بيت امي هيله 🍃

7

~مرت سنه

"اول ليالي رمضان المبارك"
يجمعهم بيت فيه حنين ومشاعر الساعه 6:10
دخل عليهم وبيده بنته "ترف"
"سليمان" تقبل الله ومبارك عليكم الشهر
تفاوتت الردود
"منا ومنك 'علينا وعليك'حياك سم "
نزل بنته عند كرسي جدته
وحب راسها "تقبل الله يالغاليه
"الجده" منا ومنك يمه سم يمه
وجلس معاهم فطرو وصلوا وخلص فطورهم بعد السوالف والسؤال عن الحال ...

بالطرف الثاني من البيت

"ام سليمان" يمه افراح اتصلي على سليمان شوفيه جاء ولا لا
"افراح" ابشري يمه
"زينب" بنات تكفون احس بنت سليمان كاسره خاطري فقدت امها ولا شافتها
"هديل" صادقه وسليمان بعد من توفت منال وهو متغير مرره ومايرضى على بنته ابد
"هبه" لا تلومينه ترا شي صعب عليه يعني بيوم الله يرزقه بضنى وياخذ منه زوجته
"جواهر " صادقه هبه وترا واضح ان جدتي ناويه له وحده لان اسمع برهوم يقول لأمي ان جدتي ناويه تزوجه وتقول مو بكيفك تربي البنت بدون ام حتى لو هي مو امها تصير لها ام
"دعاء" الله يعينه بس صدق كلام جدتي يعني خالي ساكت له لانه عارف رفضه بس جدتي شكله ملزمه عليه مررره
شوي تدخل عليهم افراح وبيدها ترف البنات كلهم فزوا يبون يشيلونها وبدت تصيح
"افراح" زين لكم كذا صيحتوها الحين كيف تسكت
"زينب" هاتيها اخذتها زينب وحضنتها وبدت تهديها وهدت
"افراح" خايسه ذا البنت من تو تصيح عندي والحين ساكته عندك
"زينب" الناس مقامات ياقلبي انتي
جلسوا البنات وزينب كانت حاضنه ترف ونايمه بحضنها دخلت الجده وشافت زينب
"الجده" يمه زينب اذا فضيتي تعالي لي بغرفتي
"زينب" ابشري يمه
"دعاء" غريبه ليش تناديك امي هيله
"زينب" مدري علمي علمك
"جواهر " مدري ليه عندي احساس ان اللي جدتي تبي تزوجها سليمان انتي
"زينب" لا ما اتوقع وبعدين انا ما اشوف سليمان غير ولد عمي واخوي
"دعاء" زينب تذكرين لما كلمتيني بالمزرعه انك حاسه ان بيصر شي ومو متطمنه
"زينب" اي بس ليش توك تتذكرين الكلام
"دعاء" لان بعدها بشهر توفت و صارت احداث غيرها من وفاة صديق عمي ابو سليمان وشلون تأثر وبعدين خسارة خالي خالد ومشكلة هبه مع البنت اللي تصورها بس الحين تحسنت الاوضاع مره
"زينب" صادقه بس احس قلبي للحين مو مرتاح
"افراح" ان شاء الله خير وبعدين ترا كل شي مكتوب ومقدر هبه وتخطت اللي صار معاها وابوي وعمي نفس الشي بس باقي سليمان الله يصبره
"الكل" امين
شوي الا تصيح ترف بحضن زينب
"افراح" زينب ياقلبي عطيني اياها ازعجتك كل شوي تصيح
"زينب " لا ماعليه بس شكلها جوعانه
"افراح" تمام بروح اشوف سليمان

عند الشباب
جالسين ويسولفون
"ابراهيم" شباب تخيلو امس واحد من اخوياي يقول شاف ماجد ولد ابو ماجد صديق خالي داود يقول انه متغير وحالته حاله و ضعفان ومو نفس اول
"سعود" اكيد ياولد يعني انت متخيل ان طول حياته عايش مع ابوه وفجأة ابوه يتوفى الله يكون بعونه بس
"عمار" طيب شباب ليش ما نعزمه نغير نفسيته شوي ومره وحده نخلي خالي داود ينبسط بشوفته
"نايف" الصراحه انا اتفق مع عمار
"مشاري" وانا بعد بس كيف بتجيبون رقمه
"نايف" بلا غباء زايد استاذ مشاري يعني من وين بنجيبه اكيد من ابوي
"مشاري" انت شفيك ياخي الواحد ماينسى يعني
"عمار" خلاص شباب هدوا
شوي ويرن جوال سليمان
"سليمان" هلا افراح
"افراح" سليمان وين شنطة بنتك البنت تصيح جوعانه
"سليمان" جيبيها لي
"افراح" لا خلها متعلقه ب زينب مو راضيه احد ياخذها
"سليمان" تمام بس تخلص جيبيها لي بمشي
"افراح" دام انك بتمشي خل البنت عندنا ليش تاخذها معاك
"سليمان" افراح لو سمحتي مالك دخل فيني و بنتي
"افراح" خلاص اسفين بس ابي شنطتها
"سليمان" يالله الحين اجيبها لك
"افراح" تمام

•••••••••••••••

الساعة 7:45 م
دقت الباب غرفة جدتها وسمعت صوتها تسمح لها بالدخول
"الجده" تفضلي يمه
"زينب" هلا يمه
"الجده" تعالي اجلسي عندي يمي
راحت زينب وجلست عند جدتها
"الجده" شوفي يمه الكلام اللي بقوله لك مابي احد يعرف عنه زينب بتوتر تنتظر جدتها تكمل كلامها تنهدت الجده
"الجده" اسمعيني يمه الخيار كله لك وابيك ماتردين علي الحين ابيك تفكرين بكلامي زين وبعد اسبوع تعطيني رايك باللي قلته لك شوفي يمه انتي عارفه سليمان عدل وتربيتي معاه وشفتي حياته مع منال شلون كانت وشلون كان يحبها وشلون راحت منه بغمضة عين والحين عايش مع بنته بيته ومسكر عليه الباب
زينب وهي فاهمه مغزى جدتها من الكلام هزت راسها وكملت الجده
"الجده" اسمعيني يمه محد بيقدر ينسي سليمان منال بس نقدر نعوض الفراغ اللي حاس فيه ونجبر كسره وانا اشوف انك انتي اللي تقدرين تجبرين كسره و تعوضينه عن منال الله يرحمها وتكونين ام لترف ادري ان الموضوع ثقيل عليك بس مابيك تستعجلين وترا محد يدري عن هالكلام غيرك اذا كنتي موافقه بكلم سليمان واذا رفضتي هذا شي راجعك بس صدقيني يمه انتي بتكونين خير ام لترف وافضل زوجه لسليمان
تنهدت زينب وهي تحس بكتمه بصدرها
"زينب" اعذريني جده ان شاء الله اقولك قراري الاسبوع الجاي ووقفت وطلعت من غرفة جدتها وعلى طول راحت للمطبخ وطلعت من الباب لان نادر يكون احد فيه تحس انها مكتومه ومو قادره توقف على رجولها جلست على الارض وتحس ان راسها ثقيل ماتدري ليه ...

••••••••••••••••

مكان اول مره نزوره
وشخص بس نعرف اسمه ...

^نعرفكم عليه

"ماجد بن فهد "
انسان اجتماعي ومتعلق بأبوه بشكل كبير و حنون بشكل كبير بس ظروف الزمن غيرته لشخص قاسي
وشديد القسوه شكل الخارجي يعكس اللي داخله من حزن عمره 26

جالس على مكتبه ويطالع الملفات والاوراق اللي تراكمت عليه شوي ويرن جواله
"ماجد" السلام عليكم
"نايف" وعليكم السلام كيفك ماجد
"ماجد" الحمد الله بخير بس عفواً مين معاي
"نايف" معليش ماعرفتك علي معاك نايف بن داود ولد صديق ابوك الله يرحمه
"ماجد" هلا وعليكم السلام اي اي عرفتك
"نايف" الصراحه مارح اطولها عليك بس حبيت اعزمك على السحور عندنا الليله واتمنى انك ماتردني
"ماجد" ماعاش من يردك وان شاء الله رح اجيكم بس وين بالضبط
"نايف" حياك الله وتنورنا وان شاء الله وانا والشباب ننتظرك بيت جدتي
"ماجد" خلاص تمام عرفته هو مغيره بيت خاله هيله صح
"نايف" اي صح
"ماجد" تمام يالله فمان الله
"نايف" فمان الكريم
•••••••••••••••••••••

عند الشباب
"نايف"خلاص شباب ان شاء الله ماجد رح يجي على السحور
"عمار" زين حياه الله
"سليمان" يالله شباب انا استئذن وصلوا سلامي لماجد وطلع قبل لاحد يرد عليه راح عند باب المطبخ بينادي على افراح بس شاف وحده من البنات متمسكه بالجدار وحاطه يدها على صدرها ويالله تتنفس ....

••••••••••

نوقف هنا يا حبايبي واذا لقيت أي دعم منكم نزلت البارت الثامن عطوني رايكم بالرواية ✨

"اسفه اذا في اغلاط
"ولاتحرموني من دعمكم محبتكم دلع ♥️