خيوط القدر ٢

64

هادي الا كان حابس نفسه بغرفة رعد من امس قرر اخيرا يخرج لما سمع سحر تناديه

توجه لها وشافها بالمطبخ جالسة تقطع الخضار واستغرب انو المطبخ فاضي فتحرك ناحيت الطاولة بس هي لفت عليه وحطت يدها على وسطها
- ما يكفيك كل ذي الراحة ؟ .. تعال ساعدني

ابتسم هادي بشويش وتحرك ناحيتها وسحب لوح التقطيع وبدأ يقطع بدالها وهيا تحركت تشوف القدر الا فوق النار
- كيف حالك اليوم يا قلب امك ؟

هادي ضحك بشويش .. يحب لطفها معاه .. يحب كيف دايما بتعوضه عن جدته الا فقدها
- احسن .. اسف ثقلت عليكم

لفت عليه وضربت كتفه بالملعقة
- اسمعك تقولها ثاني بسلقك مكان البطاطس !

ضحك وهو يمسح مكان الضربة
- اسف

ابتسمت لضحكته ومسحت على خده
- دحين بتروق عشان تقولي ايش الا زعلك ؟ .. ولا بتبقى الزعل بقلبك وتهلك نفسك بيه لوحدك ؟

هادي نزل عيونه بدون ما يتكلم فتكلمت سحر وهيا تلف وتعطيه ظهرها
- ايش سوالك بدر .. كسر قلبك ؟

هادي رفع عيونه مستغرب بس هيا ابتسمت ولفت وجهها له
- عيالي واعرف الا بقلوبكم

هادي سحب الكرسي وجلس
- مو كسرلي قلبي بس ..

سحر قاطعته
- بس انت حبيته رغم انك عارف انو اخر شخص المفروض تفكر تحبه .. هادي الحب ما نختاره .. هو يختارنا

هادي رفع راسه
- لو كان الا أحبه غلطان .. لو .. لو كان اسوء شخص بالعالم .. فليش احبه .. ليش ربي يعاقبني انا ويحط حبه بقلبي ؟!

سحر قربت من هادي ومسحت على راسه
- يمكن لانك علاجه .. لانك النور الا هو يختاجه عشان يرجع لطريق الصواب .. هادي القدر له طريقته بنسج الخيوط

هادي رفع راسه
- ولو ما تعدل ؟

سحر ابتسمت
- وقتها تحتاج تدعس على قلبك عشان تلقى فرصة افضل وشخص افضل

هز هادي راسه
- بروح اشوفه اليوم ..

سحر هزت راسها
- عسى قلبك ما يشوف الا السعادة يا ولدي

ضحك هادي وسحب الزبدية
- ايوة ايش اسوي دحين ؟

سحر التفت تقلب الا بالقدر
- شوف الا بالفرن استوى ولا باقي

⚜️⚜️⚜️⚜️⚜️⚜️

كادي كان اول شخص صحي وخرج يتمشى بالمكان .. يدري انو غيث يبغاه يظل بالجناح عشان بدر بس كادي لسبب ما مو خايف من بدر .. مو حاسس بالخوف من احد ..

تحرك ناحيت النافورة وابتسم لما تذكر كلام غيث .. امه كانت تجلس هنا ..

جلس على اطرافها وطالع بالبيت .. قد ايش حياته كانت بتكون مختلفة لو ظل عايش هنا ؟ .. يمكن وقتها عمره ما كان شاف رعد .. كان بيكبر بين ام واب يحبوه .. ما ينكر حب أمين له بس .. طول عمره كان يحس حياته ناقصة لانو امه ما حبته .. لما تعيش مع شخص ما يحبك .. شخص يظل يذكرك انك مو ولده بكل لحظة