صباح الخير حُبًا ..!
موضوع العلاقات دا عمرو الكلام فيهو ما بنتهي بس مع ذلك نركز إنو العلاقة الما فيها إحساس الأمان دي بلاش منها !
أي والله بلاش ..!
كيف حتكمل مع شخص إنت ما ضامن إنو بكرة لو حصل ليك أي شي إنت حتكون في أمان معاه؟
أمان يعني :
_وقت المشاكل حتكون واثق إنو دي مشكلة ودا حجمها الطبيعي وحتنتهي مهما طالت وحترجعوا زي اول.
_وقت الزعل حتكون متأكد إنو زعلك حاجة وحبك للزول دا حاجة تانية خالص .. إنت زعلان عشان الغلط ما زعلان عشان بتكرهو ولا بطلت تحبو.
_وقت العقبات والعوائق ما حتخاف لأنك عارف إنو عندك سند لو ما سندك حيميل معاك وما حتواجهه كل دا براك.
_وقت الأزمات حتروق وتهدأ لأنك ما محتاج حل بقدر حاجتك لزول يعدي معاك الأزمة.
صحبتي حصل ليها موقف إتخذت قرار الإنفصال بعدو بدون ما تخلي زول يقول ليها كلمة حرفيًا .. رغم إنها بتستشيرني كتير بس يوما قالت لي:
عارفاك محتارة بس حأشرح ليك ومتأكدة حتتفهميني .. بعد فترة حكت لي الخطوط العريضة فقالت لي :
جاني خوف من إنو يتكرر الموقف بعدين وقتها أنا حأعمل شنو؟
بإختصار "ما حست بالأمان"
عدم إحساسك بالأمان سبب كافي عشان تتخلى .. !
سبب كافي عشان تمشي بدون ما تتلفت .. !
بدون ما تقيف لحظة .. حتى بدون ما تشاور.
تخيل تعيش الباقي من عمرك ما مُطمن؟
خايف من إنو :
_تلقى نفسك براك فجأة..!
_تواجه مشاكل أكبر منك..!
تفضل زعلان بدون ما تتراضى..!
لما يجي زول يسألك مالك متغيير معاي؟
ما ترد ليهو رد عادي ..
ما تخليهو يخاف أكتر ..
لأنو أكيد في سبب خلاهو يجي يقول ليك كدا .. هو أصلًا خايف يكون في شي حاصل ..!
وريهو عديل .. قول ليهو :
_يا فلان مافي شي والله ما تتحسس ولا يمكن أتغيير منك ساي نحن البينا أكبر من الحركات دي.
_ما متغيير بس الفترة دي عندي ظروف مانعاني أكون طبيعي والبينا عامرة.
_ياخ والله زعلان منك .. للأسباب الأتية :1/2/3
لو خلاص ما حتتكلم وعندك أسبابك البتمنعك خليك صريح ووضح إنك زعلان وما عايز كلام في الموضوع حاليًا على الأقل .. !
أو ما زعلان ومتغيير لأسبابك الخاصة
حتى لو الطرف الأخر ما إتقبل زعلك حيكون راح منو إحساس الخوف.
في حلقة من مسلسل إتقالت جملة حزينة واحد بتكلم مع أخوه البحاول يقنعو يصلح البينو وبين خطيبتو فرد عليه:
"أنا ما بوقف وحدة هي إختارت تمشي "
ليه ما نختار نمشي ما من حقنا؟
ما نستاهل يوقفونا؟
للدرجة دي ممكن نهون؟
الفايدة شنو من العلاقة دي لو حتنتهي بالسرعة دي؟
الليلة ولا بكرة حيجي يوم ويحصل موقف نفكر نمشي وقتها برضو ما حنتوقف؟
طب لو كان دا إختبار؟
أسوأ شي تعيش في علاقة ما عارف إذا إنت متمسكين بيك ولا ممكن يستغنوا عنك عادي .. !
علاقة تكون فيها بين نارين طول الوقت بتحارب شعورك المليان خوف وقلبك المليان حُب.
إنت ممكن تحبني .. تملاني حاجات حلوة .. تقدر تكون الشخص المناسب تمامًا وفارس الأحلام .. تقدر تكون أرهب واحد في الكون ..
بس دا كلو ما منو فايدة لو ما قدرت تطمني .. !
لو ما قدرت تخليني أحس معاك إنو كل شي بوجودك ممكن يهون .. وإنو المشاكل والعقبات والأزمات ما حتهز فيني شعرة طول ما إحنا سوا.
حُبك ما سبب كافي عشان العلاقة تنجح.
الأمان هو كُل شي.
#على_الهامش:
"لا شيء يُعادل الأمان ولو وُزن ذهبًا ..!"
#Morning_Message "14"
#نُودين_بِت_مِن_حُب
