وعكة حب

الحلقة الثامنة

وعكة حب

برايسيسا

الفصل الثاني : وعكة حب

رجعو البنات و النسا من الحمام.. البنات طلعو للفوق و العيالات بقاو التحت مجموعين على كويس أتاي و فنفس الوقت كايتناقشو على العرس.. كيفاش غايلحقو يمشيو ليه قبل من الوقت.. استقبال المعزووومين.. و يجيغيو الطريطور و الماكلة و الفرقة الموسيقية.. المقابلة ديال العروووس.. الخ.....

أما الفوق فكانت هبة فمود آخر..

إكرام : (طايح عليها سر العروووس) ضيعتي عليك النص فحياتك ملي مامشيتيش معانا تشبعي غير ضحك..

رباب : هههه نهيلة جابت الربحة..

نهيلة بملامح منزعجة : حيت ختك مروة المستوووهة نقطات الصابون البلدي فالأرض..

مروة : أنا بزاااف عليك.. و نتي لي مكاتشوفيش العورة..

هاجر : (صديقة إكرام و بنت جيرانهم) يهديكم الله البنات..

إكرام : نهيلة بيتي تخرااا___ي علينا وصاافي.. !!! غدا عرسي و نتوما مضاربات على صابون بلدي..

هبة : (تنحنحات) إكرام..!! ممكن تسلفيني تيليفونك.. د

إكرام : (أشارت ليها لصاكها) غاتلقايه تماك.. الكود ربعة الزيروات..

هبة : غانتاصل بيه.. و نرجعو ليك...

إكرام : خودي راحتك..

رباب : همممم شميييت ريحة الحب.. هادا مايكون غير صاحبك..

هبة : (ابتاسمات بزز.. مابغاتهمش يعيقو بيها) هادا راجلك هه..

إكرااام : هااااا ما قالت الشوافة..

هبة : والله و ماتفرقو عليا تا ندي ليكم رجالاتكم.. هادا جهدي عليكم..

نهيلة : ها الكزاااااوية خرجات...

هبة : إيوااا ما عرت..

عيبات فيهم بدعابة و هي كاتقلب على التيلي.. جبداتو و خرجات من البيت عاد طلقات النفس.. تسلتات بلا مادير الحس حيت جالسين العائلة و العيالات التحت.. طلعات للسطح.. و بسرعة كتبات رقم يزيد و عيطات ليه كاتشوف ياكما تابعها شي حد..

ثواني دازت و كان يزيد مجاوبها من النمرة الغريبة لي ما عرفهاش..

يزيد : ألو.. ؟

غمضات عينيها و جلسات فالأرض متكية على السور مسرحة رجليها كاتسمع لداك الصوت.. كاتحاول تتخيل راسها مكاتعرفوش و هي كاتسمعو باش تحاول تبغيه.. ولكن مكاتصدقش ليها.. هو نفسو يزيد لي فمقام خوها.. يزيد لي عشيرها.. يوقف معاها فالحلوة و المرة.. ولفها تشوفو خوها.. كان صعيب دير سويتش و تقلب الاعدادات فدقة وحدة..