حب نتيجة خطا طبي (تتمة)

الجزء مئتين و ستة

حب نتيجة خطأ طبي
#بارت206♡♡

ركب منصف حتى هو حداها ومشاو منطالقين للدار..

داز الوقت وصلو حدا الفيلا هبطات زمرد مشافتش جيهة زمرد دقات فالباب شحال عاد خرجات الخدامة باين عليها يالاه مشات تنعس..

توجهات زمرد نيشان لبيتها طالع ليها الدم دخلات للدريسينغ حيدات الكسوة لاحت عليها بيجامة مسحات الماكياج لي فوجهها ومشات تنعس... مبغاتش تشوفو ولا تهضر معاك حيت غيصدقو غير مدابزين...

أصبحنا وأصبح الملك لله..

فرنسا(باريس)...
عند سارة جالسة فالبيت مع البنات مجموعين كل وحدة جالسة مربعة رجليها حاطين الوسط زريعة والسقاطة ومجمعين ولا نقولو سارة لي كتعاود ليهم وهما كيتصنطو...

سارة: وصاافي هادشي لي وقع منبعد رجعت فحالي..

لمياء: اويلي هادشي كامل وقع يا المكلخة..
نقزات واحد البنت..

اميرة: سارة واش زوين كيداير هاد الراجل ؟؟

سارة: واش نتي من هادشي كامل مبان ليك غير واش زوين ولا لا؟

اميرة: وخلاص قولي...

سارة: صراحة زوين... حروفو كحلين عرفتي ملي كتكوني واقفة معاه كتحسي بالأمان.. وهو لي لقاني منين توضرت فالغابة... وقابلي منين مرضت ااا اه..

كتهضر وهي سارحة وتعبر مقاطعها غير صوت البنات لي دارو كراااخ بالضحك كل وحدة طاحت شادة كرشها...

سارة: اويلي احم نتوما مالكم البنات وااااا البنااااات... مالكم واش قلت شي حاجة ماشي هي هاديك...

لمياء: لا لا بالعمى واش قلتي شي حاجة غير بان ليا تزعطي وصافي...

اميرة: والله مكدبتي السيدة مشات ههههه...

سارة: منيتكم حتى هداك يتزعطو فيه الناس زهواني لاخر... حيدو حيدو خليوني نمشي نقرا لي تبعكم مشا خلا..

ناضت سارة بالزربة هاربة من البنات عرفاتهم غيبقاو شادين فيها وعندهم الحق هي براسها معرفاتش كفاش قالت ديك الهضرة...

لبسات حوايجها هزات كتوبتها وتمات خارجة دازت على البنات لي سمعوها الهضرة عاد خرجات...

نمشيو لبلاصة خرا..
بلاصة مبعيداش بزاف فواحد الدار مقابلة مع السكنة ديال سارة.. كان امجد الفوق كيطل من زاج خاشي يديه بجوج فجياب حتى بانت ليه سارة خرجات وركبات طاكسي.. تنهد بالجهد ودار حل البلاكار جبد فاليز وبدا كيجمع فحوايجو ناوي يرجع للمغرب.. يصلح شي واحد منهم يا علاقتو فالخدمة و لا علاقتو مع الناس وعائلتو وخوه.. بزاف ديال الحوايج باغي يبدلهم باغي يبدل راسو من الاسوء للأحسن وختار يصلح علاقتو مع عائلتو بعدا ويشوف ماماه لي بينو وبينها مدة هادي...

صافي سالا هز باسبور ديالو والبيي تاع طيارة لبس حوايجو لاح عليه جاكيط تاع الكوير ونضارات شمسية على عينيه حيت عندو الطيارة فالعشية مع 2 ولكن خاصو يقاد شي امور هي اللولة...

خرج ركب سيارتو ومشا منطالق مخلي العجاجة موراه...

نرجعو للمغرب🇲🇦

زمرد فاقت فطرات ومشات تكمل البروجي ديالها هدا هو اخر نهار وتساليه حيت خدامة عليه غير من دار حتى تساليه عاد تمشي للمدرسة..

بقات شحال حتى طاحت ليها ماماها فبالها حطات كلشي من يديها.. ومشات حلات المجر جبدات منها واحد تصويرة فيها زمرد معنقة ماماها وكيضحكو شافت فيها شحال توحشات ماماها بزاق ياريت كون مماتتش وبقات معاها...

#يتبع...