Mr.අතිපණ්ඩිත

26

#Mr_අතිපණ්ඩිත
_______💛 26 කොටස 💛_____

කෙනාර් මගේ කොන්ඩෙත් අවුල් කරල පහලට ගියාට පස්සේ, මම මොහොතකට වේගෙන් ගැහෙන පපුවට අතකුත් තියාගෙන කල්පනාකරේ මොහොතකට කලින් ඒ මොකක්ද ඒ සිද්ධ උනේ කියලා.

හිටිහැටියෙම මගේ කාමරේට කඩාපාත්වෙලා හිතුවෙම නැති විදිහට එයා හැසිරුනේ. එයා පැත්තකට දාලා මම කල්පනාකරේ මොහොතකට කලින් මම එයා ඉස්සරහ හැසිරුණ විදිහ. මොකක්ද මට ඒ උනේ.
කෝල් එකෙන් පස්සේ හිතෙන් කෙනාර්ට බැන බැන අඬ අඬා හිටපු මම එයාගේ වචන, ස්පර්ශයන් ඉස්සරහ නිකන් හීලෑ උන හා පැටියෙක් ගානට වැටුණ.

ආයෙම ආයෙම මැවෙන්න ගත්තෙ කෙනාර් මාව උස්සල ඔඩොක්කුවට ගත්ත විදිහ, එයා ආදරෙන් මගේ කම්මුල් ස්පර්ශ කරපු විදිය.... ඊළඟට හැමදාම වගේ දුන්න එයාගේ දඩබ්බර , ආඩම්බර , හිතුවක්කාර හාදු ටික. ඊළඟට කල්පනාකරේ එයා මට සීරුවට හැමදේම පැහැදිලි කරල දුන්න හැටි.

මගේ ඇස් දිහාම බලාගෙන ඒ කියපු දේවල් ආයෙම ආයෙම ඇහෙන්න ගත්ත මගේ හිත ඇතුලෙන්ම. "මගේ කෙල්ල" එයා ඒ පණ්ඩිත විදියටම ආඩම්බර විදියටම ඒක කියපු හැටි මතක්වෙනකොට මටත් නොදැනීම මගේ මූණෙ ඇදුනේ හිනාවක්. කෙනාර් ගිහින් පැයක් දෙකක් යනකන්ම සයනය මත වැතිරිලා මම හිටියේ අමුතුම හීන ලෝකෙක අතරමං වෙලා.

කෙනාර් ඉස්සරහදි දැනෙන ඒ අමුතු නොසන්සුන්කම, එයාගේ බැල්ම ඉස්සරහ මහ අමුතුවට හිරිවැටෙන හිත, එයාගේ ස්පර්ශයන් ඉස්සරහ මටත් නොදැනීම මෙල්ල වෙන මගේ අකීකරු හිත, මගේම කෙනාර් ඉස්සරහදි ආයෙම හෙමින් සීරුවෙ ඔලුව උස්සන්න දගලන පරණ අශූ...

ඒ දේවල්, ඒ හැගීම් තාමත් මගේ හිතට තේරුම් ගන්න බැරි ප්‍රහේලිකාවක්. මොකද කැමැත්තට සමානව අකමැත්තකුත් තාමත් මගෙ හිතේ කෙනාර් ගැන තියෙනවා . පැයකින් දෙකකින් මම අනීෂට කෝල් එකක් අරන් එයාට කීව සිද්ධ උන දේවල්.

_____________🖤_____________

මේ තියෙන තත්වෙත් එක්ක වෙඩින් එක කට උඩ තියාගෙන අලුතෙන හැමදේම ලෑස්ති කරන්න අමාරුයි කියලයි, කෙනාර් ගොඩක් කාර්යබහුල නිසා කෙනාර්ගෙ පැත්තෙන් තව දෙන්නෙක් යන්න අමාරු වගක් අනීෂට කිවා. පුදුමයි අනීෂා එක පාරින්ම මං කියපු දේට කැමති උනා.