حب نتيجة خطا طبي (تتمة)

الجزء مئتين و ستة و عشرون

حب نتيجة خطأ طبي
#بارت226♡♡

مجموعين على طاولة كل من معاذ، رانيا وحفصة وحتى زينب..
رانيا لي كريشتها بدات كتبان فهاد الشهورة لي دازو وبدات كتقل وتافقو اليوم هي ومعاذ امشيو اكتاشفو جنس البيبي...

فطرو وناضو معاذ ورانيا لبسات عليها الكاب تاعها من الفوق وتمو خارجين وهما غافلين على الأعين لي من صباح وهي حاضياهم..

ركبو سيارتهم ومشاو منطالقين.. فالجردة كانت حفصة جالسة وزينب دخلات الداخل.. محسات غير بشي حد وقف عليها...

حفصة طلعات عينيها بان ليها إدريس لي واقف كيشوف فيها معرفاتو حتى كفاش دخل.. كان التعب باين ليه على وجهو لي شاحب والهالات تحت عينيه..

حفصة(ناضت مقابلة معاه): اش كدير نتا هنا؟

إدريس: حفصة سميعيني تعطيني فرصة بغيت نهضر معاك ضروري..

حفصة: مبقا عندي فاش نهضر معاك سير بعد منهنا من الأحسن دبا يجي معاذ وينوض صداع...

إدريس: حفصة انا بغيت ندوز داكشي لي بقا ليا من حياتي معاك نتي او ولادي.. الله يخليك احفصة خليني نهضر معاهم..

حفصة: اشنو كتقصد نتا بهاد الهضرة؟!

مشا إدريس جلس على الكرسي وراسو خ
حانيه للأرض وقال بكل أسى...

إدريس: شي شهر هادي تقريبا مشيت دوزت قالو ليا عندك ورم فالراس وبلي فأي لحضة اقدر نتوفى ومبغيتش نموت بوحدي.. بغيت نبقا مع عائلتي حتى النهار لي يدي مول الامانة أمانتو..

حفصة متنكرش بلي هاد فالهضرة ضراتها فقلبها كيبقا راجلها وأب ولادها علاش لي ميبقاش فيها!

حفصة: احم وعلاش ممشيتيتش تعالج..

إدريس: إلى بغيت نتعالج غيخصني نمشي برا المغرب.. نبقا وسط عائلتي حسن مانمشي نتعالج شكون ضمن ليا العلاج ميصدقش ونصدق ميت فبلاد بعيدة عليكم..
موراهم بااضبط كانت واقفة زينب والصدمة باينة على الملامح ديالها كاع الهضرة تاع باباها كانت عليها كف الصاعقة...

مشات قربات لعندو والدموع مقدراتش تحبسهم متقدرش تعيش داك الشعور ديال تحرم من باباها غير هاد المدة لي كان بعيد عليهم ديما كتوحشو وديما كتبكي على فراقو وعمرها تجرأت تقولها لشي حد فيهم حيت عارفة معاذ كيداير مغاديش اسامحو...

زينب: بابا!! واش الهضرة لي سمعت بصح؟
إدريس وحفصة دارو بجوج بيهم مشافوهاش كاع واش كانت موراهم ومبغاوهاش تسيق الخبار بهاد الطريقة!

إدريس: بنتي!..

هادو هما اجزاء اليوم البنات خليو ليا آراءكم والاشهارات راه منعادمين 🛇🚮
نتمنى الاجزاء يكونو عند حسن ضنكم🔥

تصبحون على واقع اجمل بنات قلبي💗😍