وعكة حب

الحلقة السابعة

وعكة حب

برايسيسا

الفصل الثاني : وعكة حب

الخامسة صباحا...

محطة الإستراحة..

تحت تأثير الضو القووي لي تضرب فعينيها و على صوت الباب كايتحل ويتخبط بدات كاتحل عينيها ببطئ... سداتهم معمشة و عاود حلاتهم.. الضو كان مجهد.. ضورات راسها و عرفات بلي كايديرو الگازوال.. مددات عنقها بفضول.. لمحات على بعد أمتار مطعم الفاستفود ماكدو و ميني ماركت ديال السناك و مقهى حداها حمامات عمومية ديال العيالات و الرجال..

غيثة : (طبطبات على ذراعها) فقتي.. نزلي نشربو شي حاجة...

حلات الباب و نزلو كاملين مخليين يزيد يركن السيارة فالباركينغ و يلحق عليهم..

هزات يدها بالثقالة.. حيدات البانضة من شعرها مخلياه مطلوق على راحتو و جراتو شوية من القدام نزلاتو على جبهتها...عارفة وجهها غايكون منفوووخ بالنعاس بحال شي مبوقة.. ماعرفات كي دار شدها فالطوموبيل... كانت عوالة ولا غير جاب ليها الله غاتبقا فاااايقة ما حد يزيد معاها.. !! ماحساتش براسها تا كان دا مول الأمانة امانتو و نعسااات فسكوون.. نعسة ماكرهاتش ماتفيقش منها..

دخلو للقهوة و ختارو طبيلة جلسو فيها.. كانت خاوية.. و المينيو لي ممكن يطلبو منو الأكل كان عندو توقيت خااااص.. يعني يا تطلب القهوة يا تمشي تاخد ليك شي حاجة جاهزة من الماركت لي حداهم..

كلثوم : ممم ناخدو شي براد أتاي..

غيثة : راسي حارقني باغا قهوة..

كلثوم : يزيد غايجي دابا و يتكلف..

غيثة : هبة و نتي شنو بغيتي...؟

هبة : (بصوت مبحوح و عيان) لي بغيتو..

غيثة : ناخد ليك عصير الليمون لي كايعجبك..؟

هبة : (حركات كتافها و تكات بظهرها حاطة يدها على وجهها من الضو) لارد..

كلثوم : (بالهمس) غيثة!! هبة حالتها ماعجباتنيش..

غيثة (حاولات تبتاسم و ماتعيقش) : غير العادة الشهرية أ كلثوم كاتخرجها منها..

كلثوم : يلا كان هاكا خودي ليها قهيوة ولا أتاي سخون.. أما العصير دالليمون غايدير ليها الگاز فكرشها..

يزيد دخل للقهوة و تم مقرب لجيهتهم.. صوت خطواتو كانو مسموعين لهبة لي مغمضة عينيها كاتركز معا أي صوت كايتحرك.. حسات بيه واقف موراها.. واقف موراها مباشرة لدرجة السوارت لي فيدو كاتحس بيهم كايتقرقبو معا ظهر الكرسي الخشبي..

يزيد : تشربو شي حاجة..؟ (بصوت قاصح فيه بحة ثقيلة)

كانت مركزة مع صوت أنفاسو فوق منها.. مكانتش منتاظمة الشي لي خلاها تقطب حجبانها بانزعاج..