حب نتيجة خطا طبي (تتمة)

الجزء مئتين و احدى عشر

حب نتيجة خطأ طبي
#211♡♡

هبطات لتحت بان ليها منصف فالصالون مع باباه و امجد خنزرات فيه ومشات تشوف واش كاين فاش تعاونهم.. هادي هي حالتها نهار كامل كتهرب منو مباغاش تلاقاه ولا يهضرو نهائيا عندها بزاف ديال الهضرة باغيا تقولها ليه وفنفس الوقت مقاداش تهضر باركة غير داكشي لي شافت كيوضح كلشي من ديما كتشوف ديك السكريتيرة كدور بيه وديما كتلاحظ منصف مكيدير والو ولكن اليوم زاد على حدو...

وصل الليل...
فالصالون لي كيتسمع فيه صوت الضحك والهرج دليل على ضياف وصلو...

معاذ ومنصف امجد وسي محمد جالسين فبلاصة بوحدهم كيتناقشو فأمورهم اما العيالات عاطينها الضحك..

وصل وقت العشا
توجهو كاملين الطابلة ديال العشا كل واحد جالس حدا مراتو قدامهم طابلة بما ألذ وطاب من الشهيوات والماكلة دجاج محمر مدغمر والبسطيلة ديال دجاج شلايض فالاشكال كلشي منضم ومتيول المنضر كيفتح ليك الشهية..

بداو كياكلو كل واحد خدا شنو بغا.. اما واحد رانيا طاحت عمية فالبسطيلة تقول عمرها كلات كلشي بقا كيشوف فيها...

لالة الياقوت: رانيا بنتي غير بشويا عليك غادي توحل ليك..

رانيا: اممم هادشي شحال بنين الله يعطيك الصحة أماما...

الياقوت: زمرد لي طيباتها ماشي انا..

رانيا(كتهضر وفمها عامر): مرات خويا حادكة تبارك الله عليك...

معاذ: رانيا خوي فمك عاد كولي..
اما واحد حفصة هي والياقوت من صباح كيتغامزو عليها دوك شوفات ديال واش حتى نتي كتفكري بحالي... زمرد فهماتهم جابو ليها الضحكة وخا مفيها لي يضحك...

اما منصف داق البسطيلة لقاها بنينة كلا منها جوج مورسويات خصوصا فاش عرف بلي هي لي طيباتها...

داز الوقت
دغيا وخاص يمشيو وخا مسخاوش بالجماعة.. رانيا مشات حدا معاذ كتوشوش ليه فودنيه..

رانيا: معاذ عفاك خليني نبات عندهم توحشتهم..
معاذ: متأكدة مبقيتيش مريضة؟
رانيا حركات راسها بلا: لا لا مافيا والو متخافش!
معاذ: صافي باتي..

ابتاسمات ليه وخطفات بوسة من حنكو بالزربة و مشات قالتها لماماها لي فرحات... مشاو معاهم حتى لبرا ودعوهم و دخلو.. من غير زمرد شدها منصف من يديها جرها دخلها الطموبيل...

زمرد: طلق مني نتا اش كدير...
منصف(ركب طموبيل ومشا): شحال قدك تهربي مباغاش نهضرو؟
زمرد: لا ردني معندي فاش نهضر معاك.. واش مكتسمعش قلت ليه نزلني..

فنضركم واش علاقة منصف وزمرد غادي تصلح؟؟ وشنو غيوقع فالاحداث الجايين🔥😍
خليو ليا تعاليقكم الزوينة وجيم لكل جزء قريتيه تصبحون على واقع اجمل بنات قلبي 😍❤👑