Wonderful Promise

Ep 9 (U)

သူ့ထက်နိုင် ထည်ဝါတို့ခြံနှင့် ခပ်လှမ်းလှမ်းမှာ ကားရပ်ပြီး အိမ်ကြီးကိုငေးကြည့်နေမိသည်။ ကားမှန်ကို တစ်ဝက်ချကာ လက်ထဲမှ စီးကရက်ပြာတောင့်ကို ခြွေချလိုက်ပြီး မီးခိုးငွေ့တို့ကို ခပ်မျဥ်းမျဥ်း မှုတ်ထုတ်လိုက်သည်။

၂ ရက်။
ထည်ဝါ့ကို မတွေ့ရတာ ၂ရက်ရှိပြီ။

"ဝမ်းဖိုး အဆင်ပြေရင် ဖုန်းဆက်မယ်... ကိုကို မလိုက်လာနဲ့နော်" ဟုပြောသွားပေမဲ့ ဒီနေ့အထိ ဖုန်းမဆက်လာသလို သူ့ထက်နိုင်ဖုန်းဆက်တော့လည်း မကိုင်ပါ။ ၂ ရက် ဆိုသည့်အချိန်က သူ့ထက်နိုင်ရဲ့ သည်းခံနိုင်စွမ်းကို ကျော်လွန်လာပြီဖြစ်သဖြင့် ခြံရှေ့အထိ ရောက်လာခဲ့ရပြီ။

ကားဟွန်းကို အကျယ်ကြီးတီးပြီး အိမ်ထဲကိုဝင်သွားပစ်လိုက်ချင်ပေမဲ့ သူ့ထက်နိုင် မွေးဖွားကြီးပြင်းခဲ့ရသည်က ဒီလိုအကျင့်စရိုက်မျိုးနှင့် မဟုတ်၍ ဆန္ဒကို သိက္ခာနှင့် ထိန်းရသည်။

ဒီမိသားစု အသိုင်းအဝိုင်းထံမှ ဒီအဖိုးတန်ကလေးကို ရယူပိုင်ဆိုင်ခွင့်ရဖို့ ဒီလောက်ထိ မလွယ်ကူမှန်း သူ့ထက်နိုင်က နားလည်လက်ခံထားခဲ့ပြီးဖြစ်သည်။ ဒီလိုခပ်မြန်မြန် ချစ်ခွင့်ပန်ဖို့ မရည်ရွယ်ထားခဲ့ပေမဲ့ ထည်ဝါနှင့် ပြန်တွေ့ပြီးနောက်မှာ မျက်တောင်ကော့လေး တစ်ချက်ခတ်တာတောင် စက္ကန့်မလပ်ထိုင်ကြည့်နေချင်မိသည်အထိ လောဘတက်လာခဲ့မိခြင်းကြောင့်ပင်။

"ဝမ်းဖိုးတို့က ဘာမှမဟုတ်ကြသေးလို့ ခဏခဏမတွေ့ဘဲနေကြမယ်နော် ကိုကို့" ဆိုသည့် စကားလေးကို သူ့ထက်နိုင် အူယားလွန်းသဖြင့် ဟုတ်အောင်လုပ်လိုက်ခြင်းဖြစ်သည်။ အကျိုးဆက်ကတော့ မျက်စိရှေ့မှ ပျောက်သွားလိုက်သည်မှာ ၂ ရက်ပင်ရှိခဲ့ပြီ။

ဒီ့ထက်ကြာလာလျှင်တော့ သူ့ထက်နိုင် လူကြီးတွေနှင့် ဝင်တွေ့ပြီး တောင်းပန်ရမည်ဆိုလျှင်လည်း တောင်းပန်ရန်အသင့်။ သူ့ထက်နိုင် ဘဝမှာ တရားသဖြင့် လိုချင်တာတစ်ခုကိုရဖို့ ဘယ်သူ့ကိုမှ ဘယ်တုန်းကမှ တောင်းပန်ပြီးမယူခဲ့ဖူးပါ။ ထည်ဝါကတော့ ချွင်းချက် ဖြစ်ပါလိမ့်မည်။ သူ့ထက်နိုင် ဆိုသည့်နာမည်ကို ဒယ်ဒီပေးခဲ့ခြင်းမှာ ရှုံးဖို့မဟုတ်။ သို့သော်လည်း ထည်ဝါ့ အပေါ်မှာ မိသားစုထက် မလျော့သော အချစ်တို့က ခိုင်မာစွာတည်ဆောက်ခဲ့ပြီးပြီမို့ ထည်ဝါကြည်ညွှန်း နှင့်ပတ်သက်လျှင် မိသားစုဝင်တွေရှေ့လည်း ဒူးထောက်ဖို့ ဝန်မလေးသူဖြစ်ခဲ့ပြီ။