوع صح ؟ .. انت قلتلي بتتغير .. واصلا انت مستحيل تأذي رعد .. رعد زي اخوك من كثر ما انتم سوا .. بدر طالعني ورد .. بدرررر !

⚜️⚜️⚜️⚜️⚜️⚜️

كان ماهر جالس بالصالة .. فادي نايم للان وهو صحي ثاني وحس انو ما يقدر ينام اكثر من كذا فجلس في الصالة يشتغل على اللاب تبعه