صباح الخير حُبًا ❤️
اول شي أنا مُمتنة شديد لكل الناس التابعو الرواية وقروها بكل حُب وإستحملوا التأخير..حقيقي ما قصدنا شحتفة بس مرات الظروف وإحنا إتهورنا كتبناها إرتجالية في ظروف صعبة بس كلو عشانكم.
الحاجة العايزينها تصلكم من الرواية:
_العلاقات مفروض تكون مُريحة..خفيفة..تهون علينا ♡
بغض النظر إتعرفتو كيف والمواقف البينكم شنو وكيف لقيتو نفسكم سوا زي"عزيز وننا" طالما إنتوا سوا في علاقة مفروض أي طرف يقدر الأخر ويديه أحسن ما عنده مهما كانت الظروف.
_علاقات الصداقة الحقيقية بتكون ما فيها قيود ولا حسابات..ناكل سوا..نلبس سوا..لما تحصل مشكلة نلقى بعض.. ما مُهم نحل المشكلة بس الأهم ما نزيد عليها بغيابنا عن تفاصيل بعض.
السبب اللي خلا علاقة نود وننا حلوة إنهن مع بعض في اللحظات الحلوة والمُرة..وإنهن عارفات بعض وكل واحدة فاهمة التانية ومُتفهمة ظروفها..وكل واحدة مُتأكدة من مكانتا في حياة التانية من غير إثبات ولا مواقف.
_علاقتك بأخوانك قابلة للإهتزاز في أي لحظة زيها زي علاقتك بأصحابك بس الشاهد هنا إنو ديل أخوانك يعني مهما زعلت ومهما كان حجم المشكلة المفروض تعمل شي واحد وهي إنها تقربكم لبعض وتخليكم تفهمو الفجوة اللي حصلت بينكم وتقفلوها بدل ما تزيد..في الطبيعي مافي إتنين إتخلقوا متفصلين لبعض ولما تعاقب شخص على غلطو إنت ما من حقك تجبره يعمل الشي اللي إنت شايفه صح حتى لو كان صح مية في المية ..إنت مهمتك توعي وتنصح بس دا دورك ولو إضطر الأمر تاخد موقف إنما تصحيح الغلط مهمة الشخص الغلطان نفسه..الحياة تجربة شخصية وكل زول بعيش تجربته كاملة من غير أي تدخلات خارجية.
علاقة كريم ووعاد ما مثالية بس دي العلاقة المفروض تكون بين الأخوان يتفهموا بعض..يتقبلوا أخطاء بعض..ويسامحوا بعض.
_العلاقة السوية بين كريم ونود إتلخصت في إنو:
نحب بعض بأمانة من غير تزوير مشاعر اللي هو أنا زعلان يعني زعلان حتى لو الموضوع دا حيخرب مزاج واحد فينا..أنا مبسوط منك ح أجي أعترف ليك وأوريك قدر شنو وجودك في حياتي بيعمل فارق.
نسأل عن بعض..ما مهم منو يتصل أو يبادر بس طالما في إحساس حلو متبادل لما نتكلم يبقى خلينا نتكلم.
نحكي لبعض ونتشارك تفاصيلنا..!
نستشير في بعض حتى في الأمور الصغيرة لون اللبسة مثلًا.
_علاقتك بأبوك مهما كانت متوترة وسيئة في فترة ما لابد تحاول تصلحا إنت محتاج لأبوك في كل خطواتك الصغيرة قبل الكبيرة..وح تجي مواقف توريك إنو وجوده مهم وبعمل فارق.
_بالنسبة لوعاد شايفاكم ما راضين عن النهاية بس نحن قصدناها كدا وشُفنا إنها كدا مُناسبة تمامًا.
الحياة ما كلها ندخل في علاقة ونطلع منها ندخل اللي بعدها.
وعاد لسة صغيرة وقداما عمر تعيش فيه تجاربا الجاية وتتعلم من كل غلطة..رحيم ما ينفع يكون معاها لأنه وضح في حلقة إنها ما بتحبه وما كانت شايفاه هو قداما زي زياد تمامًا بس إختارت تشوف زياد وتقيف جنبه رغم إنه في كل مشكلة وكل محنة هو كمان وقف جنبها وفي مواقف كتيرة خلته يصحى ويفهم إنو بضيع في وقت ومشاعر على الفاضي والسبب الأهم إن نفسه ما سمحت ليه إحترم علاقته بي زياد ووعى لنفسه وشاف حياته مع غيرها.
الدرس الأهم اللي مفروض تتعلمه وعاد إنو الحياة ما بتدي فُرص كتيرة..وإنك انت الوحيد المسؤول من إختياراتك ممكن تديك خيارين بس إنت البتحدد أيهما أفضل بالنسبة ليك.
لازم تعرفوا إنو في فُرص لو ضاعت ما بترجع.
وفي حاجات لما تتكسر ما بتتصلح زي القلوب.
وإنو بعد كل تجربة فاشلة مفروض الواحد يحاسب نفسه ويصلح منها ويعرف غلط في شنو عشان لقدام ما يكرر نفس الغلط.
إحنا إخترنا النهاية الما كانت عادلة بالنسبة ليكم دي بالذات عشان الناس توعى لحتة إنو ما مفروض نطلع من علاقة وندخل في اللي بعدها طوالي زي طوق نجاة.
نهاية العلاقة ما غرق عشان تنجي منه.
ولا سبب يخليك تتمسك باول شخص يظهر ليك شوية مشاعر.
ولا دافع عشان ترجع تشوف وراك الكان بحبك منو وانت ما جايب خبرو.
هي علاقة وانتهت دا حجمها الطبيعي.
من بعدها بنزعل وناخد وقت عادي ونرجع لحياتنا الطبيعية ونكمل عادي ♡
وبننتظر لما يجي الشخص الصح وما بنستعجل ولا بندي فُرص لأي كان.
وأخيرًا:
التعبير يخوانا سحر سحر..!
ذكر البتحبه إنك بتحبه مرة كل فترة..عبر ليه..زوره..إتصل..قول كلام حلو..شاغل..أدي رايك..علق على أشياءه الجديدة..خته في الصورة..رسل لي فجأة قول لي عايز أفطر..بشرب في قهوة..طالع المشوار الفلاني.
في كل العلاقات دي الحاجات دي كانت موجودة وإستمرت لوجودا.
نحن ما محتاجين غير الحاجات دي..!
ما ح نفتش أصحاب زيادة وإحنا عندنا صاحب بألف صحب.
ما محتاجين نحكي زعلنا للغرباء ونشير بوستات حزينة وعندنا شخص بمكالمة واحدة بنسينا زعلنا ليه أساسًا.
إتمنينا الفهم دا يصلكم زي ما حبيتو الأحداث اللطيفة الحلوة حبوا الدروس وإتفهموها كمان ♡
#على_الهامش:
نكتُب لنخبر أحدًا في مكان ما إن غيرك مر بهذه التجربة وقد نجا فلا تبتئس ❤️
#Morning_Message "22"
#نُودين_بِت_مِن_حُب.
ننس تمدين
