خيوط القدر ٢

31

دخل رعد المكتب وبدر جالس هناك على اعصابه

جلس على الكرسي قدام بدر وعقد يدينه قدام صدره
- ايش الا صاير بينك وبين هادي ؟

بدر طالع ناحيت الباب بس رعد تكلم
- مهو جاي .. قولي ايش الا صار بيناتكم ؟ ليش ما يبغى يشوفك وبيشرد منك ؟

بدر قلب عيونه
- موضوع غبي لا تشغل بالك فيه .. المهم كيفك دحين ؟

رعد
- لا تغير الموضوع بدر .. تتذكر ايش قلتلك قبل ما اسافر ؟

بدر
- هادي خط احمر لا تحاول تسحبه معاك لاي شي هو ما يبغاه .. بس انا ما بسحبه لشي هو ما يبغاه .. حصل بيننا سوء فهم فقط

رعد
- سوء فهم خلاه يرجف ويترجاني ما اسيبك تشوفه ؟

بدر رجع راسه لورى
- هادي دراما من ايام المدرسة

رعد
- هادي ما كان دراما ايام المدرسة .. احنا الا خلينا حياته دراما وقتها

بدر تأفف
- تبغى توصل لأيش رعد ؟ .. ما سويت لهادي شي .. احتاج اكلمه وهو بيتدلع علي .. لا تدخل نفسك وسطنا .. ( تغيرت ملامح بدر ) .. الا لو لساتك تبغى تعلقه زي ما سويت زمان

رعد عقد حواجبه
- ايش قصدك بدر ؟

بدر طالع في عيون رعد
- هادي يحبك من زمان .. اعترفلك واحنا بالثانوي وطقطقت عليه .. بس عمرك ما خليته يبعد عنك .. حتى لما نادر كان بحياتك انت احتفظت بهادي قريب منك .. ولما نادر خرج اول شخص جا يجري ناحيتك كان هادي الا انت برضوا رفضته .. بعدين كادي .. ودحين بترجع تعلق هادي فيك ثاني ؟!

رعد
- بدر انا ما عقلت هادي فيي .. انا بحاول أكفر عن ذيك السنين الا كنت اتنمر فيها على يزن وهادي .. لا تتخيل اشياء وترميها علي

بدر ضم يده بقوة
- انا ما بتخيل .. بس هذا طبعك .. دايما تحب تخليهم حولك .. تحب نظرات الاعجاب الا تجيك منه زي ما تحب نظرات الاعجاب الا تجيك من هانم .. اي شخص تحسه معجب بيك تقربه منك وقفل الباب في وجهه تسيبه يتعذب بمشاعر حب من طرف واحد .. بس ما حسمحلك تسوي كذا في هادي مرة ثانية .. هادي حقي وانت مالك فيه شي

رعد ابتسم بسخرية
- حقك ؟ .. من متى صار حقك ؟ .. بدر انت مافي شي في الحياة تمتلكه عشان يصير هادي حقك .. سيبه في حاله .. هادي ما يستاهل يدخل بيننا او يكون مع واحد مننا .. لا انا ولا انت

بدر خبط المكتب
- مو انت الا تقرر ايش الا ينفعلي وايش الا ما ينفعلي رعد

رعد ضحك
- ومن متى ذا الكلام ما شاء الله ؟!

بدر سحب يده وغمض عيونه .. اخذ نفس عميق قبل ما يوقف
- برجع البيت انام .. ما .. ما ارتحت من كذا يوم ..

رعد طالع في بدر
- هادي بيكلمك لما يهدأ .. لا تحاول تكلمه قبلها

بدر قبض على يده بقوة قبل ما يفردها
- حاضر
قالها وتحرك برة المكتب