عِشگ السادة

✨ مقتطفات مِـن الرواية ✨

#المقتطف_الاول

_____________

گاعدة ودا يحطولي مكياج وأسمع أصوت تتعالى
صوت الهلاهل إلي چانت مثل السچاچين تخترق گـلبي
مدا أستوعب يعني معقولة هاي هيَ ..؟

إنتهت قصتنا وهيَ بعدها ما إبتدت ؟
إنتهىٰ كُلشيء چان بيناتنه ؟
حُبنا ، ضحكنا ، بچينا ، سوالفنا ، نظراتنا ، خوفنا ، حرصنا ، إنتظارنا ، أحلامنا
كُلشيء راح ؟
حلم حياتي راح تبخر گدام عيني !
الشخص الي چنت بانيه أحلامي ويا ومستقبلي اجه بمكانه شخص ثاااني ؟
آخخخ يا دنيا آخخ
فززني من صفنتي صوت أُختي و هيَ تقترب من إذني وتهمس

- كافي شبيچ گالبة وجهج اضحكي شوية ابتسمي الحيايه ... و ...
وخواتهن وبناتهن يباوعن عليچ ويبسبسن لا تخليهن يشمتن بيچ ولــچ

- مو بيدي وحق الله مو بيدي .. گلتها وطفرت دمعة من عيني

- ولــچ اسكتي فضحتينا
شيفيد البچي بعد إسكتي و إرضي بقسمتچ و نصيبچ
وشوفي من كلام أُمي و إلي فهمته من أبوية يگولون دُره مالت الله وخوش رجال يارب يطلع صدگ ومو العكس يارررب

تنهدت بقهر وحچيت بگلبي
- ههء هيَ هاي تاليتي حياتي الجايه ومصيري ظّل بإحتمالات ؟ لو يطلع زين لو شين وبالحالتين آني إلي واگعة بيها
هزيت راسي بيأس ومسحت دموعي
وساد الهدوء على شكلي ومعاني وجهي بس هيهات إلي بداخلي يوصل ربع هدوء وبرود مظهري احس روحي توجعني وتاكُل بيه وبداخلي ضجة ونار ما تطفه وهوسة مـا تترتب
نار الندم والشوگ والفراگ إلي تاكُل بيه وتحرگني حرگ
گمت احس روحي تاكُل بروحي ..