خذاني الحب في عينك

البارت الثاني عشر

جاء اليوم الثاني والرجال في مشب الجد مطلق و يسولفون ويفطرون
رعد : وينه سلمان وين راح
الجد سعيد : مدري عنه قال عنده مشوار مهم
الجد مطلق : الله يهديه
الكل : امين
جلسو الرجال يفطرون و مناير و بدور و بدريه مع الحريم داخل يفطرون
بدريه : بنات زهق ودي يصير شيء حماسي ولو مره
بدوره : ايه والله
الجده ناديه : احمدو ربكم غيركم ما قد شاف شيء من الي انتو شفتوه
مناير : ايه والله
وجلسو يسولفون ويفطرون
عند الرجال __
الجد مطلق: كيفك ياولد يا خالد
خالد : والله بخير يا جد والحمدلله
الجد مطلق: اسمعو وش رايكم نتغدا برا
رعد : ابد الي تشوفه يابوي
الجد سعيد : خلاص ياخوي سم بالله وقولو للحريم
الجد مطلق : اجل غدانا اليوم برا علشان سلامة خالد
خالد : الله يسلمك
وراحو الرجال و العيال يعلمون للحريم يجهزون وأنهم بيطلعون للغداء برا والبنات طارو من الفرحه وما خلو شيء الا وجابوه و اذن الضهر وصلو وركبو سياراتهم وتوجهو وراحو لمكان من الجهتين جبال و غلى الاجبال أشجار وجبال كبيره و مليانه قرود في كل مكان وافرشو ثلاث زل ( فرشه ) فرشه للحريم و فرشه للرجال و فرشه قريبه من الحريم فيها أغراض الغداء وجالسه مناير و وعد في الفرشه و ينتظرون الغداء يخلص
وعد : جايعه ياخي متى يخلص الغداء
مناير : انتظري ال أن يخلص
و جلسو شوي الا ويأذن العصر
وعد : اذن العصر وانتو باقي ماخلصتو الغداء
مناير : قومي صلي و بيخلص الغداء
وعد : بصلي ويا ويلك لو ما خلص الغداء
قامت وعد تصلي و ما خلصت صلاه الا و مناير بدت تصلي و قامت وشافت الرجال كلهم يصلون ومعهم رجال ثانين يصلون جماعه
رجعت وعد و اول ما رجعت شافت قرد يسحب قدر الغداء وقامت تنط عليه و تتهاوش معه هي ماسكته من طرف و القرد ماسكه من طرف وتصارخ عليه و مناير ماسكه الضحكه في الصلاه و وعد خايفه القرد ينط في وجهها اذا لفت وأخذت أقرب شيء عندها وكان كيس تمر وأخذت الكيس وجلست تخوف القرد به و الرجال خلصو صلاه وكان جنب فرشة مناير و وعد فرشه لرجال ما يعرفونهم وكان مطلق عند الرجال ذولا بحكم انهم صلو معه وكان يبي يسلم عليهم وشوي ويسمع صياح وعد وهي تتهاوش مع القرد والقرد واضح انه كبير
وعد : الله لا يوفقك يا قرد ياخي ما تخاف ربك تجي عند بنت _ بصراخ _ يوووووووه خل غدانا انا جايعه فك الغداء
و مطلق و الرجال الي معه ميتين ضحك و مناير ميته ضحك
اما وعد الي اول ما شافت مطلق يضحك عصبت وناظرت للقرد وقامت تشمر ( ترفع أكمام يدها ) وكان مطلق يكره ذي الحركه الا ما يدانيها  و اول ماشاف وعد تامر تقدم بسرعه و اخذ له عصا ويوجها في وجهه القرد ويسوي نفسه يطلق نار والقرد هرب و وعد تهاوش القرد من وراء مطلق وهي مشمره ( رافعه أكمام العبايه ) و تتحلف على القرد
وعد : ايه تعال هنا مره ثانيه اذبحك ترا ما تعرفني انت
ومطلق لف عليها وشاف يدينها وقام ينزل أكمام العبايه
وعد : لا بالله فك العبايه بالمره خير يا بوي
مطلق بحده : اسمعيني زين عبايتك لا عاد تنفتح ولا تشمرين انتي ارتاحي بس ولا عاد اشوف تشمرين وحن في مكان مليان رجاجيل فهمتي
وعد سكتت وهي مو فاهمه شيء واول مره تشوف مطلق كذا هي تعرف انه مره عصبي وان محد يتجرا يضربه حتى لو مزح بس ما قد شافت هاذي الجانب منه و مطلق كان بيروح وشاف عباية وعد من تحت مفتوحه ونزل مطلق عند رجولها يسكر العبايه و تسلم مناير من الصلاه
مناير وهي تقلد الهنود : مافيه مشكله بابا خذ بركها  
وعد ماتت ضحك و مطلق معصب
مطلق بحده : مناير سكري عبايتك حتى انتي زين انا رايح
مناير : تعال تعال خلص الغداء تعبت وانا المح لوعد ان الغداء خلص بس طلعت بهيمه ما تعرف
وعد بشهقه : هيييي انا بهيمه يا ثور
مناير : ايه بهيمه
وعد : اقول بس يلا صب الغداء انت من تنتظر يصب انا مثلا
مطلق : ايه انتي
وعد شمرت يدينها وهي قاصده علشان مطلق ومطلق اول ما شافه نط عليها ونزل أكمام عبايتها
مطلق : خلاص خلاص انا
وعد : ايه خلك كذا مؤدب
وصب مطلق الغداء و وزع اللحم و تغدو واخذو لهم براد شاهي والي جلس يسولوف والي يلعب و الي اخذ له نومه و ماجت الساعه ٥ الا والكل في السياره ورايحين يتمشون وكل واحد يفرفر بسياره و يصورون و يوصلون البيت مع اذان المغرب و يصلون
ريوف : بنات انا برجع البيت
مناير : لا امانه تعودنا عليك
وعد : ايه والله تعودنا مره و بشتاق لك
ريوف : والله ضروري ارجع اشتقت لأمي وابوي
مناير : ايه والله انك صادقه بس اجلسي معنا بس اليوم و بكره روحي
ريوف بعد تفكير : خلاص تم
رغد : تم
طلعو البنات في البلكونه يسولفون ويشربون قهوه
اما العيال في جلسة متعب و شابين النار و براد الشاهي على النار و على شبة النار و سوالف العيال قرر فيصل يقطع عليهم ويقصد
معذوره عيني على فقدها النوم
حزن الفراق اشبه بحده الحرابه
من زود حزني ما بقى عندي عزوم
ولا كن في حياتي ناس و قرابه
متعب : اسلم
مطلق : اقول بس صب لنا شاهي
فيصل : سم
مطلق : اسلم
و شوي ويأذن العشاء و تجي الساعه ٨ و يجي عبد الرحمن بالشاص و هو مشغل شيلات ويرقص وينزلون العيال من الجلسه و يرقصون مع عبدرحمن ويغنون بصوت عالي وشوي ويشغل عبدالرحمن شيله و يركب مطلق و خالد في الصندوق و معهم عصي ( خيزرانه ) و لابسين الفروه ويرقصون بها  على شيله و العيال يصفقون و بعدها شغلو اغنية شاقني شاقني ويتخبلون العيال في الشارع و كل واحد اخبل من الثاني و الي يرقص هندي والي يرقص باكستاني و الي بس يحرك يدينه في السماء و الي يغني بصوت اعلى ويطلع عليهم الجد مطلق
الجد مطلق بالعصا : وجع يوجعك المرض انت وياه يالي ما تستحون على وجيهكم
العيال كلهم وقفو و متعب باقي في الشاص ولا شاف الجد مطلق و شغل اغنية( الحب لك والشوق لك ) و نزل وركب في الصندوق وهو يصيح
متعب : يلا يا عيال
ويرقص و يتخبل و يشوف العيال واقفين و يناظرون له و هم ماسكين الضحكه و المسكين على باله انهم معجبين به ويتحمس زياده وينط من فوق الشاص ويدور حول نفسه ويغني بصوت عالي و يرقص و مطلق يلمح له و هو مو فاه و يرجع لعند الجد مطلق و هو باقي ما شافه ويركض وينط لعند العيال و العيال ضرب فيهم عرق النذاله و يصفقون له و يرجعونه وهو تحمس و جاء يبي ينط مره ثانيه ما حس الا و الجد مطلق معطيه ذيك الضربه باخيزرانه والعيال ميتين ضحك و هو اول ما حس بالضربه صارخ و يضربه الجد مره ثانيه
الجد مطلق: الناس نايمين وانا تشغل اغاني ها يالي ماتخاف ربك 
متعب : والله ياجد انه مو انا
ويضربه الجد زياده الجد مطلق : وتكذب عيني عينك
متعب : والله ياجد انه عبدالرحمن هو الي جاب الشاص اسأل العيال
ولف الجد على العيال و العيال كلهم ناظرو لعبدالرحمن وشافوه ملهمه شيء وكأنه واثق انهم بتقولون متعب
عبدالرحمن: اححح يا متعب ما تخاف ربك تكذب على ابوي
الجد مطلق: صدق ياعيال من الي جاب الشاص
العيال كلهم امسكو عبدالرحمن و اخذوه للجد وهو يحاول يهرب ويلعنه و مسوي دراما
عبدالرحمن: كذابين مو انا كذا تسون بعمكم يا قليلن الادب اه ضهري نزلوني
ويشوف حسي ماسك رجله و يضرب رجله في وجه حسين و يتحرك
حسبن : والله مانفكك على الضربه ذي
ويسحبونه للجد مطلق
عبدالرحمن: يبه كلهم كذابين بس يبونك تضربني حاقدين علي و تراهم يدافعون عن خويهم
متعب : اه يا الكذب وتكذب وفي وجهه ابوك هاذي حتى انا وابوي في قبره ما سويتها
الجد مطلق حس ان متعب صادق اول ما جاب طاري ابوه وضرب عبدالرحمن و عبدالرحمن يحاول يهرب ويمسكونه العيال للجد ويضربه و يخليه ينام في بيت متعب و متعب ينام في بيته مع خالد و صقر و مطلق و راحو كلهم ينامون و عبدالرحمن يدعي على كل واحد مسكه
عند البنات ___
شافو لعب العيال و شافو كيف الجد ضرب متعب و عبدالرحمن و جلسو يضحكون و ريوف عينها على صقر وهي تتذكر موقفها معه اخر مره وتغطي وجهها بالمخده و تذكرت كيف رمة المخده عليه وكيف كان شكلها
وعد : اسلم
مناير : وش فيش
وعد : اسلم والله يا بنات شكل ريوف طاحت ولا احد سلم عليها
رغد : ايه والله
ريوف : لا لا
وعد : اجل وش فيه وجهك قلب طماط
ريوف : بقول لكم وش صار
مناير : قولي
وقالت لهم ريوف والبنات يضحكون
مناير : ايه وانا اقول وش فيك ذاك اليوم طلع وراك بلا لا و مع من مع اخوي اخخخخ حسافه العشره الي معك
وعد ضربة مناير براسها : اقول بس مو وقت الدراما حقتك ماتشوفينها تحبه
ريوف : لا وش دخل احبه اقول بس البخي
مناير : ترا عادي بخليه يتزوجك غصب عنه انتي قولي وأبشري بالي تبينه 
ريوف : اقول بس سري امها منزين اخوك الحين بنات جايعه و ودي باندومي
وعد : ايه والله حتى انا جايعه
مناير : وعد انتي انطمي انتي اصلا دائما جايعه
رغد : ايه والله بغير تاكل ولا يبين فيها
مناير : هيا بس للمطبخ
راحو البنات للمطبخ حق مناير. ولقو ثلاجة مناير فاضيه مافيها الا بيض و طماط و خيار و عصيرات
وعد : اول مره اشوف ثلاجه فاضيه لا وفيها الشيء الي نتمناها دائما يكون بثلاجتنا
مناير بضحكه: أغبياء انتو انا ما اجي هنا الا اخر الليل وش تنتظرون مني
ريوف : طيب وش بنسوي
مناير : بنزل تحت
رغد : طيب والعيال
مناير : بندبر لهم حل
ونزلو البنات تحت للمطبخ و اخذو الاندومي وجلسو يطبخون وهم ناسين يقولون للعيال لا يدخلون ولا بسين بجايم طقم نفس الشيء و ما بين ما يطبخ الاندومي ركبت فوق الطاوله بنتنا الخبل وعد فوق الطاوله و معها ملعقة الاندومي و تأشر بيدها وهي تغني والبنات شبكو بسرعه على الاغنيه
يالي خذيت الدلع والملح و الذوق
من كلمتك لا حاكيت و نظره العين
ياساكن القلب و الشريان و عروقي
مابين عرقي و الشرايين
اما العيال اول ما سمعو صوت وعد طاحو ضحك و كل واحد يضحك وهو ميت ضحك وشوي و تركب ريوف فوق الطاوله مع وعد و ما خذه الملعقة في وجهه وعد
ريوف : انت سيم سيم فلفل بس في فرق واهد فلفل يهرق لسان انت يهرق قلب
و وعد مسويه مستحيه و العيال اول ما سمعو الغزل حق ريوف ماتو ضحك بحكم ان المجلس جنب المطبخ اما مناير و رغد يعززون لريوف و وعد وشوي الا ويشوفون موية الاندومي على الفرن ونطو كلهم يشمون ريحة الاندومي و وعد من الحماس شلت الاندومي بيدها من دون قفاز يحمي يدها و اول ما مسكت القدر حرقها و فكره وكان بيطيح بس الحمدلله ما طاح و مناير تلعن وعد
ريوف : اوف هاذا مشكله واجد انا كلام انت يهرب قلب بس الهين انت يهرب يد حق انتا
وعد : اذلفي بس
ريوف : اوكي ماما انا روح بعدين انتا مافي شوف انا انا الهين زعلان
وعد : لا لا ميري اجلسي هنا انا مره هبي انتا انا مافي هياه انتا مافي موجود
و ريوف عند الباب وقامو يركضون لبعض بالبطئ و مسوين نفسهم يبكون ويضمون بعض
مناير : الي يبي اندومي يلحقني
ريوف رمت وعد
ريوف : انا ابغى
وعد وهي بالأرض : انا بعد ابغى
وقامو يلحقون مناير و رغد وهم يتسابقون و اخذو من ثلاجة مناير عصيرات غازيه و طلعو للبلكونه ويسولفون و ياكلون وشوي وقررت ريوف تطلع مواهبها في الغناء وقامت تغني بصوت علي فوق البلكونه وشوي وجت معها و وعد
حبيتك تنسيت النوم
ياخوفي تنساني
حابسني برأت النوم
وتاركني سهراني انا
حبيتك حبيتك انا حبيتك حببييتك
ويغنون بصوت واحد و مناير و رغد ميتين من أشكالهم وشوي و تطلع عليهم فوزيه وتهديهم
فوزيه : خبلان انتو
مناير : كلميهم هم مو احنا
فوزيه : كما ما تنادوني اغني معكم
مناير : هاا
فوزيه : احب ذي الاغنيه مره
وعد : والله ما نخليها في خاطرك هيا بنغنيها مره ثانيه
ريوف : ايه 
فوزيه : قدام
و ارجعو يغنون بس هاذي المره كلهم يغنون حتى مناير و رغد وبعدها نامو كلهم بالبلكونه ومعهم بطاطين   
______________