صَبَاحَ الخيرَ حُبًا ..!
لما تحصل ليك مواقف وتحس نفسك مكسور وحزين .. عيش الموقف .. أيوة أزعل وأخد جنب .. أبكي طلع الجواك .. حتى لو حترفض الأكل والكلام .. أقفل التلفون يومين وأهجر الناس .. قاطع القهوة والبسكويت .. فوت حلقتين من المسلسل .. أربط وشك وأفصلا من ناس البيت ..!
بس بعدها إتنفض وقوم .. أصحى على روحك وحسبا صح .. وري نفسك إنو كدا كفاية عملت البيك والعليك وما أعتقد الموضوع أي كان لما ينتهي مفروض ينهي معاه حياتك ..!
أنا ضدد الإيجابية المفرطة. . ضدد السعادة المصطنعة .. ضد الأمل الزائف .. ضدد كل حاجة عكس فطرة الانسان..!
مرة كان المفروض أزعل على موضوع هو فعلًا بِّزعل بس أنا عملت فيها اللي قادرة فمن وقتها وأنا عندي خلل في المشاعر زعلي بيطلع في أكتر وقت المفروض أكون فرحانة فيه .. في حتة جواي بتفضل تذكرني إنو هي لسة حزينة كيف أفرح؟
فمن وقتها وأنا في صف المقولة البتقول :
"أقم إنهيارك كاملًا ثم قُم"
ببكي وبتجرس وبزعل وبحرد الأكل وببعد بس لما أقول لنفسي كفاية ببقى كفاية بجد .. صفحة وإنطوت وما في أي مُبرر تاني بخليني أرجع ليها أو أعاين فيها شنو .. بخاف من نفسي وقوتي بعد لحظات الضعف بقعد أستغرب بجد أنا نـسيت ؟
أيوة بجد بنسى والله عشان كدا دايمًا بقول لنفسي:
أعرف كيف أبدأ من الصفر فلا تُراهن.
فياجماعة أقعدوا مع نفسكم إتصالحوا مع أحزانكم وعيشوها وقوموا لحياتكم يرحمكم الله الدنيا يوم ما وقفت علـى زول ولا حتقيف والله..!
#على_الهامش:
"أنا سند نفسي في كل فتراتي الصعبة التي مررت بها ❤️"
#morning_message "15"
#نُودين_بِت_مِن_حُبّ
