صباح الخير حُبًا ..!
مرة واحد بحكي إنو عندو جزمة بحبها جدًا بس ضاقت عليه وبقى ما مُرتاح في المشي بيها وهو لسة مُصر إنو يلبسها كلو علشان بحبها والمفضلة عندو لحد ما بالأخر وجعتو وسببت ليه مشكلة في رجلو وكِرها.
الشاهد في الأمر إننا كبشر مفطورين على الحُب ..!
_حُب الممنوع .. ببقى مرغوب عندنا فجأة.
_حُب الأكلة اللي ما بتنفع معانا .. فجأة محل ما مشينا نلاقيها في وشنا ولا يُمكن نقاوما كلو عشان بنحبها .. حناكلا كل مرة وهي حتأذينا.
_حُب المكان المفضل عندنا حتى لو بعيد .. لو حنرجع منو متأخرين .. لو حتحصل لينا مصيبة بي سببو.
_الناس اللي رغم أذيتا لينا نحن مستمرين في حبها بحجة إننا بنحبهم .. غاليين علينا ..!
_كل يوم نحن حنواجهه حاجات بنحبها بس ما بتريحنا ..!
_في كل مرة نختار حبنا على راحتنا حنتعب أكتر .. لحد ما يجي يوم ونلقى نفسنا ما قادرين نتعايبش مع الوجع دا أكتر .. ما قادرين نكمل رغم حُبنا الشديد .. حنكره كل لحظة دفعنا فيها راحتنا تمن.
صحبتي في يوم قالت لي عبارة لخصت إحساس الندم :
يا نُود ياريتني ما عرفتو !
أكتر زول كنت بتحبو حيجي يوم وتتمنى لو ما كنت عرفتو أساسًا من شدة ما حُبك ليهو خلاك تصل مرحلة تكره نفسك وتكره اللحظة السمحت ليو فيها يدخل حياتك.
كتير الحياة بتختنا في موقف صعب زي:
" اللي تحبو ولا اللي يريحك؟"
وقتها عاين لراحتك سواء كانت مع اللي بتحبو أو اللي بريحك.
في كل الأحوال خلي راحتك قبل كل شي.
أوعى تخت نفسك في حتة ضيقة وتعصر على روحك حتى لو كان مُقابل حاجة قد تكون إتمنيتا.
_البحبك صدقني ما بيضايقك للدرجة دي .. ما بوجعك .. ما بخليك تجي على نفسك عشانو .. !
_وإنت بتخطي أي خطوة في حياتك خت في بالك إنو راحتك أهم من أي شي .
#على_الهامش:
"إن لم يكن يريحيك الأمر فهذا بسبب كافي لتتخلى"
#Morning_Message "10"
#نُودين_بِت_مِن_حُب
