Wonderful Promise

Ep 8 (U)

ဖေဖေက ဧည့်ခန်းထဲမှ ခုံပေါ်တွင် နောက်ကျောကိုမှီထိုင်ပြီး မျက်လုံးတွေကိုမှိတ်ထားသည်။ ထည်ဝါက ဖေဖေနှင့် မျက်နှာချင်းဆိုင်တွင် ထိုင်နေရပြီး စိတ်ထဲတွင် ပါပါးမြန်မြန်ပြန်ရောက်လာဖို့သာ ကျိတ်ဆုတောင်းနေမိသည်။ ဖေဖေကြီးနှင့် မေမေကြီးကလည်း တရားပွဲသွားရန် တီကြီးတို့လင်မယားက လာခေါ်သွားသဖြင့် အိမ်မှာမရှိကြပေ။

ဧည့်ခန်းထဲတွင် ဖေဖေနှင့်ထည်ဝါ နှစ်ယောက်တည်းသာ ရှိနေရသည်။ ကျန်မိသားစုဝင်များမှာ "တစ်ယောက်မှ ဝင်မလာနဲ့" ဟူသော အမိန့်ကြောင့် အတွင်းခန်း Slide Door နောက်တွင် အပြုံလိုက်ရှိနေကြမည်မှာ မြေကြီးလက်ခတ်မလွဲပင်။

ပါပါးက ရုံးမှပြန်လာနေပြီဟု ပြောသော်လည်း ခုချိန်ထိ အရိပ်အယောင်ပင် မမြင်ရသေးပေ။ ဖေဖေနှင့် အနီးတဝိုက်တွင် လေထုကအေးခဲနေသလိုခံစားရပြီး ဒီလိုအခြေအနေကြီးကို ထည်ဝါသည်းမခံနိုင်သဖြင့် တိတ်ဆိတ်မှုကို စတင်ဖြိုခွင်းလိုက်သည်။

"ဖေဖေ"

ဖေဖေက မျက်လုံးများကို ဖွင့်လာပေမဲ့ ထည်ဝါ့ကိုလှည့်မကြည့်လာသေး။

"ဖေဖေ ဝမ်းဖိုးကို စိတ်မဆိုးပါနဲ့"

တကယ်တမ်း ဖေဖေစိတ်ဆိုးနေတာမဟုတ်မှန်း ထည်ဝါသိပါသည်။ ဖေဖေ့ခံစားချက်ကို နားလည်သော်လည်း ထည်ဝါ အမည်မဖော်ပြတတ်ပါ။
ဒီနေ့ ကိုကိုနှင့်တူတူ Vlog ရိုက်ကူးရေးသွားမည်ဟု ပါပါးဆီက ခွင့်ပြုချက်ယူထားသဖြင့် ဖေဖေလည်းသိသည်။ ထည်ဝါလုပ်မိသည့် အပြစ်က ဖေဖေလာကြိုသည့်အချိန် တေဇတို့အိမ်မှာ ရှိမနေဘဲ ကိုကို့ရုံးခန်းထဲမှာ အိပ်ပျော်သွားခဲ့မိသည့်အပြစ်။

"Wonderful က အခွင့်အရေးပေးရင် တစ်ဆုံးထိနှိုက်တတ်တာပဲ"

"အဲ့ဒီလို မဟုတ်ပါဘူး ဖေဖေရယ်... ဝမ်းဖိုး မနက်အစောကြီးထသွားရလို့ ပင်ပန်းပြီး အိပ်ပျော်သွားမိတာပါ"

"ပင်ပန်းရင် အိမ်ပြန်အိပ်လို့မရဘူးလား ဝမ်းဖိုး... မဟာကြည်ညွှန်းက ရုံးခန်းတွေကရော ဝမ်းဖိုးအတွက် လာရမှာ အရမ်းဝေးတဲ့နေရာတွေလား... ဖေဖေ့ရုံးခန်းကရော ဝမ်းဖိုးလာနားနေကျ နေရာမဟုတ်တော့ဘူးလား...ပြီးတော့ ကိုယ်ရင်းနီးတဲ့ နေရာမဟုတ်ရင် ဘယ်လိုမှသိပ်လို့ မရတဲ့ ဝမ်းဖိုးက..."