" hello မင်္ဂ လာ ပါ "
ဝဲတဲတဲအသံလေးကြောင့် ထက်နောင် ကြာဇံသုတ်စားနေရာမှ ဆိုင်ရှေ့ဆီ အကြည့်ရောက်မိ၏။
သူထင်သည့်တိုင်း ဝါဖန့်ဖန့်မျက်ဆန်ကြည်ကြည်လေးတို့ဖြင့် ရောက်ရှိလာသူက လူမျိုးခြားလေးပင်။
အုတ်ခဲရောင် ပုဆိုးလေးကို ပုံစံမကျစွာစည်းထားရင်း ခါးပတ်လေးဖြင့် ပတ်ထားပုံက ပုဆိုးမဝတ်တတ်သေးသည့် ကလေးလေးအလား...
သို့သော်ငြား ကပိုကရိုစည်းထားသည့်ပုဆိုးလေးနှင့် ဝါဖျော့ဖျော့ရှပ်လက်တိုကို ဝတ်ဆင်ထားပုံက သူနှင်တော့ အတော်လေးကြည့်ကောင်းနေပြန်၏။
ဖြူဝင်းသောအသားအရေ၊ ဝင်းဖန့်ဖန့်မျက်လုံးတို့နှင့် ယခုဝတ်စုံလေးက သူနှင့် မည်သို့မည်ပုံ ပနံသင့်မှန်းမသိ ပနံသင့်ကာလိုက်ဖက်နေသည်ကိုဖြင့် ဝန်မခံ၍မရ။
" ဟာ Lucas လာလာ "
ထက်နောင် ဝမ်းသာအားရ ဖိတ်ခေါ်လိုက်သည့်အခါ လူးကပ်စ်က နူးညံ့စွာပြုံးပြရင်း ဆိုင်ထဲသို့ဝင်လာ၏။
လူမျိုးခြားလေး၏ အပြုံးက အတော်နွေးထွေးကာ လှပသည်ကိုပါတော့ သူ အသိအမှတ်မပြုမိဘဲ မနေနိုင်ပါလေ...
" ကျွန်တော် အစ်ကို နဲ့ မတွေ့ မှာ ကြောက် နေတာ "
ထက်နောင်ဆီ ဦးတည်ပြောလာသံလေးက လေသံခပ်တိုးတိုး...
လိုချင်သည့်အရာကို ရလိုက်၍ပျော်ရွှင်သွားသည့်
ကလေးတစ်ယောက်အလား ဆိုလာသူကြောင့် ထက်နောင် ရင်ထဲနွေးခနဲ...
" ဪ အစ်ကိုရှိပါတယ်ကွ အမေ ဒါ သားမနေ့ကပြောပြတဲ့ လူးကပ်စ်လေ လူးကပ်စ် ဒါက အစ်ကို့အမေပဲ ဒေါ်ပန်းရုံတဲ့ အစ်ကို့မှာ ညီမလေးတစ်ယောက် ရှိသေးပေမဲ့ ဒီအချိန် သူက ရောက်မလာသေးဘူးလေ "
ထက်နောင်က ဒေါ်ပန်းရုံနှင့် လူးကပ်စ်ကို ပျာပျာသလဲ မိတ်ဆက်ပေးရင်း အလုပ်ရှုပ်နေတော့၏။
အနောက်တိုင်းဗီဇမပျောက်သေးသည့် လူးကပ်စ်က လက်အုပ်လေးချီရင်း
" မင်္ဂ လာ ပါ Lucas Damond ဖြစ် ပါတယ် ဗျ မဲ့ရ် (mère) အဲ မိခင် က ပုဂံမြေ ကပါ ဖခင် က တော့ ပြင် သစ် လူမျိုး ပါ ဗျ "
BINABASA MO ANG
ပုပ္ပားမြေမှ စံကားဝါ / ပုပၸားေျမမွ စံကားဝါ (Completed)
Romanceပုပ္ပားမြေမှ စကားဝါ ပင်လုံးညှာ ရွှေရောင်ဝင်းလေတော့ ကြူသင်းစွာ မွှေးရနံ့ရယ်(ကွယ်) နှလုံးသားအထိ...စွဲ။ တစ်စုံတစ်ယောက်က ပုပ္ပားတောင်ကလပ်အမြင့်ကိုမေးခဲ့ရင် ပေပေါင်း 2417မြင့်တာကို မျက်ကွယ်ပြုလို့ ပေ1500လို့ပဲ ကိုယ်ဖြေမယ် မင်းနဲ့တွေခဲ့တဲ့နေရာ... ချစ်မိခ...
