مرة تانية العنصر الأهم ويكاد يكون الركيزة الأساسية في أي علاقة هو الدعم.
أوعى تكوني مالية يدك بي ناس ما بتدعمك.
أصحابك القريبين .. الحيكون شريك حياتك .. لو ما كانوا ناس supported بلاش منهم.
الحياة محتاجة دعم في أي حاجة ..!
صعب جدًا تكملي مع ناس ما مُهتمة للبتعمليه ولا بتشاركك ولا حتى بتشجعك وتقولي عليهم ديل أقرب ناس.
الدعم بالكلام قبل الأفعال .. لأن الأفعال بيترتب عليها ظروف كتيرة بس الكلام ساهل وما بحتاج جهد. .
تعملي شنو مع ناس ببخلوا عليكِ بالكِلمة الحِلوة؟
بكسلوا يشجعوك..!
راجل بشوف إنو دعمو ليك مفروض يكون مادي وما بالضرورة معنوي.
حتسوي شنو لما تجيه بحماس تحكي ليه عن خططك ومشاريعك وتلقيه برد ببرود؟
بالنسبة لي التطبيل والدعم دا أنا إتربيت عليه ولا يمكن أستغنى عنه أيوة بعرف أكمل براي زيما بديت بس بتهمني المشاركة.
أبوي الله يديه العافية من قمنا في الدنيا دي وهو بيدعمنا في التفاصيل الصغيرة قبل الكبيرة .. حاجات ممكن تتشاف تافهة لو إتحكت بس هو بحسسنا بعظمتا.
مثلًا:
لو إتصل بدري لقانا صاحين كلنا وصلينا الصبح حاضر بقول لينا تاخدو حافز كل واحد الف جنيه .. للآن ما مر شهر بدون ما يكافئنا على أشياء غريبة وما مُلفتة أصلًا هو الوحيد البفكر فيها وبشوفا.
لو واحد فينا عمل حاجة فوق العادة مهما كانت بفضل يتكلم عنها ويقول لينا فلان ما قصر عمل كدا .. مرة أختي كانت في الأساس وفرت من قروشا إشترت سُكر جابتو البيت القصة دي ليها أكتر من 10سنوات وأبوي للآن كل فترة التانية بذكرنا ليها.
لما كنا في المدرسة كان بجي بنفسو يدفع لينا الرسوم وينادينا يسلم على أصحابنا ويتعرف عليهم وما حصل فوت نتايجنا لأي ظرف كان بياخد إذن وبجي يحضر بقيف في المسرح مع الأساتذة للتكريم ودا واحد من الأسباب الخلتتي أنا شخصيا أجتهد وما أطلع من العشرة الاوائل طوال مسيرتي الدراسية.
مرة جيت التانية رفعني قدام الحشد والجمهور دا كلو كأني جيت الاولى وحتفضل اللحظة دي أكبر دعم حصلت عليه في كل حياتي وما أعتقد أقدر أشوف حاجة أعظم منو.
لما واحد فينا يجيب نتيجتو بغض النظر هي كم بقول لينا أنا عارف أولادي شاطرين .. كل مرة أجي أوريه نتيجتي بقول لي معروف نتيجة سمحة طالما إنتِ جبتيها.. مرة النتيجة طلعت غلط لما كلمتو بالمعدل قال لي بهمني إجتهادك وأنا بعرف مستواك النتيجة دي شكليات ساي.
وفعلًا بعد فترة طلعوا النتيجة المعدلة وكانت على قدر الجهد.
لما طلعت من المناقشة اول زول إتصل علي وبارك لي وفضل يقول للناس بتي إتخرجت من الجامعة وكأنو دا أعظم حدث.
وليوم الليلة بقول لينا أي حاجة بتخليكم تتقدموا دي أنا مستعد أدفع دم قلبي فيها.
يمكن نحن ما عشنا حياة مليانة بالرفاهية بس كل العشناه دا أبوي إجتهد جدًا عشان يوفرو لينا..!
يمكن ما حصل إستضافوه في إيڤينت أو قناة يتكلم عننا بس عمرو ما فوت فُرصة يمدحنا ويعترف بإنجازاتنا في أي مجلس قعد فيه وجات سيرة الإنجازت.
ما أخدنا أي شي عايزينو بس كل العندنا دا هو كان شي يكاد يكون مستحيل بس أبوي وفروا لينا.
فحقيقي يخوانا الراجل الداعم رزق.
بخلي جو البيت حلو ولطيف .. تخيلي تعيشي مع واحد يفضل يقول ليك كلمة حلوة في كل تصرف تعمليه ..!
زول على طول جنبك وبساندك في كل خطواتك وبتحمس ليها أكتر منك .. !
زول لما تجيه زعلانة ومكسورة في لحظات قادر ينتشلك من القاع ..!
شريك زي دا لما تعيشي معاه حتضمني لأولادك حياة حلوة مهما كانت الظروف.
اولادك حيكونو سويين نفسيًا وما محتاجين يفتشوا دعم من برة ولا في زول بقدر يهز ثقتهم في نفسهم.
فعشان كدا إختاري أب كويس لأولادك عشان الزواج دا ما موضوع بخصك براك..!
#على_الهامش:
''يشاركني الحلوة ، ويحلي لي المُرة ♥️))
#morning_message "16"
#نُودين_بِت_مِن_حُبّ
