وعكة حب

الحلقة الخامسة

وعكة حب

برايسيسا

الفصل الأول : قلوب قاحلة

مع كل دغمة كاتاكلها كانت كاتحس بالإستفزاز.. يزيد كايستفزها بحركاتو و اهتماااامو ليها.. مشاعرو البريئة كانت كاتخنقها.. كاتخنق ديك النسخة لي اختارعاتها من الملل و الوحدة و العزلة.. و كاتخليها تزيد تتعصب و تفقد السيطرة على أعصابها.. جرات شعرها بعصبية مزيرة على الموس فيدها.. ضورات وجهها.. كان مزال واقف فالتيراس بشعرو السارد.. بحوايجو الفازكين مامسوقش للبرد.. لكن كان خايف عليها و هادشي باين غير من داك الباب الزجاجي لي كايخرج للطيراس مسدووود..

بلعات ريقها و ناضت بخطوات مرتاعشة.. تا وصلات للباب.. عينيها مكايرمشوش.. دايراها قد راسها واخا عيانة واخا كارهة ذااااتها.. واخا كاتتمنى الموت فديك اللحظة.. ولكن نتيجة فعلتها لي كلفاتها خسارة يزيد مخلياها تنفاعل.. بحالا فاش كاتكون عارف راسك غااااادي لجهنم واخا نتا ماعارفش واش غادخل ليها ولا لا ولكن كاترجح داك المآل و كاتولي باغي تصلح غير "أكبر غلطة درتيها" غير ترخف النفس لي زامتاااااك فالداخل..

حطات يدها على الپوانيي و جرات الباب لي كان سكة.. على إثر الجرة.. يزيد اعتادل فوقفتو كثر و ضار لعندها كايشوف فيها و حجبانو مغوبشين.. قلبها بدا يضرب بالزربة من ديك الشوفة.. رجحات فخاطرها أنها مجرد خوف.. خوف من الخسارة الكلية.. غير قبيلة قالت أن النتيجة كانت خسارة.. ودابا قبيييصة صغيرة من الغرووور خلاتها توهم نفسها أن مزال كاين وقت بدل الضائع.. و ممكن تقلب البيادق باش توصل ليه... هو !!

غرغرو عينيها و حلات شفايفها كاتتنفس منو.. كاتحاول ماتبكيش.. هو مكايحملش يسمع ليها و هي كاتبكي.. مكايسمعهاش مزيان.. حيت كاتسرط الحروف و كاضيع الوقت فالمعاودة : يي يزيد.. !! أنا.. أنا درت غلط كبير..

يزيد : (قاطعها ببرود متجااااهل نفس العبارة لي كاتكرر) حب العائلة.. حب الوالدين.. حب الله (ميل شفايفو فاش قال هاد الأخيرة لي كانت عظيمة عليهم كااااملين.. و شاف فيها بنص عين) شكون فهادو كان ناقصك؟

هبة بلعات ريقها و زيرات على يديها : مم.. ما ماعرفتش!! اهئ..

ضرب ليها بصبعو فراسها تا ماااال من قوة الضغط مغمضة عينيها على دمعة حارة و انفاسوو هو كانو ضاربين فوجهها بعنف داخلي : خاااصك تعرفي!!!

هبة : (حلات عينيها فعينيه و قالت كارهة راسها) يي.. يمكن من المسلسلات لي كانتفرج.. يمكن القصص لي كانقرااا.. اهئ (هزات كتافها و هي كاتشوفو كايبعد من حداها عاطيها بظهرو متكي على الحافة) يمكن دييييك البنت لي مثلات دور الفتاة الغامضة لي كولشي لاصقها و هي مامعبرة حد و كاتبين بلي مكاتبغي حد و هي كايعجبها شعور أنها تلعب كاع الناس على على محييييط.. ماعرفتششش!!!! (بانفعال) خصرهاااا ولا العكر لي ففمهاااا.. ولااااا يمكن ديك البنت لي تعاطفت مع دورها كضحية و فاش انتاقمات عجباتني كثر كيفاش خلقات لراسها شخصية مكاتتأثرش شخصية وااثقة مخلية حتى الناس لي عرفوها غير فجوج دقايق يتيقو فيها!! و وأنااا..؟؟؟ (أشارت لنفسها بخزي) أنا انغامست معا أدواار ماشي ديالي.. و عجبني الدور فاللووول.. واخا كان الماضي مفبرك و ناااقص حيت الماضي ديالي زوييين اهئ.. الماضي ديااالي زوين و مكانش فيه شي حاجة لي تعقدني و تخليني ندير هاد الحالة فراااااسي و نخليك نتاااا.. نتاااا بالذات تشهد على هاد الفاااص مني..