خيوط القدر ٢

71

بدر كان جالس بالمطبخ يشرب قهوته .. اليوم بيرجع للدوام عند ريان ..

معتز حط يده على كتف بدر
- لو ما تبغى تروح قلتلك .. تقدر تتراجع بأي لحظة

بدر هز راسه
- العد التنازلي بدأ .. وكذا شخص معتمد علي .. ما حخيب ظن احد .. مو انت ولا واحد من عيالك على الاقل

معتز ابتسم ابتسامة صغيرة قبل ما يطبطب على كتف بدر
- انا بظهرك دايما .. لما تحس انك تورطت ارجعلي

بدر ابتسم وهز راسه
- ادري ..

سحب بدر كوب القهوة وهو يتحرك لبرة الغرفة .. شاف أسر الا كان واقف على جنب وواضح انو سمع كلامهم بس طنشه وكمل مشي بس أسر بدأ يمشي وراه .. ظل وراه الين وصل بدر لدبابه .. والتفت لأسر
- بتلحقني للدوامي ؟!

أسر كان مدخل اياديه بجيوبه
-ماني قادر افهمك .. انت بصف مين بالزبط

بدر هز اكتافه
- ماني ضدك .. هذا الا اقدر اقوله

أسر ضغط على يدينه
- ليش ما تقدر تتكلم .. ليش انت بعيد عننا .. عشانك ولد ريان ؟! .. تحبه ؟! .. تعتبرك ابوك ؟!

بدر اخذ نفس عميق وتقدم ووقف قدام أسر
- ريان مو ابوي .. انا غلطته الا محاها من تاريخه وناوية تدمره .. اذا تبغى تعرف ابوي فهو الشخص الا جوة .. الشخص الا كان معاي بوقت الكل كان يحتقرنا فيه بسبب غلطة مو انا الا ارتكبتها .. وانا ما اعض اليد الا اتمدلتي

أسر كان مرتبك بس رفع راسه يطالع بعيون بدر
- انا خسرت عيلتي من قبل .. فلا تخليني اخسرهم مرة ثانية

بدر شاف الخوف بعيون أسر .. فحط يده على كتف أسر
- انا ما اقدر وعود ما اقدر اوفي بيها .. بحميلك عيلتك قد ما اقدر .. بس مقدر اضمنلك انك ما تخسر احد .. مافي حرب تنتهي بدون خساير أسر

بعد بدر عن اسر وركب دبابه وحط الخوذة فوق راسه
- تعلم كيف تصير قوي .. مو عشانك .. عشان اختك الصغيرة
قالها بدر قبل ما يشغل الدباب ويتحرك لبعيد

أسر جسمه قشعر .. ما يبغى يخسر احد ما اهله .. للان هو يعاني من الا صار من زمان .. فكيف لو خسر احد جديد

لف ورجع ناحيت البيت بس شاف معتز الا كان دوبو خارج ووقف معتز مكانه
- صاحي بدري اليوم

أسر هز راسه
- ما .. ما جاني النوم امس .. فقلت اتمشى شوي

هز معتز راسه
- مو المفروض تبدأ تختار الجامعة الا تبغى تدخلها ؟

أسر رفع راسه وهو يتنهد بصوت مسموع
- لا تذكرني .. ما احسني فايق لشي دحين .. وفوت موعد اختبار وحدة من الجامعات لاني هنا

معتز سحب جواله يطالع بالجدول الا عنده
- تقدر تسويه اون لاين العصر اليوم ؟

أسر عقد حواجبه
- ايوة بس ما ينفع