صباح الخير حُبًا ..!
إتقبل التغيير البحصل في حياتك أو البجي من الحواليك .. صدقني ما بتقدر ترفض التغيير .. أيوة غصبًا عنك ..!
الناس بتتغير .. نحن بنتغير .. الحياة كل يوم بتتغير .. الظروف البنعيشا كل فترة بتتغير ..!
مع كل التغييرات الحاصلة دي .. في حاجات كتيرة ممكن تفقدا .. !
إنت الليلة ما بتشبه شخصيتك قبل سنة ..!
حاجات كتيرة بتتغيير مع مرور الأيام .. !
الحاجات اللي كانت بتزعلك وتبكيك .. ممكن الليلة تشوفا حاجة تافهة ما بتستحق تقيف عليها دقيقة.
الموقف اللي كان بهزك من جوة وبزعزع ثباتك لو مرَّ بيك الليلة بالكاد تنتبه ليهو ..!
كل التغييرات دي ممكن تكون حولتك لشخص قاسي شوية .. شخص عقلاني وبعتمد على المنطق أكتر من عاطفتو .. !
من إنسان ما بيعرف يقول "لا" لواحد تاني ما بجامل على حساب نفسو خالص.
من شخص هش وما بيقدر يواجهه .. لواحد ما في شخص بقدر يغلبو في أي أمر.
ممكن ما تكون حابب التغير دا بس الظروف جبرتك تتعايش معاه .. المواقف اللي كسرتك من جوة وهزت ثقتك في نفسك وزعلتك شديد هي البقت سبب في إنك تحصن نفسك ضدها مستقبلًا.
العاطفية الخلتك تجي على نفسك ويتداس عليك من أي طرف ووجعتك كتير في يوم حتكرها وتقرر تتغيير بدون ما تفكر ترجع ليها في أي موقف.
المعروف إننا بنكره التغيير لأنو بياخد مننا حاجات كنا فاكرينها أجمل ما فينا .. بس حيجي يوم وتكتشف إنو أجمل ما فيك ما بيظهر إلا لما تحاول تفتش عنو جواك وكل مرة تفتش أعمق.
لازم تتصالح مع التغير وتقعد كل مرة مع نفسك وتغيير حاجات فيك .. بدون ما تخاف من التغيير لأنو:
"الإنسان يعتاد"
بيعتاد على نفسو الجديدة .. !
تصرفات الناس اللي إتغييرت فجأة .. !
الظروف العايشا .. وإن كانت ما عاجباه !
المكان الجديد .. !
الفجوة الحاصلة بينك وبينهم .. !
على الغياب .. الفراق .. وحتى الفقد ..!
الناس اللي مشت .. !
والناس اللي جات .. !
الإنسان يعتاد ولا يغلبه شيء .
#على_الهامش:
"الحياة التي لا نتمعّن فيها لا تستحق أن نحياها"
#Morning_Message "12"
#نُودين_بِت_مِن_حُب
