وعكة حب

الحلقة العاشرة

وعكة حب

برايسيسا

الفصل الثاني : وعكة حب

غيثة : تهلاي فراسك أختي..

كلثوم : ربي يحفظك أختي غييييتة ووو ديري نهار و دوزي عندي نتي و هبة شربو كويس دأتاي..

غيثة ميلات راسها تا تسدو عينيها بضحيكة بشوشة : إن شاء الله أ كلثوم.. غير نكمل التخمال دالدار و ندوز لعندك..

كلثوم : هي نجي نعاونك فالروينة..؟ شهر ونتي باقا حاصلة فيها..!!

غيثة : راك عارفة نضرب و نقيس مرة بيت مرة زوج بيوتة تا كانسالي على خاطري.

كلثوم : و هبة ماكاتعاونش؟

غيثة : أودييي الكلام كثير و السكات حسن.. !!

كلثوم : يالاه واسيري (لاحظات نظرات توفيق لغيثة) مانعطلكش على راجلك..

غيثة : (و هي غادة) يلا شفتي يزيد سلمي علييييه!!

كلثوم : (بتعب) مبلاااغ..

دخلات غيثة للطوموبيل.. جرات عبايتها عاد سدات الباب و ضارت لعند هبة لي مزاااال معمشة : هيبة فيقي را قربناااا..

توفيق ضرب على هبة من المرايا.. كانت مزال ناعسة و عينيها منفوخين من كثرة البكا لي بكاااااتو فصمت بلا مايحسووو بيها وسط الظلااام ديال الطريق لي دوزوه فديك الليلة. : هممم غير خليها بينما وصلنا..

___

حلات صاكها و دخلات يدها كاتقلب على الساروت.. و بدون نتيجة تا لقات راسها كاتفرغ محتوياتو عند العتبة.. و سهال عليها تلقاه.. ردات كولشي للصاك.. و بهدوء دخلات السوارت فالباب.. فتحاتها.. جرات الصاك من الأرض و دخلات..

ريحة الدار المزموتة.. دازت عليها سيمانة وهي مسدوودة.. الشمش كاعما دخلات لأرجاء الدار.. مشات نيشان لبيت النعاس.. درعااات الفدارش و الشراجم مخلية الشمس تدخل بأشعتها و تنتاشر فزوايا الغرفة بكل أريحية.. حيدات الجلابة و النگاب من وجهها.. بقات غير بالبيجامة الطويلة لي لابسة من التحت.. هزات زيف حياتي نقي و قاداتو على شعرها بحزمة عاقداها اللور.. جات عينيها فالمرايا لي قليييل فين توصلها باش تتأمل فراسها.. التجاعيد لقاو منحنياتهم فخطووط الإبتسامة و عند عينيها و على جبينها بتلاتة خطوط متوازية.. كانت قادرة و أخيراً تشوف الحروف فوجهها بعدما مشا منهم الزين كي كانقولو.. شعرها القصير الخفيف.. معظم خصلاتو محتلين رمادية فاتحة.. التجاعيد على يدها كايبينو على الدهر لي داز عليه.. !! أنا قلبها.. ما عالم بيه غير الله.

تنهدات و خرجات من البيت للصالون.. بخطوات روتييينة مولفة دير نفس الخطوات.. دفعات الفدارش و حلات الشراجم.. الضورة لي غاضور.. غاتشوف جسد مستلقي على إحدى السداريات و بشهقة صدمة غاتحط يدها على صدرها من الخوووف.. هي را ماتوقعااااتش تلقا شي شخص ناعس عندها فالصالون.. فكرة تلقا شخص عندك ناعس و نتا مولف راسك عايش بووووحدك.. شي حاجة لي كاتخوووووف.. نزلات عينيها على الطريقة باش ناعس.. مخدة تحت رجليه و يد مسرحها و التانية ضايرة على وجهو مخلي غير شعرو و اللحية لي تبان.. صباطو مليوح بشكل عشوائي.. تنهدات و تحنات قادات صباطو فالجنب.. و قربات لعندو فجلسة القرفصاء.. كاتتأمل شعرو الأسود.. النسخة المصغرة على زوجها نبيل.. غمضات عينيها كاتسمع لصفير صغيير كايتسمع خارج من صدرو كلما طلع النفس.. مكانش حاط راسو على المخدة.. مدات يدها باش تحط ليه المخدة تحت راسو و فآخر لحظة تراجعات.. فين عمرها تهلات فيزيد ولا كانت ليه أم حقيقية؟ شنو كادير دابا؟؟؟ بصح هي باغا تقاد ليه المخدة تحت راسو؟؟؟ باغا تعوضو على سنين دااازت بحركة بسيطة.. !!