خيوط القدر ٢

80

الاحداث بالماضي .. قبل وفاة عمر بفترة :

حرك راسه بانزعاج وهو يدفن وجهه بالمخدة .. يكره صوت جواله .. للان يلعن اللحظة الا خلته يشتريه .. ما كان عايش على خط التلفون ووقت ما يرجع البيت الكل يقوله مين الا اتصال بس لا لا انت دكتور قد الدنيا اقل شي تسويه هو انو يكون معاك جوال

ما يدري لو هو اشتراه عشان يكشخ بيه وسط اصحابه ولا عشان يهدي قلبها الا يفز كل ما ينام برة البيت

فتح عيونه بانزعاج لما حس بشخص يطبطب على ظهره والتفت
- لا ترد عليها سيبها تتصل للفجر ماني فايق

ضحك ريان وهو يلبس قميصه
- قوم كلمها تعرف انها ما بتسيبك بحالك بذات وانت امس ساحب عليها ولا فكرت ترجعها من الزواج

عمر قلب عيونه وسحب جواله ورماه ناحيت الجدار بعصبية
- خلاص قلتلها معتز بيروح يجيب امي اركبي معاه .. لازم الفلم حق عيب وانت زوجي وابغاك تجيني تاخذني وسط الناس وكلام حريم

ريان هز راسه وهو يسحب اغراضه ويرتب نفسه
- هذي نهاية الا يتزوج بنت الجيران

عمر قلب عيونه وهو يتقلب فوق السرير
- يا شيخ ! .. على اساس انو سحر مو نفس طينتها ! .. ما هيا وفريدة صاحبات الروح بالروح .. وهذا وجهي لو ما كانت بتدق علي وسحر جنبها !

ريان ضحك
- سحر ما بتسيبها لوحدها .. وهذا بصالحنا .. طوال ما سحر جنب فريدة احنا بنقدر ناخذ راحتنا

عمر سحب يد ريان وبدأ يطق اصابعه
- في شحنة بتوصل اليوم .. و

ريان قلب عيونه
- ادري .. بروحلها دحين واعرف لو الضابط بيكون ضمن الوردية اليوم او لا .. لا تذكرني بشغلي

عمر ابتسم وحط يده على خد ريان
- تدري اني احبك وانت فاهمني ؟

ريان ابتسم بشويش .. للان قلبه يفز كل ما يسمعها من عمر .. عمره ما سمع كلمة أحبك بدون تبرير او نسبها لشي بس كلمة احبك ذي كافية ..

سحب نفسه بعيد وهو يضحك
- ما يكفي مخليني اتمرمط بين حرمتين ؟

بس عمر رجع سحب ريان وطيحه فوق السرير وحاوط وجهه بيدينه
- الحرمتين ذول عمرهم ما بيشوفوا الشي الا انا بشوفه .. محد بيقدر يعرفك قدي ريان .. ومحد بيظل معاك لو ايش ما صار زيي

ريان ابتسم وسحب يد عمر يبوسها بس عمر سحب نفسه بعيد وراح ناحيت الحمام بدون ما يقول شي

ريان رجع راسه على السرير يطالع السقف .. ما يعرف كيف الحياة وصلته لهنا ..
غمض عيونه يفكر بكل شي .. كيف نقل من القرية للمدينة مع ابوه .. كيف حب عمر من لحظة ما عيونه طاحت عليه .. عمر بشخصيته المميزة وكريزمته الطاغية .. يقدر يلفت انتباهك بكلماته خلال لحظات .. الكل حوله والكل يحبه ..

بس عمر ما اختار احد غير ريان .. بدوا علاقتهم من باب التجربة فقط .. شي شافوه بفلم وطبقوه .. بس ريان ما كان يدري انو قلبه بيتعلق بعمر بقوة وبيصير يعشقه بذي الطريقة .. على الطرف الثاني عمر الا للان ريان ما يعرف مشاعره .. احيانا يطيره السما بالغزل والحنية .. واحيانا يصير جاف وقاسي بشكل مو طبيعي