حب نتيجة خطا طبي (تتمة)

الجزء مئتين و ثلاثة

حب نتيجة خطأ طبي
#بارت203♡♡

زمرد: علاش إياد دار شي مشروع؟

منصف: امم دخل شريك مع واحد صاحبي فواحد الشركة..

زمرد: ااه مبروك عليه ونتا مغتمشيش للإفتتاح؟

منصف: غنمشي وحتى نتي خاصك تمشي..

زمرد: وعلاش انا ضروري!

منصف: لا كاع رجال الاعمال غيجيو مع عيالاتهم مجاتش نمشي بوحدي وامكن حتى رانيا غادي تكون تما..

زمرد: معلمتينيش بكري موجدتش كاع شنو غنلبس..

منصف: متخافيش انا فكرت فكلشي غير نوضي..
زمرد شافت فيه وضحكات..

زمرد: بصح..! تسنا نجمع بعدا هادشي وننوض..
داكشي لي كان منصف ناض دخل يدوش وهي رتبات كاع دوك الوراق والكتوبة ردات كل حاجة لبلاصتها والبيسي حتى هو دارتو فبلاصتو مشات شافت راسها فالمراية وهي تعقد غوباشتها..

زمرد: اففف شوفي حالتك ازمرد كي ولات شعرك مشعكك... خاصني ندوش بعدا..
شافت فدوش لقاتو باقي فيه منصف معليها غير تسناه حتى يخرج..

سمعات زمرد صوت الدقان فالباب لقات الخدامة مع واحد البنت..
زمرد شافت فيها بمعني شنو؟

الخدامة: مدام هاد البنت جابت شي حاجة وصاها عليها مسيو منصف ممكن تحطها الداخل

زمرد: اه اراي شكرا ليك..
شدات من عندها داكشي وسدات الباب مشات حطاتهم اللولة كانت البذلة ديال منصف وهاديك تانية مشافتهاش بقات شحال كتشوف فيها عاد حلاتها كانت كسوة طويلة فالون البيج بالكمام ومسدودة من جيه العنق كانت زوينة بزاف خصوصا الموديل ديالها وكفاش مخيطة والتوب ديالها حطاتها مسرحاها فوق ناموسية فهاد الاثناء منصف خرج من دوش لاوي عليه فوطة بيضة..

منصف: عجباتك؟؟

زمرد(بابتسامة)؛ اه زوينة بزااف..
منصف شاف فيها مطول وحتى هو فرح حيت عجباتها ديما كيبغي يفرحها ومكيحملش اشوفها مقلقة ولا كتبكي.. عطاها بالضهر دخل للدريسينغ وخلاها تلبس على راحتها..
دخلات زمرد باش دوش عليها بالخف مبغاتش تعطلو..

دازت ديك ساعة تقريبا قدام المراية واقفة زمرد مضاربة مع السنسلة ديال الكسوة من اللور مبغاتش تسد ليها حتى عصباتها..

زمرد: اففف هادشي مبغاش اتسد كفاش غندير ليها انا دبا؟
حسات بشي يدين باردين تحطو على ضهرها دخلاتها التبوريشة طلعات عينيها بالزربة فالمراية بان ليها منصف موراها وكيسد ليها فالسنسلة..
زمرد حشمات ودخلاتها التزنيكة التبوريشة متهنات حتى بان ليها بعد عليها..

زمرد: احكم شكرا!

منصف: دورها عندو حاوطها بيديه من خصرها وراسم ابتسامة جذابة على شفايفو..
منصف: جيتي زوينة بزاف..

زمرد فكل مرة كيقرب ليها قلبها كيضرب بالجهد مكتبقاش تحس براسها وكتجمع عليها حتى الحشمة..

#يتبع...