خيوط القدر ٢

52

ليلى حست بشوية دوخة بس استندت على الجدار القريب الين ما تحس انها اثبت

قربت منها وحدة وسألتها عن حالها بس ليلى ما كانت حاسة انو عندها طاقة ترد على احد

سحبت جواله ودقت على ماهر .. بس زي العادة .. ماهر يقفل جواله لما يكون بالعيادة .. طبيعي ما يبغى شي يقاطع جلساته مع المرضى ..

نزلت نفسها وجلست على الارض وضغطت على الرقم الا بعد ماهر .. غيث

بس للاسف .. هي اتصلت بوقت كان جوال غيث مع باقي اغراضه خارج غرفة العمليات .. على مكتبه

نزلت جوالها بارهاق .. ايش فايدة وجود اخوين لو ما تقدر تدق عليهم لما تحس بالتعب ؟

سحبت قارورة الموية الا بشطنتها وبدأت تشربها .. هيا عارفة انها لو جلست هادية بتصير احسن .. اكيد سكرها انخفض .. ما اكلت شي من الصباح وكانت العيادة زحمة اليوم ولسه عندها اختبار لازم تذاكرله بكرة

ظلت ١٠ دقايق مكانها والشمس فوقها فكانت تحاول تغطي راسها بوحدة من الدفاتر الا معاها إلين حست بيد على كتفها فالتفت وفتحت عيونها بصدمة لما شافته
- انت بلتحقني ؟!

قلب عيونه وهو يأشر على الساعة
- نسيتي انو ساعتك تجبلي تنبيه كل ما انخفضت ارقامك ؟

طالعت ليلى في ساعتها قبل ما تتنهد
- اسمها علامات حيوية رايد .. مو ارقام

هز اكتافه ومد يده لها
- تبغيني اوديك محل تاكلي شي ولا اوصلك سيارتك واجبلك الاكل للسيارة ؟ 

مسكت يده بالقوة
- ما يفرق .. بس خليك معاي الين افوق لو سمحت

رايد تمسك بيدها ووقفها وبدأ يمشي معاها بشويش الين اقرب طاولة .. سحب من جيبه حلاوة وحطها قدامها
- خلي سكرك يرتفع شوي قبل ما تاكلي

سيبها هناك وتحرك ناحية المطعم يطلبلها شي تاكلها وهيا طالعت بالحلاوة .. للان دايما تلقاه كل ما احتاجته .. ابتسمت وهيا تسحب الحلاوة .. ما يحب الفرولة .. يكره طعمها .. بس للان يمشي وفي جيبه علبة حلاوة بالنكهة الا هيا تحبها

طالع في ظهره وهو واقف في الانتظار .. ايش الا خلاهم يفترقوا ؟ .. كانوا قريبين مرة من بعض .. فرق العمر بيناتهم يمكن ؟ .. بس عمره ما كان يفرق .. ليش فجأة علاقتهم وقفت ووصلت لجدار ؟! .. ليش فجأة كل شي انقلب بعد الخطوبة ؟ .. ايش الشي الا خلا ابوها يرفضه بشكل قاطع ؟! .. لليوم ما تدري

رجع وبيده الفاتورة وجلس قدامها
- ١٠ دقايق وبيجهز الاكل .. كيف حاسة نفسك دحين ؟

هزت راسها واشرت على الحلاوة
- فرولة

طالع بالحلاوة .. هو خرجها بدون تفكير .. بس هز راسه
- لها سنتين مرمية بجيب الثوب ..

ابتسمت ليلى وحطت يدها على خدها
- اوه من جد ؟! .. ومتى ناوي تفصل مشاركة المعلومات الا بين ساعتي وساعتك