وعكة حب

الحلقة الرابعة

وعكة حب

برايسيسا

الفصل الأول : قلوب قاحلة

صوت البوانيي د الباب و هو كايحاول شي حد يفتحو خلاها تجفل فبلاصتها بالررررعدة.. ضربات طليلة بالخف على راسها فالمرايا بمرطب شفايف على فمها غوز كايبري.. "تا حاجة مامعيقة" قالتها و هي كاتتأمل سروال الدجين لي لابسة.. الكبوط لي خافي الطوب القصيرة لي لابسة من التحت.. و فرجليها سبرديلة كحلة.. هزات صاكها تأكدات من داكشي لي حاطة فيه.. سداتو و هزاتو غادة بيه شادة روجيستر فيدها تا وصلات للباب حلاتو كاتتنهد..

لقات مها معصبة عليها كاطلع و تنزل فيها..

غيثة : آش هاد الحالة دايرة؟؟ و من ايمتى الباب كايتسد من الداخل و أنا مافخباريش؟؟

هبة : اا و والو أ ماما.. اا غغ.. غي.. غير كنت.. كنت كانبدل حوايجي.. وو وخفت يشوفني شي حد كاااان..

غيثة : (قاطعاتها مامستوعباش تصرفات بنتها مؤخراً) شكون غايشوفك؟؟ غير أنا و باك لي كاندخلو لعندك؟

هبة : اا (نفخات صدرها كاتحاول تصطانع الثقة) ڤوالا را رر را خفت بابا يشوفني..

غيثة : هممم (طلعاتها و نزلاتها) غاتخرجي بهاد السروال هاكا.. مزير على فخاضك عازلهم.. !!؟؟؟

هبة : مااا مااااا اوووف وا صافي.. (حولات عينيها منها زعما راها زادت فيه)

دازت فيها نازلة و غيثة تابعاها : أجي لهنااااااااا فين غادة ؟؟

هبة : (غوتات باش تسمعها) لافاااااااك..

بدا كايڤيڤري تيليفونها و هي تقول بصوت هامس فاااااك.. عارفة راسها تعطلات و صاحبتها سكينة صدعاتها دايرة معاها يتلاقاو باش يمشيو لدار أمين أونصومبل..

غيثة دغيا لحقات عليها هازة حاجب : أجي لهنا يا بنت الحرااام.. بنت مينة غيييير البااااارح شفتها عند الخضار مسخرة لمها قالت ليا شادين عطلة !!؟؟ اينا لافااااك هادي غادة ليها بالسلامة.. !!

هبة ترعدات و حاولات تتمالك أعصابها : هااا والااا را ماكانشدوش العطلة دقة وحدة.. كايدوزونا شوية بشوية و النوبة فمينة دااابا... ااا و و من بعد تا حنااا غانشدوها..!!

غيثة : تشدك الدووودة يا الحرايمية من فعلك.. نااااري ديري هاك ولا هاك لي نديرو فيك مانتسماش غييييتة بنت فاااااااطنة المختااار..

هبة : (ميقات فيها) فف وا مالنااااا على هاد الحلوف غانمشي نقرا من الربعة للستة ووو..

غيثة : (قاطعاتها) ههه هاكاااااواااا.. ههه سمعي شغايجيك ملييح!! (خرجات عينيها كاتأكد ليها على الهضرة) تخرجي معاااااا الستة توصلي معا الخمسة ونص للدار مانعقلش عليييك..!!