صباح الخير حُبًا ..!
كُلنا في يوم فشلنا في تجارب بس دا أبدًا ما بيعني إنو نحن فاشلين أو التجربة اللي عشناها ما بتستحق الإعادة.
أنا دايمًا في صف الذين يمكنهم بعد كل مرة البدء من جديد.
ما أخر الدنيا خالص لو الموضوع ما ظبط من اول مرة.
أي تجربة تعيشا إتوقع نجاحا بنسبة 50% والـ50 التانية إحتمال الفشل.
هي الحياة كدا .. ساعات بتخلينا نعيش تجارب عشان تصلنا من خلالا رسالة معينة .. في الظاهر فشلنا بس لو ركزنا حنلاقي إنو في درس إتعلمناه .
_الإمتحان الما نجحنا فيه من اول مرة بورينا المواد الكويسين فيها والمحتاجة تركيز.
_الغلط اللي بنرتكبو وبسبب لينا مشكلة حنعرفو ولولا المشكلة دي ما كان عرفناه.
_الصاحب البخذلك بوريك إنو في المواضيع المهمة ما تعتمد عليه.
_العلاقة البتفشل حتعرفك كيف تختار صح المرة الجاية.
مرة حضرت Event في سبيكر Single Mam شاركتنا تجربتا أكتر من نص ساعة هي بتحكي قصتا بس اللفت نظري إنو هي أبدًا ما عندها أي مشاعر سلبية تجاه الزواج .. ما منفعلة خالص من فشل التجربة بكل هدؤ قالت:
تجربتي الفاتت علمتني لقدام أراعي إني أختار شريك حياتي حسب الـ Standard اللي أنا خاتاها من غير تنازلات.
خالص ما قالت :
-أنا ما بصلح للإرتباط.
_ما أساءت للمؤسسة الزوجية وعممت فشلا في التجربة الاولى على كل التجارب.
_ما رفضت تخوض تجربة تانية.
_ما أساءت لشريكا السابق وحملتو نتايج الفشل.
_والأهم والأعظم فشل التجربة ما هز ثقتا في نفسها ولا غيير منها للأسوء.
بذات الطريقة رسالة اليوم :
_إتصالحوا مع فشلكم ..!
إتحملوا نتايج الفشل وحاولوا تتعلموا منها.
_ما تفقدوا ثقتكم في نفسكم ولا التجربة .. لأنو دائمًا يمكننا البدء من جديد .. بس لما :
_نتعلم إنو الفشل ما أخر الدنيا ..!
_لما نعرف الأسباب ونسعى لحلها ..!
_لما نثق في نفسنا ونقرر نتجاوز ونكمل بدون ما نلبس دور الضحية .. نوع ظلموني .. كسروني .. داسو علي .. كذبو علي .. لأنو دي كلها ردات فعل نحن السمحنا ليهم بيها .
#على_الهامش:
لا أحد سيُرمم شتاتك إن لم تفعل بنفسك .. أما زلت عاجزًا؟
#Morning_Message" 8"
#نُودين_بِت_مِن_حُب
