الحب الاول لا يكفي

الحب الاول لا يكفي بارت 13

حلا : ياادي النيله مين بيتصل , ايه ده سامي
حلا : حبيبي عامل ايه
سامي : الحمدلله كلمتلك كريم بهدلتهولك
حلا : متحرمش منك
سامي : بقولك
حلا : قولي ياحبيبي
سامي : انا عاوز اقابل قريبك سعد
حلا : سعد ؟
سامي : اه سعد
حلا : مش هينفع
سامي : مينفعش ليه
حلا : اصل احنا متخانقين وماليش كلام معاه
سامي : بسيطة قوليلى بس مكانه فين وانا هتعرف عليه بطريقتي
حلا سكتت شوية ومعرفتش تقول ايه
سامي : هاا ياحلا فين مكانه
حلا : اصل هو مسافر بره وانت شاغل نفسك بسعد ليه بس هو اول مايرجع من السفر هقولك
سامي : لا مفيش بس قولت بما ان هخطبك لازم اتعرف على عيلتك برضه
حلا : طب اتعرف على بابا الاول
سامي : ما ده الي هيحصل متقلقيش عاوزك بس تعرفيه ان هاجي الخميس الجاي ده
حلا : بتتكلم جد صح
سامي : اه جد ولا انتى مش موافقه
حلا : لا موافقه اكيد انا هقفل من هنا وهقوله
سامي : طب يلا وانا هقفل اسيبك تقوليله وبالمره اخلص كام حاجه كده
حلا : تمام باي
سامي : سلام
وقفلت حلا وهي مبسوطه وراحت تقول لـ باباها
حلا : باباا
عبدالله : ايه ياحلا
حلا : في خبر حلوه عاوزه اقولهالك
عبدالله : خبر ايه قوليلي
حلا : سامي كلمني وقالي ان هيجي الخميس الجاي
عبدالله : ازاى يعني مش ده اللى خانك مع صحبتك
حلا : لا ماطلع كله ده سوء تفاهم
عبدالله بعصبيه : سوء تفاهم خلتيني اطرد بنت مالهاش اي ذنب واعزم ناس هنا يوم الخميس وتقوليله سوء تفاهم
حلا : هي البنت دي اصلا عينها عليه بس هو اختارني انا عشان بيحبني , وناس مين يابابا
عبدالله : مديرك الاستاذ محمود وابنه حسن معزومين عندنا الخميس ده
حلا : وازاى متقوليش يابابا
عبدالله : واقولك ازاى وانا عارفك انك مش هتوافقي تشوفي حسن تاني فـ انا قولت اعزمهم واتفقنا انا ومحمود نرجعكم لبعض
حلا : حسن مين ده مش عاوزه اشوفه قولهم محدش يجي ما مينفعش انا عرفت سامي وهو جاي يتقدملي
عبدالله : ازاى يعني انتى عاوزه تصغريني
حلا : مقدرش يابابا
عبدالله : خلاص مادام متقدريش الغي الميعاد مع سامي ده خليه يجي في يوم تاني اما اشوف هعمل ايه
حلا : بس يابابا
عبدالله : من غير بس بدل مااكلمه انا وارفضه من قبل مااشوفه
اضايقت حلا واتعصبت
حلا : يوووه مااشي خلاص هشوفه
وطلعت حلا اوضتها تعرف سامي بس ماكنتش عارفه تقوله ايه فبعد تفكير كتير اتصلت بيه
حلا : الوو
سامي : ايه لحقت اوحشك
حلا : سامي مش وقته بص انا عرفت بابا دلوقتي وقالي ان في ناس قرايبنا هتيجي الخميس وانا ماكنتش اعرف فخليها يوم تاني
سامي : تمام مفيش مشاكل السبت تمام ولا ايه
حلا : اه تمام
سامي : متاكده ولا ايه عرفيه كده طب
حلا : لا مش معقوله كان قالي
سامي : بطلي عناد ماماكنتيش تعرفي ان حد هيجي الخميس ده
حلا : تمام ياسامي هعرفه , اقفل اعرفه
سامي : ايه ده انتى قفشتي ولا ايه
حلا : لا بس حاسه ان طريقتك بقت ناشفه معايه شوية
سامي : لا بالعكس انا طريقتي عاديه خالص هو بس ممكن عشان في شوية ضغوط بمر بيها فـ مخلياني مضايق شوية
حلا : ضغوط ايه خير
سامي : لا ده في الشغل
حلا : اه ربنا معاك
تسمع حلا وهي بتتكلم صوت ابوها بينادي عليها
عبدالله : حلاا
حلا : طب اقفل ياسامي بابا بينادي هروح اشوفه واعرفه
عبدالله : ياحلااا
سامي : تمام سلام
حلا : باي
وقفلت حلا وراحت تشوف ابوها
حلا : نعم يابابا
عبدالله : ايه مبترديش ليه
حلا : كنت بكلم سامي يابابا
عبدالله : تمام وعرفتيه
حلا : اه قولتله ان هيجي ناس قرايبنا الخميس فهيجي يوم السبت
عبدالله : قرايبنا ؟ , هو ميعرفش انك كنتي مخطوبه ولا ايه
حلا : لا يابابا مش عاوزاه يعرف
عبدالله : طب تمام , انا هروح انا اريح شوية لو في حاجه جديده بخصوص الموضوع ده قوليلي
حلا : تمام
في مكان تاني عند رنا
ام رنا : رنا مالك في ايه من ساعت ما جيتي من الشغل وانتى مضايقه في حد ضايقك ياحبيبتى
رنا في سرها : معلش ياامي مش هقدر اقولك خبر زي ده مش عاوزه اضايقك وانتى تعبانه
ام رنا : رنااا ؟
رنا : لا ياماما مفيش حاجه شوية ضغوط في الشغل بس
ام رنا : ربنا معاكي ويقويكي
رنا : متحرمش منك ياست الكل
ام رنا : تسلميلي ياحبيبتي انا هروح انام لو احتاجتي اى حاجه قوليلي
رنا : تمام ياامي
الييوم التالي الساعه 9 الصبح في شركه سامي , وزي كل مره سامي يتصل بكريم
سامي : كيمو عامل ايه
كريم : الحمدلله انت عامل ايه
سامي : الحمدلله انا تمام بقولك ايه انت فاضي كمان ساعتين تلاته كده
كريم : اه انا فاضي في حاجه ولا ايه
سامي : بص ياكيمو وركز معايه هتتصل برنا وتعرفها ان شركتي محتاجه محاسبه وتجيبها وتيجي الشركه وانا هخلي مدير الاداره علي يستقبلكم على اساس ان هو صاحب الشركه ويعرفها الشغل ايه
كريم : بس ليه كل ده ماتقولها انت على طول
سامي : يابني مالو قولتلها انا كده هتفتكر انى بعطف عليها وممكن متوافقش اعمل بس اللى بقولك عليه
كريم : تمام
سامي : كلمها دلوقتي ياكيمو عشان تلحق تيجي وتشوف الشغل
كريم : تمام سلام
سامي : سلام
قفل سامي وطلب يشوف علي
سامي : تعاله ياعلي تعاله
علي : تحت امرك يافندم
سامي : في بنت هتيجي دلوقتي اسمها رنا هتكون المحاسبه الماليه الجديده في الشركه عاوزك اول ماتيجي تعرفها شغلها وتفهمها كل حاجه عن الشركه وعرفها انك صاحب الشركه دلوقتي لحد مايجي الوقت المناسب واعرفها انا
علي : انا صاحب الشركه بس ليه يافندم
سامي : انا اعرفها وعاوز اساعدها بس مش عاوزها تعرف
علي : تمام يافندم تؤمربـ اي حاجه تانيه
سامي : شكرا ياعلي اتفضل
في مكان تاني عند كريم بعد ماقفل مع سامي يشوف رقم رنا عشان يكلمها ويقولها علي الشغل ويتصل بيها .
كريم : ايه كل ده نوم قومي يلا عشان الشغل
رنا بنعاس : مين وشغل ايه
كريم : انا كريم ويلا بلاش كسل هتتاخري على ميعادك
رنا : شغل ايه وميعاد ايه ياكريم انت بتهزر وجبت رقمي منين هو كله بقي معاه رقمي
كريم : مش مهم جبته منين دلوقتي قومي يلا عشان في شركه محتاجه محاسبه جهزي ورقك وكل حاجه وتعالي اوريكي الشركه
رنا : شكرا ياكريم مش محتاجه شفقه من حد
كريم : شفقه ايه هي الشركه بتاعتي قومي قومي يلا عشان انا كلمت الاستاذ علي وعرفته انك جايه
رنا : علي مين
كريم : علي ده هيبقي مدير في شغلك الجديد ويلا مش وقته الاسئله دي هتعرفي كل حاجه اما توصلي انا هستناكي في وسط البلد اول ماتوصلي هناك رني عليا بس وانا هجيلك
رنا : مش عارفه اقولك ايه والله
كريم : متقوليش يلا انا هقفل وقومي على طول جهزي كل حاجه وتعالي على هناك
رنا : تمام باي
كريم : باي
قفلت رنا وقامت بسرعه وهي ملغبطه حاجه ماكنتش على البال تصحي تاني يوم على شغل تاني راحت تصلي وتشكر ربنا وقامت تلبس بسرعه وجهزت الCV ونزلت تنزل من هنا ويجيلها مكالمه من هنا
كريم : ايه انتى فين كده
رنا : انا نزلت اهو وجايه
كريم : تمام انا عند تمثال طلعت حرب هتلاقيني واقف هناك مستنيكي
رنا : تمام اقفل انا في الطريق وجايه اهو
كريم : تمام سلام
رنا : سلام
وقفلت رنا وبعد نص ساعه بالظبط وصلت رنا
كريم : ايه كل ده
رنا : معلش الطريق كان واقف
كريم : طب يلا
وطلب كريم اوبر وراح هو ورنا الشركه واول ماوصله كان في استقبالهم استاذ علي
كريم : تمام يارنا ده استاذ علي هيبقي مديرك في الشغل
رنا : ازاي حضرتك يافندم
علي : الحمدلله كريم كلمني عليكي وعرفت منه قد ايه انتى شاطره في شغلك وان لولا الظروف ماكنتيش كملتي بس طبعا ده كله في الاول والاخر كلام فـ عاوز اشوف ال CV بتاعك
رنا : اتفضل يافندم كل حاجه موجوده هنا
كريم : تمام هستأذن انا بقي لو احتاجتي اى حاجه يارنا ابقي قوليلي
رنا : تسلم ياكريم والله انت خلتني احس ان ليا اخ فعلا
كريم : علي ايه بس يااختي يلا ربنا يوفقك في شغلك الجديد
رنا بابتسامه : ان شاء الله
ومشي كريم وراح لمكتب سامي من غير ماتاخد بالها
كريم : ........
نستكمل في البارت 14