حب نتيجة خطا طبي (تتمة)

الجزء مئتين و عشرة

حب نتيجة خطأ طبي
#بارت210♡♡

عند منصف شاف فديك السكريتيرة لي قدامو باقي لاصقة فيه هز يديه دفعها بكل ما يملك من قوة جات طايحة الارض على قاعها...

منصف(موجه صبعو جيهتها كيهضر بعصبية): شوووفي نتيي مبقييتش باااغة نشوووف كماارتك فهاااد الشركة مكنخدمش عندي ال*حاب..

رما ليها هضرتو وخرج بالزربة كينفض فقميجتو وكيدور على زمرد بعينيه لربما تبان ليه... والو مبانتش ليه عرفها غتكون خرجات..

مشا خرج برا بانت ليه يالاه ركبات فطاكسي مجا فين يوقفها حتى مشات طايرة..
نعل راسو وزهرو العوج ومشا ركب سيارتو غادي للدار عرفها غتكون مشات ليها...

زمرد ركبات فالطاكسي طلبات منو يوصلها الفيلا وسندات راسها على زاج كتحس بقلبها كيضرها معرفاتش علاش ولكن مبغاتوش اقرب ليها هو مزوجها هي ماشي من حق أي وحدة تقرب ليه بهاد الدرجة مدايرش ليها قيمة!! كتفكر ودموعها خانوها مفيقها من سهوتها غير مول الطاكسي لي قاليها بلي وصلات..
خلصاتو وهبطات كتمشا كتجر فرجليها..

دخلات لقات الياقوت هازة البخور كتبخر بيهم الدار..

الياقوت: ها زمرد جيتي محتاجاك ابنتي..

زمرد(بصوت عيان): اه مرحبا فاش..

الياقوت: اليوم غنعرض على رانيا وراجلها ومحتاجاك تعاونيني.. ولكن واش نتي عيانة؟ بنتي ليا ماشي هي هاديك..

زمرد: لا معياناش انا غنبدل حوايجي ونهبط عندك..

طلعات الفوق بدلات عليها دغيا جمعات شعرها لبسات بانطوفة فرجليها وتمات هابطة تلاقات مع منصف يالاه داخل.. تجاهلاتو قلبات الدورة للكوزينة حتى جرها منصف من المرفق ديالها..

منصف: زمرد محتاج نهضر معاك.

زمرد(ببرود): ممسالياش..
نترات يديها منو ومشات مخلية منصف كيتنهد ويدوز يديه على شعرو بعصبية عرفها غتكون معصبة ومقلقة اش جا ميهدنها دبا.
شاف تاعيا ومشا رجع خرج..

اما عند زمرد دخلات الكوزينة ريحة طياب عاطية بانت ليها الخدامة كتشرمل فالدجاج والياقوت كتقاد شلايض بقات واقفة كتشوف شنو دير..

زمرد: خالتي فاش نعاونك؟

الياقوت: البسطيلة!
مشات زمرد لقات الورقة اصلا واجدة بقا ليها غير العمارة طلعات كمايمها وبدات طيب وتحاول تنسا شويا وتركز...

داز الوقت وتعاشات العشية..
عند رانيا فبيتها كتلبس حوايجها ومعاذ حداها كل مرة ابقا اسول فيها واش ولا شويا والا كانت عيانة اديرو بناقس من العراضة..ولكن قالت ليه حشومة عوالين عليهم وبلي مبقاتش كضرها معدتها...

صافي سالاو وهبطو لتحت تلاقاو ماماه وزينب حتى هما واجدين..
خرجو ركبو فالطموبيل ومشاو منطالقين...

نرجعو لفيلا العمراني..🏠
وجدو كلشي بقاو كيتسناو فيهم يوصلو.. اما زمرد دخلات دوشات حيت بقات فيها ريحة طياب ولبسات كسوة سامبل هابطة لتحت مع صندالة و خلات شعرها مطلوق...

#يتبع...