خيوط القدر ٢

76

ماهر كان موقف سيارته قدام البيت .. في ناس داخلة وخارجة من البيت .. يعرف انو فادي جوة ويحتاج يدخل ويخرجه .. بس ابوه قاله ينتظر .. قاله انتظرني ولا تفكر تدخل قبل ما اوصلك

طالع بجواله بتوتر .. مرت ربع ساعة على الاتصال .. حط يده على قلبه وبدأ يمسح ناحيته .. مو مطمن ..

ثواني وشاف سيارة ابوه وقفة قدام باب بيت فادي

فتح ماهر باب سيارته بس معتز أشرله لا ينزل .. بس مافي احد ممكن يوقف ماهر عن انو يخرج فادي من جوة ..

قرب ووقف جنب ابوه الا قلب عيونه
- لو عرفوا انك الا معاه بالصور ما بحميك منهم

ابتسم ماهر بشويش وعيونه على الباب
- ما بتخلي احد يلمسني .. اعرفك

معتز طالع بالباب قبل ما يتنهد ويدخل ..

استقبله اكبر الموجودين .. محد يعرف ليش جا بس يعرفوا هو مين .. اخذ لفة بعيونه عليهم قبل ما يتكلم
- فادي فين

استغربوا وعقد عم فادي حواجبه
- ايش تبغى بفادي ؟

معتز ركز عيونه على العم .. طالما تكلم لوحده معناته هو الشخص الا كلمته مسموعة بينهم
- ما يحتاج اقول ايش ابغى .. الولد لو مات تحت يدكم ما بيصيرلكم خير

العم ابتسم
- يعني انت عارف عن الصور وعارف الفضيحة الا جابها لنا ! .. ولك عين تجي لحد هنا تكلمنا ؟!

معتز رجع جسمه على ورى وهو يحط رجله فوق الثانية
- الولد لو صرله شي محد منكم بيخرج منها سليمة .. سلموني هو ومعد بتشوفوا وجهه

العم طالع بالثانين
- ما بيبرد دمنا الا دمه

معتز ابتسم بشكل جانبي
- الفلوس تبرد دمكم .. بديك شيك فاضي .. اكتب الرقم الا تبغاه وانا حاضر .. و .. بخلي محامي يشيل لقبكم من اسمه .. بتتخلصوا من فضيحته بشكل كامل وما بيكون لكم علاقة بيه ..

سكت العم شوي .. يدري انو معتز مو هين من ناحية الفلوس .. طالع شوي بالباقين الا هزو راسهم .. اغلبهم عنده ازمة مالية .. لو طلبوا مبلغ كبير ودفعه معتز بيتحل جزي كبير من مشاكلهم ..

رجع العم عيونه على معتز الا خرج الشيك من جيبه ووقعه ..
- سلمني الولد .. بسلمك الفلوس

العم طالع بواحد من عياله الا ما كان عاجبه الموضوع بس ما بيقدر يقول شي .. قلب الولد وجهه بانزعاج وهو رايح ناحيت المخزن .. سحب الكرسي المتحرك تبع جده الا توفى من زمان وفتحه عشان يقدر يحط فادي فوقه .. تحرك وفتح الباب بس سمع ماهر وراه
- لا تلمسه ولا بحرق الشيك

طالع وراه وشاف ماهر الا كان جالس جنب معتز قبل لحظات وهو واقف بكل برود

ابتسم الولد وبعد عن الباب
- متأكد ما بتتوسخ ملابسك بدمه ؟!