بقينا نتأمل احد يسمعنا بس ماكو احد.
بقيت ابجي واصيح سارررة سارررة بعد مااشوفج وهذاك اخر وداع واخر حضن لامستحيل ودموعي ماوكفت وبس ابجي.
الويانا كالو ذبو كل جنطكم وغراضكم بالبحر الوحيدة اني رفضت لان الفلوس والذهب بالجنطة ومستحيل اكدر اجازف!
بقو يصرخون علية ذبي وذبي ترا انتي نذبج انتي منو! اهلج وين! خليت ايدي على اذاني واصيح بااعلى صوتي وابجي!
والرعد والمطر غزير كان شعور مختلف.
بعد معاناة ودعاء ورصدونا خفر سواحل اليونانين باخر لحظة الي كنا كلنا نتوقع نموت.
بعدها وصلنا لليونان.
كان شعور مختلف اكثررر حسيت نفسي حرة حسيت طلعت من قفص وسجن ابوية الي خلاني اوصل لهاي المرحلة ويوم عن يوم حقدي يزيد على اهلي.
اخذ نفس قوي وابجي اكثررر ودموعي ماتوكف وارجع اكول ياريت سارة وياية جبتها!
اخذونا ع الكامب وانطونا قرار لو نكمل لو نبصم نبقى باليونان.
اني ماعرفت شنو اختار بس ردت اصير بعيدة طلعت ويا ناس المتوجهة الى الدول الباقية ومنها راح تتقسم للسويد ومنها لالمانيا ومنها لنمسا وبلجيكا و...
بقيت امشي وياهم لمدة ايااام طويلة!
فتت تقريبآ اكثر من ١٠ دول واني ماعرف وين اتوجه.
بعدها شفت اغلب العوائل كانو متجهين للسويد وقررت اروح وياهم للسويد!
والطريق عبارة عن نصابين وكلمن يكول اني اوصلج بالمبلغ الفلاني لو شكد عندج فلوس واكو
شباب حاولو يستغلوني شافوني وحدي !
بس مايعرفون اني شكد قوية.
وطول الطريق اتعب واكول كومي ريم انتي قوية كملي ياريم مابقى شي وكلما اتذكر ظلم اهلي ازداد قوة واصرار اكثر و اكثر.
وبقينا نمشي والعالم تركض وتلزم بالقطارات والباصات كانو اخر يوم بالعالم هذا الي نسى ابنة بالمحطة وهذاك الي ضيع بنتة كان منظر ماينسى.
وطول هاي الايام اني افكر بسارة شصار وياها هم تنضرب هم تتعذب بيبي شسوت ابوي و اوس شيسون
بعد معاناة ومدة ورحلة طويلة وصلت للسويد؟!
فتحت ايدي واتخيل حضن سارة غمضت عيوني ودموعي لاارادية تنزل واكول كلة علمودج سارة علمودنا اني وانتي.
جنت متأملة بسارة فقط لان اوس ابوية حولة لغير شخص نفس شخصيتة الظالمة!
رحت ويا بقية الناس المتوجهة للبوليس وسلمت نفسي حتى اقدم طلب لجؤ.
وبعدها حولونا للكامب الي عبارة عن غرف نوم جماعية وحمامات جماعية ومكان الاكل جماعي.
وكان اول يوم انام بي مرتاحة بدون خوف.
واجى اليوم الي نروح نقدم لجؤ.
وكالولي شنو سبب جيتج اهنا حجيتلهم الصار وياي. طبعآ مترجم كاعد يترجم الية والهم.
كالو وين الدليل على هذا كلامج ؟
كلت ماعندي وحتى اثار الضرب اختفت.
اجلوني الى تاريخ اخر.
وهنا طلعت اتمشى واتعرف على اجواء العالم الخارجي واشوفهم شعب محبين مسالمين.
والأكثر حبيتة اذا تعرض الطفل للضرب والاهانة من قبل الاهل كبل الدولة تسحب الطفل منهم.
وتذكرت ظلم ابوي وضربة النا وسارة الي هيا طفلة وتحملت هذا العذاب.
ورجعت للكامب.
..... ساعه ٧ الصبح فزيت من النوم أثر كابوس مثل كل يوم تمشيت بخطوات ثكيله بسبب النعاس بس مجبوره توجهت للحمام غسلت وجهي وفرشت اسناني طلعت للبلكونه الجو بارد ثلج هيه هاي المدينه بارده بس حلوه كلش... صفنت شويه عقلي خاني ورجعلي ذكريات قبل ٥ سنوات......
ابوية:مو زين مني متحملكم ومتحمل لعبان النفس الي انتو بي وفوك كل هذا لازم اتحمل مصاريفكم
بيبي: اششش اسكت ولك ابن الفكر الله يرحم ايام ابوك لوما اني جان بعدج تبوس القنادر علمود جم فلس تاخذهن من عمامك اني إلي سويتك رجال و صاحب جهال تتحملهم غصباََ عليك وعلى راس الخلفوك
ها يمة :هيج صار الحجي! اني مباقي بهل بيت وعندي عيشه الفكر احسن من شوفتهم بقيهم على كلبج.... ريم: اباوع على عائلتي ومشاكلهم الماتخلص وكره ابوية النا ونغزات بكلبي تدك.
شفت سارة ابتسمت من شفتها شعرها منكوش وتفرك بعينها الي جنها عيون بزون سارة:ريومه اني جوعانه اريد اكل! ريم:يا بعد روحها لريوم هسه اسويلج احلى ريوك تاكلي مشيت للمطبخ وفتحت الثلاجه شفت باقي جم بيضه سويتهم وحطيت الجاي على النار وطلعت الاجبان .
وجان احلى ريوك رغم ابوية يسوي زقنبوت
ورغم صغر عمري.
يتبع....
